អត្រាកំណើនសេដ្ឋកិច្ចរបស់អាមេរិកបានស្ទុះដល់ ៣% នៅចុងឆ្នាំ ២០១៧
នៅសហរដ្ឋអាមេរិក កំណើនសេដ្ឋកិច្ចក្នុងត្រីមាសទី៤ ឆ្នាំ ២០១៧ បានស្ទុះឡើងលើសពីការប្រមើលទុករបស់ក្រុមអ្នកវិភាគ។ តាមតួលេខផ្សព្វផ្សាយដោយក្រសួងពាណិជ្ជកម្មនាថ្ងៃពុធ ទី២៨ មីនា អត្រាកំណើនសេដ្ឋកិច្ចនាដំណាច់ឆ្នាំ ២០១៧ អាចមានក្នុងរង្វង់ ៣% ពោលច្រើនជាងការរំពឹងទុកដែលអាចមានតែ ២,៥% ឬ ២,៦% ប៉ុណ្ណោះ។ ទោះជាយ៉ាងនេះក្តី និងបើគិតពេញមួយឆ្នាំ ២០១៧ អត្រាកំណើនសេដ្ឋកិច្ចមានតែក្នុងរង្វង់ ២,៣%។
ចុះផ្សាយនៅថ្ងៃ៖
ស្តាប់ - ០១:៤១
ក្នុងរយៈពេល ២ត្រីមាសចុងក្រោយនៃឆ្នាំ ២០១៧ អាមេរិកទទួលបានអត្រាកំណើនសេដ្ឋកិច្ចលើសពីការរំពឹងទុក តែបើបូកពេញមួយឆ្នាំ ២០១៧ គឺស្ថិតក្នុងរង្វង់ ២,៦% ពោលគ្រាន់បើជាងឆ្នាំ ២០១៦ ដែលមានតែ ១,៥% តែអន់ជាងឆ្នាំ ២០១៥ ដែលមានដល់ទៅ ២,៩%។ សន្ទុះនៃកំណើនសេដ្ឋកិច្ចនាដំណច់ឆ្នាំ ២០១៧ បានមកពីកំណើននៃការចាយវាយរបស់ពលរដ្ឋអាមេរិក ហើយការដែលពលរដ្ឋអាមេរិកមានលុយចាយបន្ថែមក៏ដោយសារតែរដ្ឋបានបញ្ចុះពន្ធពីពួកគេ។
នៅក្នុងត្រីមាសទី៤ ឆ្នាំ ២០១៧ ការចំណាយទូទៅរបស់ពលរដ្ឋក្នុងស្រុកដែលជាក្បាលម៉ាស៊ីនសេដ្ឋកិច្ចដ៏សំខាន់របស់អាមេរិកបានកើនឡើងចំនួន ៤%។ បន្ទាប់មក ការវិនិយោគរបស់រោងចក្រ សហគ្រាសក៏មានការស្ទុះឡើងលើសពីការប្រមើលទុក។ បន្ទាប់មកទៀត អត្រានៃការនាំចេញនៅក្នុងត្រីមាសទី៤ ឆ្នាំ ២០១៧ ក៏មានការកើនឡើងចំនួន ៧% ទល់នឹង ២,១% ក្នុងត្រីមាសទី៣ ឆ្នាំដដែល។ តែអត្រានាំចេញនេះនៅមានកម្រិតទាបឆ្ងាយណាស់បើធៀបនឹងអត្រានៃការនាំចូលដែលមានដល់ទៅ ១៤,១% ដែលកម្រិតមួយកើនឡើងខ្លាំងគិតតាំងពី ៧ឆ្នាំកន្លងទៅ។
ទន្ទឹមគ្នានេះ ការចំណាយរបស់រដ្ឋក៏បានរួមចំណែកជួយជំរុញកំណើនសេដ្ឋកិច្ចដែរ។ ក្នុងត្រីមាសទី៤ ឆ្នាំ ២០១៧ ការចំណាយរបស់រដ្ឋអាចកើនដល់ ៣% ដែលជាកម្រិតមួយមិនធ្លាប់មានគិតតាំងពីឆ្នាំ ២០១៥ ដោយផ្តោតខ្លាំងលើការវិនិយោគក្នុងវិស័យការពារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ