បាល់ទាត់ពិភពលោកឆ្នាំ ២០១៨៖ស្ថានីយ៍ទូរទស្សន៍អាមេរិក Fox Sports កំពុងប្រមូល ADN មនុស្សដើម្បីស្វែងរកអ្នកទស្សនាការផ្សាយបន្តផ្ទាល់
ចុះផ្សាយនៅថ្ងៃ៖
ស្តាប់ - ០៤:២៦
ការប្រកួតបាល់ទាត់ពិភពលោកនឹងប្រព្រឹត្តទៅនាប៉ុន្មានសប្តាហ៍ខាងមុខទៀតនៅប្រទេសរុស្សី។ សំរាប់ឆ្នាំ២០១៨ ក្រុមជំរើសជាតិអាមេរិកពុំបានជាប់ចូលរួមការប្រកួតបាល់ទាត់ពិភពលោកនេះឡើយ។ ក្រៅពីធ្វើឲ្យមហាជនអាមេរិកខកចិត្ត អវត្តមានក្រុមជំរើសជាតិក៏កំពុងតែធ្វើឲ្យស្ថានីយ៍ទូរទស្សន៍ Fox Sports ខកចិត្តយ៉ាងខ្លាំងផងដែរ។ ស្ថានីយ៍ទូរទស្សន៍នេះបានចំណាយប្រាក់ដ៏ច្រើនសន្ធឹកសន្ធាប់ដើម្បីទទួលបានសិទ្ធិផ្សាយបន្តផ្ទាល់ទូទាំងសហរដ្ឋអាមេរិក។ ដោយសារតែភ័យខ្លាចមានអ្នកតាមដានទស្សនាតិចតួចធ្វើឲ្យខាតបង់ប្រាក់ចំណូល ស្ថានីយ៍ទូរទស្សន៍ Fox Sports បានប្រើប្រាស់វិធីសាស្រ្តផែ្នកទីផ្សារមួយដោយជំរុញឲ្យពលរដ្ឋអាមេរិកគាំទ្រប្រទេសណាមួយដែលនឹងចូលរួមការប្រកួតនេះ។ លើសពីនេះ ស្ថានីយ៍ទូរទស្សន៍នោះក៏កំពុងជំរុញឲ្យពលរដ្ឋអាមេរិកម្នាក់ៗធ្វើតេស្តអាដេអិន (ADN) ដើម្បីដឹងពីសែស្រឡាយឬសគល់ប្រទសដើមកំណើតជីដូនជីតារបស់ពួកគេ។
នៅសល់តែប៉ុន្មានសប្តាហ៍ទៀតប៉ុណ្ណោះ ការប្រកួតបាល់ទាត់ពិភពលោកទី២១នឹងចាប់ផ្តើមនៅប្រទេសរុស្សី។ ជំនួបព្រឹត្តិការណ៍កីឡាដ៏មានប្រជាប្រិយភាពជាងគេនៅលើពិភពលោកនេះនឹងចាប់ផ្តើមពីថ្ងៃទី ១៤ ខែមិថុនាដល់ថ្ងៃទី១៥ ខែកក្កដា។ ក្រុមជំរើសជាតិបាល់ទាត់សរុបចំនួន ៣២ ប្រទេសនឹងចូលរួមប្រកួតដណ្តើមពានរង្វាន់ពិភពលោក។ ប្រទេសនិមួយៗបានឆ្លងកាត់វគ្គជំរុះនៅតាមតំបន់នៃទ្វីបរបស់ខ្លួន។ សំរាប់ឆ្នាំ២០១៨នេះ ក្រុមជំរើសជាតិសហរដ្ឋអាមេរិកពុំបានចូលរួមប្រកួតទេដោយសារតែបានធ្លាក់ក្នុងវគ្គជំរុះនៅក្នុងតំបន់អាមេរិកខាងជើង និងអាមេរិកកណ្តាល។ មិនត្រឹមតែធ្វើឲ្យអ្នកគាំទ្ររាប់សិបលាននាក់ខកចិត្តប៉ុណ្ណោះទេ ប៉ុន្តែ អវត្តមាននេះក៏ជាបច្ច័យអាក្រក់ដល់ស្ថានីយ៍ទូរទស្សន៍ Fox Sports ផងដែរ។ ស្ថានីយ៍ទូរទស្សន៍ឯកជនអាមេរិកដ៏ធំមួយនេះបានចំណាយប្រាក់ចំនួន ២០០ លានដុល្លារ ដើម្បីទិញសិទ្ធិផ្សាយបន្តផ្ទាល់ផ្តាច់មុខជាភាសាអង់គ្លេសនៅទូទាំងសហរដ្ឋអាមេរិក។ សិទ្ធិផ្សាយបន្តផ្ទាល់នេះ គឺសំរាប់រាល់ការប្រកួតសរុបចំនួន ៦៤ ក្នុងព្រឹត្តិការណ៍ដ៏ធំនេះ។
មែនទែនទៅ ស្ថានីយ៍ទូរទស្សន៍នេះបានទិញសិទ្ធិផ្សាយបន្តផ្ទាល់មុនការធ្លាក់ក្នុងវគ្គជំរុះរបស់ក្រុមជំរើសជាតិបាល់ទាត់អាមេរិកទៅទៀត។ ក្រុមជំរើសជាតិអាមេរិកបានចាញ់ក្រោមស្ថាដៃក្រុមជំរើសជាតិមកពីប្រទេសទ្រីនីដាដ និងតូបាហ្គោកាលពីខែតុលាឆ្នាំ២០១៧។ ស្ថានីយ៍ទូរទស្សន៍ Fox Sports បានផ្អែកលើហេតុផលជាច្រើនមុននឹងហ៊ានប្រថុយខ្លួនចំណាយប្រាក់ដ៏ច្រើនសន្ធឹកសន្ធាប់ទិញសិទ្ធិផ្សាយបន្តបន្ទាល់នេះ។ ហេតុផលទីមួយ គឺគេរំពឹងថាក្រុមជំរើសជាតិអាមេរិកអាចឆ្លងផុតវគ្គជំរុះក្នុងតំបន់ដើម្បីបានកន្លែងមួយទៅប្រកួតនៅប្រទេសរុស្សី។ ហេតុផលទីពីរ គឺបើតាមស្ថិតិកន្លងមកបានឲ្យដឹងថា ចាប់តាំងពីការប្រកួតបាល់ទាត់ពិភពលោកឆ្នាំ១៩៨៦មកម្ល៉េះ នៅពេលណាមានក្រុមជំរើសអាមេរិកចូលរួមប្រកួត ចំនួនទស្សនិកជនអាមេរិកតាមដានតាមកញ្ចក់ទូរទស្សន៍បានកើនឡើងជាលំដាប់។ ឧទារណ៍កាលពីការប្រកួតឆ្នាំ២០១៤ ជាមធ្យមមានទស្សនិកជនអាមេរិកប្រមាណ ១៦ លាននាក់តាមដានរាល់ការប្រកួតនិមួយៗរបស់ក្រុមជំរើសជាតិអាមេរិក។ នេះគ្រាន់តែជាការប្រកួតជំរុះជុំតំបូងនៅក្នុងក្រុមតែប៉ុណ្ណោះ។
ផ្ទុយទៅវិញ សំរាប់ការប្រកួតឆ្នាំ២០១៤ដដែល មកដល់វគ្គពាក់កណ្តាលផ្តាច់ព្រ័តដែលមានក្រុមប្រទេសមកទ្វីបអាមេរិកខាងត្បូង ឬមកពីទ្វីបអឺរ៉ុប គេឃើញថាចំនួនអ្នកទស្សនាអាមេរិកបានធ្លាក់ចុះមកត្រឹមតែ ១០ លាននាក់តែប៉ុណ្ណោះ។ ជាសរុបគេអាចដឹងថា បើទោះបីជាមានក្រុមខ្លាំងប្រកួតនៅវគ្គពាក់កណ្តាលផ្តាច់ព័ត្រយ៉ាងណាក៏ដោយ ក៏ទស្សនិកជនអាមេរិកពុំសូវចាប់អារម្មណ៍ឡើយ។ ពួកគេចាប់អារម្មណ៍តែក្រុមជំរើសជាតិខ្លួនតែប៉ុណ្ណោះ។ ដោយសារតែអត្តវមានក្រុមជំរើសអាមេរិកក្នុងការប្រកួតនេះ ស្ថានីយ៍ Fox Sports កំពុងតែភ័យខ្លាចបាត់ចំនួនអ្នកតាមដានការផ្សាយបន្តផ្ទាល់តាមកញ្ចក់ទូរទស្សន៍។ បើអ្នកនិយាយឲ្យស្រួលស្តាប់ អ្នកតាមដានតិចតួច ចំនួនការឃោសនាពាណិជ្ជកម្មក៏តិចតួចផងដែរ។ ដូចនេះ ស្ថានីយ៍ទូរទស្សន៍ Fox Sports ក៏អាចនឹងបានប្រាក់ចំណូលតិចតួចផងដែរ។ ដើម្បីដោះស្រាយបញ្ហានេះ ថ្នាក់ដឹកនាំស្ថានីយ៍ទូរទស្សន៍កីឡាអាមេរិកដ៏ធំមួយនេះបានស្វែងរកវិធីសាស្រ្តទីផ្សារថ្មីមួយ។ នោះ គឺការឃោសនាជំរុញឲ្យពលរដ្ឋអាមេរិកម្នាក់ៗស្វែងរកសាវតារប្រទេសកំណើតជីដូនជីតារបស់ខ្លួន។
ដូចយើងបានដឹងស្រាប់ហើយ សហរដ្ឋអាមេរិកជាប្រទេសដ៏ធំមួយប្រមូលផ្តុំទៅដោយជនអន្តោប្រវេសន៍មកពីគ្រប់ទិសទីជុំវិញពិភពលោក។ ដើម្បីសំរេចគោលដៅនេះ ស្ថានីយ៍ទូរទស្សន៍ Fox Sports បានសហការគ្នាជាមួយក្រុមហ៊ុន 23andMe។ ក្រុមហ៊ុននេះមានជំនាញផែ្នកស្រាវជ្រាវបច្ចេកវិទ្យាជីវសាស្រ្តវិភាគ ADN មនុស្ស។ នៅក្នុងឃ្លីបវីដេអូឃោសនាមួយ ស្ថានីយ៍ទូរទស្សន៍ Fox Sports បានជំរុញពលរដ្ឋអាមេរិកគាំទ្រក្រុមជំរើសប្រទេសណាមួយ។ គោលដៅនៃការឃោសនាពាណិជ្ជកម្ម គឺផ្អែកលើសម្មិតកម្មមួយដែលថា ប្រសិនបើទស្សនិកជនម្នាក់ដឹងពីឬសគល់ដើមកំណើតជាតិសាសន៍ជីដូនជីតារបស់ខ្លួន ពួកគេនឹងមានទឹកចិត្តតាមដានគាំទ្រក្រុមប្រទេសនោះដែលចូលរួមការប្រកួតបាល់ទាត់ពិភពលោក។ ដើម្បីអាចធ្វើតេស្ត ADN ចង់ដឹងពីតំណពូជរបស់ខ្លួន ទស្សនិកជនអាមេរិកត្រូវបង់ប្រាក់ចំនួន ៩៩ ដុល្លារ រួចពួកគេត្រូវផ្ញើសំណាកទឹកមាត់ទៅកាន់ក្រុមហ៊ុន 23andMe។ ប៉ុន្មានថ្ងៃក្រោយមក ពួកគេនឹងទទួលបានក្រដាសលទ្ធផលផ្ញើតាមរយៈប្រៃសនីយ៍។ ថ្នាក់ដឹកនាំស្ថានីយ៍ទូរទស្សន៍ Fox Sports មានជំនឿថាវិធីសាស្រ្តនឹងទទួលបានជោគជ័យ។ ព្រោះការធ្វើតេស្តនេះលក្ខណៈសាមញ្ញ និងចំណាយប្រាក់តិច។ មកដល់ពេលនេះ មានពលរដ្ឋអាមេរិកប្រមាណជាង ១០ លាននាក់បានធ្វើតេស្តបែបនេះ។
ប៉ុន្តែ គេក៏មិនប្រាកដដែរថាលទ្ធផលធ្វើតេស្តនេះអាចទាក់ទាញទស្សនិកជនច្រើនឲ្យស្ថានីយ៍ទូរទស្សន៍ Fox Sports ។ មូលហេតុ គឺពលរដ្ឋអាមេរិកស្បែកសមួយចំនួនធំមានដើមកំណើតមកពីជីដូនជីតាដែលបានធ្វើអន្តោប្រវេសន៍មកពីប្រទេសអៀរឡង់ និងប្រទេសអ៊ីតាលី។ ប៉ុន្តែ សំរាប់ការប្រកួតឆ្នាំ២០១៨នេះ ទាំងប្រទេសអៀរឡង់ក៏ដូចជាអ៊ីតាលីសុទ្ធតែអវត្តមានពុំបានចូលរួមប្រកួត។ ឥឡូវនេះ គេកំពុងរំពឹងទុកលើអ្នកមានដើមកំណើតមកពីអាល្លឺម៉ង់ អង់គ្លេស ម៉ិចសិក ប៉ូឡូញ និងរុស្សីជាដើម។ សំរាប់មជ្ឈដ្ឋានសុខាភិបាល វិធីសាស្រ្តទីផ្សាររបស់ស្ថានីយ៍ទូរទស្សន៍ Fox Sports ពុំមានសីលធម៌ឡើយ។ លោក Arthur Caplan នាយកផែ្នកក្រមសីលធម៌ជីវសាស្រ្តប្រចាំសាកលវិទ្យាល័យពេទ្យ New York បានបញ្ចេញទស្សនៈថា វីដេអូឃោសនានេះពុំមានន័យអ្វីឡើយ។ គំនិតដែលជំរុញឲ្យមនុស្សជឿថាប្រជាជាតិមួយកសាងឡើងដោយហ្សែនតំណពូជ គឺជាគំនិតរើសអើងពូជសាសន៍។ ផ្ទុយទៅវិញ ប្រទេសមួយ ឬប្រជាជាតិមួយកសាងឡើងដោយសារការប្រមូលផ្តុំកំលាំងផ្សេងៗ។ ក្នុងនោះមានកំលាំងប្រវត្តិសាស្រ្ត សេដ្ឋកិច្ច និងសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ