rfi

កំពុងផ្សាយ
  • ផ្សាយផ្ទាល់
  • នាទីព័ត៌មាន
  • RFI ជាភាសាបារាំង
ទស្សនៈព្រឹត្តិការណ៍ពិភពលោក
rss itunes

តើ​ហេតុអ្វី​បាន​ជា​ក្រុមហ៊ុន​សិង្ហបូរី Broadcom មិន​អាច​ទិញ​ក្រុមហ៊ុន​អាមេរិក Qualcomm?

ដោយ បូលីន ដាវីដ

ដោយ​ផ្អែក​លើ​អនុសាសន៍​ផ្តល់​ដោយ​គណៈកម្មាធិការជាតិ​​អាមេរិក​ទទួល​បន្ទុក​ត្រួតពិនិត្យ​មើល​ការ​វិនិយោគ​បរទេស​ លោក​ ដូណាល់​ ត្រាំ បាន​ចេញ​ក្រិត្យ​ប្រធានាធិបតី​មួយ ​ដើម្បី​ទប់​ស្កាត់​មិន​ឲ្យ​ក្រុមហ៊ុន​សិង្ហបុរី​ Broadcom ទិញ​ក្រុមហ៊ុន​អាមេរិក​ Qualcomm។ បំរាម​ហាម​ឃាត់​ផ្លូវ​ការ​​នេះ​ គឺ​ដោយ​ផ្អែក​លើ​ហេតុផល​ខ្លាច​​ប៉ះ​ពាល់​សន្តិសុខ​ជាតិ។

សេចក្តី​សំរេច​នេះ​ត្រូវ​បាន​ធ្វើ​ឡើង​ចាប់​តាំង​ពី​ថ្ងៃ​ទី​១២ ខែ​មិនា​មក​ម្ល៉េះ។ តើ​នេះ​ជា​​ការ​អនុវត្តន៍​នយោបាយ​ការពារ​ខ្លួន​និយម​របស់​សហរដ្ឋ​អាមេរិក?​ តើ​មាន​មូលហេតុ​ផ្សេង​នៅ​ពីក្រោយ​បំរាម​នេះ​ដែរ​ឬទេ?

បន្ទាប់​ពី​ការ​ប្រកាស​ដំឡើង​ពន្ធគយ​លើការនាំ​ចូល​​ដែកថែប​ និងអាលុយមីញូម លោក​​ ដូណាល់​ ត្រាំ បាន​ចុះ​ហត្ថលេខា​ចេញ​ក្រិត្យ​ប្រធានាធិបតី​មួយ​ ដើម្បី​រារាំង​មិន​ឲ្យ​ក្រុមហ៊ុន​បច្ចេកវិទ្យា​សិង្ហបូរី​ Broadcom ទិញ​យក​ក្រុមហ៊ុន​អាមេរិក​ Qualcomm។​ តាមពិត​ទៅ​ ក្រុមហ៊ុន​ Broadcom បានប្រកាស​ជា​ផ្លូវការ​ពី​បំណង​ចង់​ទិញ​នេះ​តាំង​ពី​ដើមខែ​វិច្ឆិការ​ ឆ្នាំ​២០១៧​ មក​ម្ល៉េះ។ តំលៃ​ស្នើ​ទិញ​នេះ​ គឺ​ស្ថិត​ក្នុង​រង្វង់​ទឹកប្រាក់ប្រមាណ​ ១៤២​ ពាន់​លាន​ដុល្លារ។​ នេះ​ជា​តំលៃ​ស្នើ​ទិញ​ដ៏​ធំ​មហិមា​មិន​ដែល​ធ្លាប់​មាន​ក្នុង​ប្រវត្តិ​ទិញ​ក្រុមហ៊ុន​បច្ចេកវិទ្យា។​ តំលៃ​ស្នើ​ទិញ​នេះ​ គឺ​រាប់​បញ្ចូល​តំលៃ​ភាគ​ហ៊ុន​របស់​ក្រុមហ៊ុនផង​​ និង​តំលៃ​បំណុល​​ប្រមាណ​ ២៥​ ពាន់លានដុល្លារ​ផង។

ជា​បឋម​ យើង​ត្រូវ​ដឹង​ថា​ ក្រុម​សិង្ហ​បុរី Broadcom ជា​កម្មសិទ្ធិ​របស់​មហាសេដ្ឋី​ម៉ាឡេស៊ី​ម្នាក់​ឈ្មោះ​ Hock Tan។ ក្រុមហ៊ុន​នេះ​ជំនាញ​ផែ្នក​បច្ចេកវិទ្យា​ Wifi និង​ Bluetooth ជាពិសេស​ គឺ​ការ​ផលិត​ microprocesseur និង​ បំណែក​ផ្គុំ​ផ្សេងៗ​នៃ​​កុំព្យូទ័រ​ និង​ទូរស័ព្ទ​ដៃប្រភេទ smarthphone។ ហើយ​ កាលពី​ឆ្នាំ​២០១៥ តាមរយៈ​ក្រុមហ៊ុន​មួយ​ឈ្មោះ​ Avago Technologies អ្នក​ជំនួញ​ម៉ាឡេស៊ី​រូប​នេះ​បាន​ទិញ​ក្រុមហ៊ុន​ Broadcom ក្នុង​តំលៃ​ ៣៧ ពាន់​លាន​ដុល្លារ។​ ក្រោយ​ពី​ទិញ​បាន​រួច​ហើយ​ ម្ចាស់​ក្រុមហ៊ុន​ថ្មី​នេះ​នៅ​រក្សា​ឈ្មោះ​ក្រុមហ៊ុន​ Broadcom​ ដដែល​។ ភាគច្រើន​នៃ​សកម្មភាព​អាជីវកម្ម​របស់​ក្រុមហ៊ុន​នេះ​ស្ថិត​នៅ​លើ​ទឹកដី​សហរដ្ឋ​អាមេរិក។​ ប៉ុន្តែ​ ទីស្នាក់​ការ​ធំ​របស់​ក្រុមហ៊ុន​ស្ថិត​នៅ​ប្រទេស​សិង្ហបុរី​។

ចំណែក​ ​Qualcomm គឺ​ជា​ក្រុមហ៊ុន​អាមេរិក​មាន​ជំនាញ​ផែ្នក​ផលិ​ត​សៀគ្វី​អេឡិចត្រូនិច​ខ្នាត​តូច។​ បើ​និយាយ​ឲ្យ​ស្រួល​ស្តាប់​ គឺ​ផលិត​ប្រព័ន្ធ​ semi-conducteur ដែល​ប្រៀប​ដូច​ជា​ខួរ​ក្បាល​សំរាប់​ដំណើរ​ការ​ប្រព័ន្ធ​អេឡិច​ត្រូនិច​។​ អតិថិជន​ធំ​បំផុត​របស់​ក្រុមហ៊ុន​ ​ ​Qualcomm គឺ​ក្រុមហ៊ុន​ Apple។​ និយាយ​រួម​ គឺ​ក្រុមហ៊ុន​នេះ​ជា​អ្នក​បំពាក់បច្ចេកវិទ្យា​ ដើម្បី​ដំណើរ​ការ​ប្រព័ន្ធ​ microprocesseur ​លើ​ទូរស័ព្ទ​ដៃ​ iPhone និង​ផលិតផល អេឡិចត្រូនិច​ផ្សេង​ៗទៀត​របស់​ក្រុមហ៊ុន​ Apple​។ មូល​ហេតុ​ដែល​អ្នក​ជំនួញម៉ាឡេស៊ី​ម្ចាស់​ក្រុមហ៊ុន​ Broadcom ចង់​ទិញ​ក្រុមហ៊ុន​អាមេរិក​ ​Qualcomm គឺ​គាត់​ចង់​ឲ្យ​ក្រុមហ៊ុន​របស់​គាត់​ក្លាយ​ជា​ក្រុមហ៊ុន​យក្ស​លំដាប់​ទីបី​លើ​ពិភពលោក​ជំនាញ​ផែ្នក​ផលិត​ប្រព័ន្ធ​អេឡិច​ត្រូនិក semi-conducteur។ ហើយ​គាត់​រំពឹង​ថា​ នាពេល​អនាគត​ ក្រុមហ៊ុន​នេះ​អាច​រក​ប្រាក់​ចំណូល​បាន​ប្រមាណ​ ៥០ ពាន់​លាន​ដុល្លារ​ក្នុង​មួយ​ឆ្នាំ។​ សព្វ​ថ្ងៃ​នេះ​ មាន​ក្រុមហ៊ុន​ធំ​ពីរ​កំពុង​ដឹកមុខ​គេ​ផែ្នក​ប្រព័ន្ធ​ microprocesseur ។

គឺ​ក្រុមហ៊ុនអាមេរិក Intel និង​ក្រុមហ៊ុនកូរ៉េ​ខាង​ត្បូង Samsung។ ចំណុច​មួយ​ទៀត​ គឺ​ក្រុមហ៊ុន​ Broadcom បាន​មើល​ឃើញ​ចំណុច​ខ្សោយ​របស់​ក្រុមហ៊ុន​អាមេរិក​ Qualcomm។​ ក្រៅ​ពី​កំពុង​ជាប់​បំណុល​វ័ណ្ឌ ក​ ក្រុមហ៊ុន​អាមេរិក​ Qualcomm កំពុង​តែ​រុំ​រឹត​ដោយសារ​តែ​បណ្តឹង​ពី​សំណាក់​ក្រុមហ៊ុន​ Apple ផង​ និង​ពី​សំណាក់​អាជ្ញាធរ​ត្រួត​ពិនិត្យ​ការ​ប្រកួត​ប្រជែង​មិន​ស្មោះត្រង់​នៅ​តាម​បណ្តា​ប្រទេស​មួយ​ចំនួន។​ ក្រុមហ៊ុន​ Apple បាន​ចោទ​ក្រុមហ៊ុន​ Qualcomm ថា​បាន​ទាមទារ​តំលៃ​បង់​ភាស៊ី​ថ្លៃ​ហួស​ហេតុ​លើ​អាជ្ញាប័ណ្ណ​ប្រើប្រាស់​បច្ចេកវិទ្យា​អេឡិចត្រូនិច​របស់​ខ្លួន។​ ជា​ការ​សង​សឹក​ ក្រុមហ៊ុន​ Qualcomm ក៏​បាន​ប្តឹង​បក​ទៅ​ក្រុមហ៊ុន​ Apple ពី​បទ​ពុំ​បាន​គោរព​ការ​បង់​ថ្លៃ​ប្រើប្រាស់​បច្ចេកវិទ្យា​របស់​ខ្លួន។ ទន្ទឹម​គ្នា​នោះ​ដែរ​ ក្រុមហ៊ុន​ Qualcomm ក៏​កំពុង​រង​បណ្តឹង​ពីអាជ្ញាធរ​នៅ​តាម​ប្រទេស​មួយ​ចំនួន។

តួយ៉ាង​ដូចជា​នៅ​ប្រទេស​កូរ៉េខាង​ត្បូង​ តៃវ៉ាន់​ និង​ចិន​ ជាដើម​ អាជ្ញាធរ​ត្រួត​ពិនិត្យ​ការ​ប្រកួត​ប្រជែង​មិន​ស្មោះត្រង់​របស់​ប្រទេស​នោះ​បាន​សំរេច​ចិត្ត​ផាក​ពិន័យ​ក្រុមហ៊ុន​ Qualcomm។​ អាជ្ញាធរ​បាន​ចោទ​ប្រកាន់​ថា​ ក្រុមហ៊ុន​អាមេរិក​មួយ​នេះ​កំពុង​តែ​រំលោភ​បំពាន​លើ​ដៃគូ​​អាជីវកម្ម។​ ដោយ​សារ​តែ​សំអាង​លើ​ការ​ផ្តាច់​មុខ​ផែ្នក​បច្ចេកវិទ្យា​ជាន់​ខ្ពស់​នៃ​ប្រព័ន្ធ​ microprocesseur របស់ខ្លួន​ ក្រុមហ៊ុន​ Qualcomm តែង​ធ្វើ​ព្យុះ​ធ្វើ​ភ្លៀង​ទាមទារ​ថ្លៃ​ខ្ពស់​ពី​សិទ្ធិ​លក់​អាជ្ញាប័ណ្ណ​ឲ្យ​ក្រុមហ៊ុន​ផលិត​ទូស័ព្ទ​ដៃ​ចល័ត​ប្រភេទ ​smarthphone។

ជាទូទៅ​ មុន​នឹង​លក់​ក្រុមហ៊ុន​របស់​ខ្លួន​ រាល់​ក្រុមហ៊ុន​ឯកជនអាមេរិកទាំង​អស់​ត្រូវ​ឆ្លង​កាត់​សេចក្តី​សំរេច​ចិត្ត​ពី​សំណាក់​គណៈកម្មាធិការ​ជាតិ​អាមេរិក​ត្រួត​ពិនិត្យ​ការ​វិនិយោគ​បរទេស​ជាមុន​សិន។​ គណៈកម្មាធិការ​នេះ​មាន​សមាជិក​មក​ពី​​តំណាង​ក្រសួង​ និង​ទីភ្នាក់​ងារ​សហព័ន្ធ​ជាច្រើន​ក្នុង​ជួរ​រដ្ឋាភិបាល​អាមេរិក។ ក្រិត្យ​ប្រធានាធិបតី​ខុស​ពី​សេចក្តី​សំរេច​ធម្មតា​របស់​គណៈកម្មាធិការ​ជាតិ​អាមេរិក​ ។​ ក្នុង​ករណី​សំណុំ​រឿង​ក្រុមហ៊ុន​សិង្ហបុរី Broadcom និង​ក្រុមហ៊ុន​អាមេរិក Qualcomm សេចក្តី​សំរេច​ពី​ប្រធានាធិបតី​មាន​លក្ខណៈ​ជា​ស្ថាពរ​។ ពោល គឺ​គ្មាន​សិទ្ធិ​ស្នើ​សុំ​ការ​ពិចារណា​ម្តង​ទៀត​ ឬ​សុំ​ប្តឹង​ជំទាស់​ឡើយ។​

បើ​តាមការ​វិភាគ​ទូទៅ​ ​ការ​រាំង​ខ្ទប់​នេះ​ក៏​បង្ហាញ​ឲ្យ​ឃើញ​ពី​ភាព​ភ័យ​ខ្លាច​កាន់​តែ​ខ្លាំង​ឡើង​របស់​សហរដ្ឋ​អាមេរិក​ ដែល​ខ្លាច​ចាញ់​ប្រទេស​ចិន​ក្នុង​ការ​ប្រកួត​ប្រជែង​លើ​ផែ្នក​បច្ចេកវិទ្យា​នា​ថ្ងៃ​អនាគត។ សហរដ្ឋ​អាមេរិក​ខ្លាច​ថា​​ ក្រោយពី​ទិញ​ក្រុមហ៊ុន​ ​ Qualcomm បាន​ហើយ​ ក្រុមហ៊ុន​ Broadcom បោះចង់​ចោល​គំរោង​វិនិយោគ​លើបច្ចេកវិទ្យា​​ប្រព័ន្ធ​ 5G។ បច្ចុប្បន្ននេះ​ ដោយសារ​តែ​ចំណាយ​ខ្ពស់​ពេក​​ ក្រុមហ៊ុន​ ​ Qualcomm ចង់​បោះ​បង់​ចោល​គំរោង​ស្រាវជ្រាវ​អភិវឌ្ឈន៍​បង្កើត​ប្រព័ន្ធ​ 5G។ នេះ​​ជា​បច្ចេកវិទ្យាថ្មី​សំរាប់​ថ្ងៃ​អនាគត​ ដែល​​ត្រូវ​បាន​គេ​រំពឹង​ទុក​ថា​​នឹងយក​ទៅ​​​ប្រើប្រាស់​សំរាប់​បណ្តាញ​អ៊ីនធឺណែត​ទូរស័ព្ទ​ដៃ ឬ​រថយន្ត​គ្មាន​មនុស្ស​បើក។​ បើ​យោង​តាម​សេណារីយ៉ូ​នេះ​ គឺ​សហរដ្ឋ​អាមេរិក​ខ្លាច​ក្រុមហ៊ុន​ចិន Huawei គ្រប់​គ្រង​បច្ចេកវិទ្យា​នេះ​ដាច់​មុខ​គ្មាន​គូប្រជែង​នៅ​លើ​ទីផ្សារ​អាមេរិក៕

ចិន បង្ហោះយាន​ទៅ​ស្រាវជ្រាវ​ជា​លើកទីមួយ នៅ​ចំហៀង​ម្ខាង​ទៀត​ របស់​ព្រះចន្ទ

តើជួង ដែល​អាមេរិក​ព្រម​ប្រគល់​ឱ្យ​ហ្វីលីពីន​វិញ មាន​ប្រវត្តិ​យ៉ាងណា ?

Brexit៖​ចុះ​បើ​ប្រទេស​អង់គ្លេស​សម្រេចចិត្ត​បន្ត​​រួម​សុខ រួមទុក្ខ​ជាមួយ​សហភាពអឺរ៉ុប​​វិញ?

បារាំង៖អនាគត និង​ភាព​ដែល​មិន​អាច​ទៅ​រួច​ក្នុង​កំណែទម្រង់​សង្គម​សេដ្ឋកិច្ច

បារាំង៖ ស្វែងយល់​ពី​ប្រភព និង​កំហឹង​នៃ “ចលនា​អាវកាក់​ពណ៌​លឿង”

ធ្យូងថ្ម៖ នៅពេលប្រយោជន៍​​សេដ្ឋកិច្ច និង​នយោបាយ​សំខាន់​ជាង​ រឿងផែនដី​ឡើងកំដៅ

អ៊ីស្រាអែល៖​លោកនេតាន់យ៉ាហ៊ូ​កំពុង​ប្រឈម​នឹង​ធ្លាក់​ពី​អំណាច​ដោយ​រឿងអាស្រូវ​ពុករលួយ?

កំណែ​​​ទម្រង់​រយៈ​​​ពេល​​​វែង​​​និង​​​ប្រជាប្រិយភាព​​​របស់​​​ប្រធានាធិបតី​​​បារាំង​​​

តើរដ្ឋាភិបាលកុងហ្គោ មានអ្វីលាក់លៀម នៅពីក្រោយឃាតកម្ម មន្ត្រីរបស់UNទាំង២នាក់?

ហេតុអ្វី​បាន​ជា​រដ្ឋាភិបាល​​បារាំង​ចោទ​ចលនា​ស្តាំនិយមជ្រុល​ជា​អ្នក​បង្ក​អំពើហិង្សា​នៅ​លើ​មហាវិថី​ហ្សង់អេលីហ្សេ?

រាជទាយាទ​អេមីរ៉ាតអារ៉ាប់រួម មិន​សូវ​ចេញ​មុខ តែ​មានអំណាច​​​ខ្លាំង

របាយការណ៍៖ អាមេរិក​អាចនឹង​ចាញ់ បើសិន​ធ្វើ​សង្រ្គាម​ជាមួយ ចិន ឬ​រុស្ស៊ី

តើ​ប្រទេសចិន​ ពិតជា​ចោរ​លួច​បច្ចេកវិទ្យា​ពី​សហរដ្ឋអាមេរិក​មែន​ឬយ៉ាងណា​?

សន្ទស្សន៍​អភិវឌ្ឍន៍​មនុស្ស ​(H.D.I) និង​​ កង្វះខាត​​របស់​ ផលិតផល​ក្នុងស្រុក​សរុប​ (G.D.P)​

បណ្តាញ​ភេរវជន​ហើយ​និង​ស្មាតហ្វូន

លីប៊ី ៖ ដំណើរ​ការ​ចរចា​សន្តិភាព រាំងស្ទះ​ដោយ​ភាព​មិន​ស្របគ្នា រវាង​ប្រទេស​ពាក់ព័ន្ធ

ក្រោយ​ដណ្តើម​កាន់កាប់​រដ្ឋសភា ​តើ​គណបក្ស​ប្រជាធិបតេយ្យ​អាច​ធ្វើអ្វី​លោកដូណាល់ ត្រាំ​បាន?

ខ្យល់ពុលបរិយាកាស​កំពុង​ក្លាយ​ជា​ជម្ងឺដ៏រ៉ាំរ៉ៃ​របស់​រដ្ឋធានី​ញូវដេលី

អ្វី​ទៅ​ជា​គោលដៅ​ពិត​នៃ​ទណ្ឌកម្ម​អាមេរិក​លើ​អ៊ីរ៉ង់ និង​ថាតើ​អ្នក​ណា​ដែល​កំពុង​​រងគ្រោះ​ខ្លាំង​ជាង​គេ​ពី​ទណ្ឌកម្ម​នេះ?

នៅ​ប្រទេស​ក្រីក្រ ​អត្រាអ្នក​អត់​ការងារ​ទាប​ ព្រោះ​មនុស្ស​មិន​អាច​មិន​ធ្វើការ​