តើទស្សនៈកិច្ជរបស់ប្រធានាធិបតីនីហ្សេរីយ៉ា Muhammadu Buhari នៅសហរដ្ឋអាមេរិកមានគោលដៅអ្វីខ្លះ?
ចុះផ្សាយនៅថ្ងៃ៖
ស្តាប់ - ០៤:២៤
កាលពីថ្ងៃច័ន្ទ ទី៣០ មេសាកន្លងទៅនេះ លោក Muhammu Huhari ប្រធានាធិបតីនីហ្សេរីយ៉ា បានធ្វើទស្សនកិច្ចនៅលើទឹកដីសហរដ្ឋអាមេរិក។ នាឯសេតវិមានក្នុងរដ្ឋធានីវ៉ាស៊ីងតោន លោកប្រធានាធិបតីអាមេរិក ដូណាល់ ត្រាំ បានទទួលស្វាគមន៍ប្រមុខដឹកនាំនីហ្សេរីយ៉ា។ នាជំនួបផ្លូវការនោះ សមភាគីទាំងពីរបានជជែកទល់មុខគ្នាមុននឹងបង្ហាញមុខជាសាធារណៈនាឱកាសសន្និសីទកាសែតមួយ។ នេះដំណើរទស្សនកិច្ចលើកតំបូងនៅលើទឹកដីអាមេរិករបស់ប្រធានាធិបតីមកពីទ្វីបអាហ្វ្រិកសំរាប់រដ្ឋការលោក ដូណាល់ ត្រាំ។ ជុំវិញដំណើរទស្សនកិច្ចនេះ រដ្ឋាភិបាលអាមេរិកពុំបានប្រកាសដំណឹងនេះឲ្យបានទូលំទូលាយដល់សារព័ត៌មានឡើយ។ តើទស្សនកិច្ចមានគោលដៅអ្វីខ្លះ?
១៥ ខែក្រោយពីលោក ដូណាល់ ត្រាំ បានជាប់ឆ្នោតក្លាយជាប្រធានាធិបតីអាមេរិក នេះជាលើកតំបូងហើយដែលមានប្រមុខរដ្ឋម្នាក់មកពីទ្វីបអាហ្វ្រិកបានមកធ្វើទស្សនកិច្ចជាផ្លូវការនៅលើទឹកដីអាមេរិក។ ហើយនេះមិនមែនជាការចៃដន្យឡើយ ដែលលោក Muhammu Huhari ប្រធានាធិបតីនីហ្សេរីយ៉ាបានមកជួបលោកប្រធានាធិបតីអាមេរិក។ ដំណើរទស្សនកិច្ចនេះត្រូវបានគេយល់ថាអាចជាច្រកទំលាយភាពតានតឹងរវាងរដ្ឋាភិបាលអាមេរិក និងអាហ្វ្រិក។
តាមពិតទៅ រយៈពេលកន្លងមកនេះ សំដីចម្រូងចម្រាសរបស់លោក ដូណាល់ ត្រាំ បានបង្កភាពរកាំរកូសដល់បណ្តាប្រទេសនៅទ្វីបអាហ្វ្រិក។ នាអង្គប្រជុំមួយនៅសេតវិមាន លោក ត្រាំ ទំនងជាបាននិយាយដោយបានចាត់ទុកប្រទេសអាហ្វ្រិកថាក្រុម «ប្រទេសលាមក»។ មែនទែនទៅ លោកប្រធានាធិបតីអាមេរិកបានប្រើប្រាស់ពាក្យពេចន៍នេះដោយចង់សំដៅទៅលើបណ្តាជនអន្តោប្រវេសន៍មានដើមកំណើតមកពីប្រទេសហៃទី និងប្រទេសអាហ្វ្រិកមួយចំនួនដែលកំពុងរស់នៅលើទឹកដីសហរដ្ឋអាមេរិក។ ក្នុងន័យនេះ លោក ត្រាំ ចង់ភ្ជាប់បញ្ហាសង្គមអាមេរិកទាំងឡាយដែលបង្កឡើងដោយមនុស្សចេញមកពីសហគមន៍ជនជាតិនោះ។
ដោយឡែក ដំណើរទស្សនកិច្ចនេះក៏អាចជាតម្រុយបង្ហាញពីការចាប់អារម្មណ៍ទៅលើទ្វីបអាហ្វ្រិកផងដែរ។ ចាប់តាំងពីចូលកាន់តំណែងជាប្រធានាធិបតីមក មជ្ឈដ្ឋានទូទៅបានកត់សំគាល់ឃើញថា នយោបាយការបរទេសនៃរដ្ឋាភិបាលលោក ដូណាល់ ត្រាំ ពុំសូវជាចាប់អារម្មណ៍នឹងទ្វីបអាហ្វ្រិកប៉ុន្មានឡើយ។ ជាក់ស្តែង គេត្រូវរង់ចាំពេលមួយឆ្នាំទើបលោក Rex Tillerson អតីតៈរដ្ឋមន្រ្តីការបរទេសអាមេរិកបានទៅទស្សនកិច្ចនៅទ្វីបអាហ្វ្រិក។ លើសពីនេះ អតីតៈរដ្ឋមន្រ្តីការបរទេសរូបនេះត្រូវបានលោកប្រធានាធិបតី ដូណាល់ ត្រាំ ដកតំណែង ខណៈពេលដែលកំពុងពេញទស្សនកិច្ចនៅប្រទេសនីហ្សេរីយ៉ាទៀតផង។ សំរាប់មជ្ឈដ្ឋានអ្នកវិភាគទូទៅ គេបានចាត់ទុកកាយវិការបែបនេះថាជាការមិនផ្តល់តំលៃដល់ទ្វីបអាហ្វ្រិក។ ជាក់ស្តែងជាងនេះទៅទៀត ចំណែកតំណែងជាន់ខ្ពស់មួយចំនួនធំនៅក្រសួងការបរទេសអាមេរិកត្រូវបានគេទុកចោលឲ្យនៅទំនេរគ្មានអ្នកទទួលខុសត្រូវ។ តំណែងទាំងនោះ គឺសំរាប់មន្រ្តីជាន់ខ្ពស់គ្រប់គ្រងសំណុំរឿងពាក់ព័ន្ធនឹងទ្វីបអាហ្វ្រិក។
បើតាមការវិភាគរបស់លោក John Campbell អតីតៈឯកអគ្គរដ្ឋទូតអាមេរិកប្រចាំប្រទេសនីហ្សេរីយ៉ាចន្លោះពីឆ្នាំ២០០៤ ដល់ឆ្នាំ២០០៧ បានឲ្យដឹងថា ទស្សនកិច្ចរបស់លោកប្រធានាធិបតីនីហ្សេរីយ៉ានៅលើទឹកដីអាមេរិកអាចជាឱកាសឲ្យរដ្ឋាភិបាលលោក ដូណាល់ ត្រាំ ផ្លាស់ប្តូរជំហរការបរទេសចំពោះទ្វីបអាហ្វ្រិក។ លើសពីនេះទៅទៀត បើនិយាយបែបភាសាសាមញ្ញ នីហ្សេរីយ៉ាជាប្រទេសមានទម្ងន់ផែ្នកការទូត។ មានទម្ងន់ក៏ដោយសារតែប្រទេសនេះមានប្រជាជនច្រើងជាងគេបង្អស់នៅទ្វីបអាហ្វ្រិក។ ពោល គឺនីហ្សេរីយ៉ាមានប្រជាជនជាង ១៩០ លាននាក់។ ទស្សនកិច្ចផ្លូវការនេះក៏ជាការបង្ហាញឲ្យឃើញនូវស្មារតីរឹតចំណងមិត្តភាពរវាងនីហ្សេរីយ៉ា និងសហរដ្ឋអាមេរិកផងដែរ។ ជាពិសេស គឺពង្រឹងទំនាក់ទំនងសហរដ្ឋអាមេរិក-អាហ្វ្រិកតែម្តង។
បើតាមព័ត៌មានផ្សព្វផ្សាយដោយផែ្នកទំនាក់ទំនងសារធារណៈប្រចាំសេតវិមានបានឲ្យដឹងថា ជំនួបពិភាក្សារវាងប្រមុខរដ្ឋទាំងពីរ គឺផ្តោតលើការប្រយុទ្ធប្រឆាំងអំពើភេរវនិយម, ការអភិវឌ្ឈន៍សេដ្ឋកិច្ច និងលទ្ធិប្រជាធិបតេយ្យនៅក្នុងប្រទេសនីហ្សេរីយ៉ា។ សូមបញ្ជាក់ផងដែរថា ប្រទេសនេះនឹងរៀបចំការបោះឆ្នោតប្រធានាធិបតីនាខែកុម្ភៈ ឆ្នាំ២០១៩ខាងមុខនេះ។ លោក Muhammu Huhari បានជាប់ឆ្នោតក្លាយជាប្រធានាធិបតីនីហ្សេរីយ៉ាកាលពីឆ្នាំ២០១៥។ បច្ចុប្បន្ន អ្នកនយោបាយរូបនេះកំពុងស្វែងរកការគាំទ្រដើម្បីបន្តអាណត្តិប្រធានាធិបតីរយៈពេល ៤ ឆ្នាំទៀត។
រយៈពេលចុងក្រោយនេះ ទំនាក់ទំនងរវាងប្រទេសនីហ្សេរីយ៉ា និងសហរដ្ឋអាមេរិកហាក់បានប្រសើរជាងមុន។ កាលពីលោក Muhammu Huhari ទើបតែបានចូលកាន់តំណែងប្រធានាធិបតីកាលពីឆ្នាំ២០១៥ គាត់បានបន្ទោសលោកអតីតៈប្រធានាធិបតីអាមេរិក បារ៉ាក់ អូបាម៉ា ចំពោះការបដិសេធមិនព្រមលក់អាវុធឲ្យនីហ្សេរីយ៉ា។ កាលនោះ នីហ្សេរីយ៉ាត្រូវការសព្វាវុធទំនើបសំរាប់ដឹកនាំប្រតិបត្តិការបោសសំអាត់ក្រុម Boko Haram។ ប៉ុន្តែ ឥឡូវនេះ រដ្ឋាភិបាលអាមេរិកក្រោមការដឹកនាំរបស់លោក ដូណាល់ ត្រាំ បានផ្លាស់ប្តូរគោលជំហរស្រឡះតែម្តង។ ថ្មីៗនេះ សហរដ្ឋអាមេរិកបានអនុញ្ញាតិឲ្យលក់គ្រឿងសព្វាវុធយោធាជាច្រើនបែបទៅឲ្យប្រទេសនីហ្សេរីយ៉ា។ ក្នុងនោះមានដូចជា៖ យន្តហោះយោធាចម្បាំងប្រភេទ Super Tucano ប្រមាណជាង ១០ គ្រឿងក្នុងតម្លៃ ៥០០ លានដុល្លារ។ នេះជាប្រភេទយន្តហោះអាចឈ្លបការណ៍ផង និងបាញ់គ្រាប់មីស៊ីលផង។ យន្តហោះយោធាទាំងនោះនឹងត្រូវផលិតរួចរាល់ ហើយប្រគល់ឲ្យប្រទេសនីហ្សេរីយ៉ានាឆ្នាំ២០២០ខាងមុខនេះ។
សូមរំលឹកផងដែរថា អស់រយៈ ៩ ឆ្នាំហើយ ដែលប្រទេសនីហ្សេរីយ៉ាកំពុងជាប់ដៃបើកប្រតិបត្តិការយោធាប្រយុទ្ធប្រឆាំងនឹងក្រុមភេរនិយម Boko Haram។ ក្រុមជីហាតឥស្លាមជ្រុមនិយមនេះតែងបង្កហឹង្សាលើប្រជាជនស្លូតត្រង់នៅតំបន់ភាគឥសាន្តប្រទេសនីហ្សេរីយ៉ា។ រហូតមកដល់ពេលនេះ ជម្លោះប្រដាប់អាវុធនេះបានបង្កឲ្យមានជនស៊ីវិលចំនួន ២ ម៉ឺននាក់បានស្លាប់បាត់បង់អាយុជីវិត។ លើសពីនេះទៅទៀត មានជនស៊ីវិលរាប់សែនបានធ្វើបំលាស់ទីចាកចោលផ្ទះសំបែង។ វិនាសកម្មនេះក៏បានរីករាលដាលដល់ប្រទេសជិតខាងផងដែរមានជាអាទិ៖ ប្រទេសឆាដ កាមឺរ៉ូន និងនីហ្សេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ