វ៉េណេស៊ុយអេឡា៖លោកនីកូឡា ម៉ាឌូរ៉ូជាប់ឆ្នោតអាណត្តិថ្មី តែក្រុមប្រឆាំងទាមទារឲ្យបោះឆ្នោតឡើងវិញ
នៅក្នុងប្រទេសវ៉េណេស៊ុយអេឡា លោកប្រធានាធិបតីផុតអាណត្តិនីកូឡា ម៉ាឌូរ៉ូបានជាប់ឆ្នោតមួយអាណត្តិថ្មីជាមួយនឹងសម្លេងគាំទ្រជិត ៧០% ទល់នឹងគូប្រជែងលោកហង់រី ហ្វាល់កុងដែលទទួលបានសម្លេងគាំទ្រចំនួន ២១%។ ប្រតិកម្មភ្លាមៗ លោកហ្វាល់កុងបានបដិសេធមិនទទួលស្គាល់លទ្ធផលបោះឆ្នោត និងបានទាមទារឲ្យរៀបចំបោះឆ្នោតឡើងវិញ។ ការទាមទារដូចគ្នានេះក៏មានពីបេក្ខជនប្រឆាំងម្នាក់ទៀត គឺលោកហ្សាវីយេ ប៊ែរទូស៊ី។ ក្រៅពីក្រុមប្រឆាំងក្នុងស្រុក លទ្ធផលបោះឆ្នោតនេះក៏ត្រូវបានច្រានចោលដោយប្រទេសបស្ចិមលោកភាគច្រើនដែរ ពិសេសអាមេរិក។
ចុះផ្សាយនៅថ្ងៃ៖
ស្តាប់ - ០២:៥៥
ដូចដែលគ្រប់គ្នាបានរង់ចាំ និងគ្មានអ្វីគួរឲ្យភ្ញាក់ផ្អើល លោកប្រធានាធិបតីផុតអាណត្តិវ៉េណេស៊ុយអេឡានីកូឡា ម៉ាឌូរ៉ូបានជាប់ឆ្នោតអាណត្តិថ្មីនៅក្នុងប្រទេសមួយដែលកំពុងគ្របដណ្តប់ដោយអសន្តិសុខ និងកំពុងមានវិបត្តិសេដ្ឋកិច្ចធ្ងន់ធ្ងរអស់ជាច្រើនខែកន្លងមក។ អ្វីជាការកត់សម្គាល់ អត្រាអ្នកចូលរួមបោះឆ្នោតមានប្រមាណជា ៤៦% ដែលជាអត្រាមួយដ៏ទាបមិនធ្លាប់មានទេនៅក្នុងប្រវត្តិនៃការបោះឆ្នោតនៅវ៉េណេស៊ុយអេឡា។ តែទោះជាយ៉ាងនេះក្តី លទ្ធផលនេះត្រូវបានក្រុមអ្នកគាំទ្រលោកម៉ាឌូរ៉ូនាំគ្នាសាទរ ហើយរូបលោកម៉ាឌូរ៉ូថែមទាំងបានចាត់ទុកជាជ័យជំនះប្រវត្តិសាស្រ្តទៀតផង។
តែសម្រាប់ក្រុមប្រឆាំងវិញ ការបោះឆ្នោតនេះមានបង្កប់ដោយភាពមិនប្រក្រតីជាច្រើន រួមទាំងការលួចបន្លំសន្លឹកឆ្នោតផង។ នៅក្នុងន័យនេះ បេក្ខជនមកពីក្រុមប្រឆាំង ពិសេសលោកហង់រី ហ្វាល់កុង និងលោកហ្សាវីយេ ប៊ែរទូស៊ីបានបដិសេធមិនទទួលស្គាល់លទ្ធផលបោះឆ្នោត និងទាមទារឲ្យមានការរៀបចំបោះឆ្នោតឡើងវិញ។ នៅក្នុងសេចក្តីថ្លែងការណ៍របស់ខ្លួន លោកប៊ែរទុយស៊ីបានចោទលោកម៉ាឌូរ៉ូពីបទប្រើគំនាបលើអ្នកបោះឆ្នោតតាមរយៈជំនួយសង្គម។
« ភាពគ្មានប្រសិទ្ធភាព និងភាពអសមត្ថភាពរបស់លោកម៉ាឌូរ៉ូក្នុងការបំបាត់ភាពអត់ឃ្លាន និងភាពកង្វះស្បៀងអាហារជាសក្ខីកម្មមួយដែលបញ្ជាក់ថា អ្នកដែលបានឈ្នះថ្ងៃនេះនឹងត្រូវបាត់បង់ទៅវិញនៅថ្ងៃស្អែកជាមួយប្រទេសរបស់គាត់។ ខ្ញុំមិនជឿថា ប្រទេសនេះនឹងរីកចម្រើនទៅមុខជាមួយនឹងការកាន់អំណាចរបស់ប្រធានាធិបតីដដែលឡើយ។ យើងមិននិយាយពីការកំចាត់លោកម៉ាឌូរ៉ូទេ តែនិយាយពីការបំបាត់ភាពអត់ឃ្លាន និងពីការបំបាត់សោកនាដកម្មសង្គមដែលប្រទេសកំពុងជួបប្រទះនាពេលបច្ចុប្បន្ន។ បើលោកម៉ាឌូរ៉ូនៅបន្តកាន់អំណាច ទណ្ឌកម្មនឹងបន្តមានកាន់ខ្លាំង ហើយវិបត្តិសង្គមនឹងកាន់តែធ្លាក់ដុនដាប »
ជាប្រតិកម្មឆ្លើយតបវិញនឹងការចោទប្រកាន់ពីក្រុមអ្នកប្រឆាំង លោកម៉ាឌូរ៉ូបានបញ្ជាក់យ៉ាងដូច្នេះថា « ពួកគេនិយាយថា យើងបានបង្ខំអស់លោកឲ្យទៅបោះឆ្នោត។ ពួកគេថា ពលរដ្ឋបានទទួលការការគាបសង្កត់ឲ្យទៅបោះឆ្នោត។ ការនិយាយនេះ គឺជាការមើលងាយ និងគ្មានការគោរពចំពោះអ្នកបោះឆ្នោតជាង ៩លាននាក់ដែលបានចូលរួមបោះឆ្នោតដោយសេរី ដោយសម្ងាត់ ដោយស្ម័គ្រចិត្ត និងដោយមានការអនុវត្តសិទ្ធបោះឆ្នោតរបស់ពលរដ្ឋ »។
ក្រៅពីការបរិហាររបស់ក្រុមប្រឆាំង លទ្ធផលបោះឆ្នោតក៏មានការច្រានចោលពីអាមេរិក អឺរ៉ុប និងសម្ព័ន្ធនៃ ១៤ប្រទេសក្នុងទ្វីបអាមេរិក និងការ៉ាអ៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ