ក្រោយការបាញ់រះនៅFlorida មានតែក្តីរន្ធត់និងសំណួរជាច្រើន គ្មានចម្លើយ
សហរដ្ឋអាមេរិក បានជួបហេតុការណ៍បាញ់រះនៅសាលារៀន ជាថ្មីទៀត កាលពីថ្ងៃពុធ។ គឺជាករណីទី ១៨ សម្រាប់ឆ្នាំ២០១៨ ដែលទើបចាប់ផ្តើមមិនទាន់បានពីរខែផង។ ខ្មាន់កាំភ្លើងជាយុវជនអាយុ ១៩ឆ្នាំ បានទទួលសារភាព។ ប៉ុន្តែសហរដ្ឋអាមេរិកទាំងមូលកំពុងមានចម្ងល់និងចោទសួរថាតើហេតុអ្វីបានជាយុវជនមានជំនក់ចិត្តនឹងអាវុធ មានសតិមិនត្រឹមត្រូវ និងមានចំណងជាមួយក្រុមស្តាំជ្រុលនិយម អាចគេចពីភ្នែកច្រមុះរបស់ប៉ូលិស ហើយមកប្រព្រឹត្តសកម្មភាពបាញ់ប្រហារនៅសាលារៀនបាន ?!
ចុះផ្សាយនៅថ្ងៃ៖
ស្តាប់ - ០២:០៥
ខ្មាន់កាំភ្លើង Nicolas Cruz បានទទួលសារភាព និងបានសម្តែងវិប្បដិសារី ចំពោះទង្វើបាញ់រះសម្លាប់លើសិស្សសាលាអស់១៧នាក់ កាលពីថ្ងៃពុធ បន្ទាប់ពីបានប៉ូលិសចាប់ចោទសួរអស់មួយយប់។ Nicolas Cruz បានរងការចោទប្រកាន់ ពីបទធ្វើឃាតមនុស្ស១៧នាក់ ដោយចេតនានិងត្រូវកាត់ទោស ក្នុងពេលឆាប់ៗ។ ប៉ុន្តែបណ្តាជនអាមេរិកនៅតែមិនអស់មិនហើយ ថាតើនេះជាការធ្វេសប្រហែសរបស់FBIឬយ៉ាងណា ?
តាមការពិត ប៉ូលិសសហព័ន្ធ FBI បានទទួលស្គាល់មានសញ្ញាអាសន្នតាំងពីខែកញ្ញា២០១៧ ថា មានអ្នកប្រើប្រាស់ប្រព័ន្ធYou Tubeបាន បង្ហោះសារចង់ក្លាយជា ខ្មាន់កាំភ្លើងប្រកបដោយវិជ្ជាជីវៈនៅសាលារៀនមែន ?! ប៉ុន្តែប៉ូលិសគ្មានព័ត៌មានអ្វីដែលអាចបញ្ជាក់ពីពេលវេលា កន្លែង និងអត្តសញ្ញាណរបស់បង្ហោះសារខំម៉ិននោះឡើយ។ ចំណែកទំនាក់ទំនងរបស់ខ្មាន់កាំភ្លើងជាមួយនឹងក្រុមជ្រុលនិយមស្បែកស គឺជាសម្មតិកម្មដែលលើកឡើងដោយសហព័ន្ធប្រឆាំងនឹងការផ្សព្វផ្សាយព័ត៌មានមិនពិត។ បើតាមអង្គការដែលសិក្សាចលនាជាតិនិយមជ្រុលនៅអាមេរិក នីកូឡា គ្រូស បានចូលរួមប្រជុំជាញឹកញយ និងហាត់រៀនបាញ់កាំភ្លើង ជាមួយក្រុមនេះ។
យ៉ាងណាក៏ដោយ ក៏សោកនាដកម្មនេះ បានធ្វើការតស៊ូមតិស្តីពីការប្រើប្រាស់អាវុធមាសន្ទុះឡើងវិញ។ ម្តាយរបស់ជនរងគ្រោះម្នាក់បាន ស្រែកហៅចំៗឱ្យប្រធានាធិបតីអាមេរិក រិះរកមធ្យោបាយភ្លាមៗ ដើម្បីរក្សាសន្តិសុខដល់គ្រប់ក្មេងៗ។
លោកប្រធានាធិបតី ដូណាល់ត្រាំ ដែលនឹងអញ្ជើញទៅកាន់កន្លែងកើតដោយផ្ទាល់ ដើម្បីរំលែកទុក្ខថា្នក់ជាតិ បានអំពាវនាវឱ្យពលរដ្ឋអាមេរិកផ្តល់ក្តីស្រលាញ់ជំនួសការស្អប់ខ្ពើមគ្នា។ ប៉ុន្តែលោកមិនបានលើកឡើងសោះអំពីការប្រើប្រាស់អាវុធ ផ្ទុយពីមតិសាធារណៈជាច្រើនដែលបានផុសផុលឡើងជាថ្មីស្នើឱ្យរដ្ឋាភិបាលពង្រឹងវិធានការត្រួតពិនិត្យអាវុធ។
អតីតប្រធានាធិបតីអាមេរិក ជាអ្នកប្រជាធិបតេយ្យ លោក បារ៉ាក់ អូបាម៉ា បានព្រលយកាលពីថ្ងៃព្រហស្បតិ៍ម្សិលមិញ ថាអាមេរិកពិតជាអាចធ្វើបាន និងបានអំពាវនាវឱ្យសភាអាមេរិកភ្ញាក់រលឹកឡើង។ ប៉ុន្តែគេសង្ឃឹមតិចតួចបំផុតថាសភាដែលភាគច្រើនជាអ្នកសាធារណរដ្ឋនឹងធ្វើកំណែទម្រង់ច្បាប់គ្រប់គ្រងអាវុធនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ