ដំណើរទស្សនកិច្ចមួយជុំរបស់ប្រមុខការបរទេសអាមេរិកនៅដើមបូព៌ា
រដ្ឋមន្រ្តីការបរទេសអាមេរិក លោករេច ធីល័រសុន ធ្វើដំណើរទស្សនកិច្ចមួយជុំនៅ ដើមបូព៌ា ដោយចាប់ផ្តើមដំបូងនៅថ្ងៃចន្ទ នេះ នៅក្នុងប្រទេសអេហ្ស៊ីប។ បន្ទាប់ពី អេហ្ស៊ីប ប្រមុខការបរទេសអាមេរិកនឹងទៅចូលរួម ក្នុងកិច្ចប្រជុំស្តីពីការប្រយុទ្ធប្រឆាំងនឹងក្រុមជីហាត អង្គការរដ្ឋអ៊ីស្លាម នៅក្នុងប្រទេសកូវ៉ែត។ ប៉ុន្តែ គឺដំណើរទៅកាន់ប្រទេសតួកគី ដែលជាដំណាក់កាលស្មុគស្មាញ សម្រាប់រដ្ឋមន្រ្តីការបរទេសអាមេរិក នៅក្នុងកាលៈទេសៈ ដែលទំនាក់ទំនងរវាងប្រទេសទាំងពីរ កាន់តែតានតឹង ជាពិសេសនៅក្នុងសំណុំរឿងស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ធ្វើដំណើរទៅដល់ក្រុងគែរតាំងពីថ្ងៃអាទិត្យ ប្រមុខការបរទេសអាមេរិកត្រូវចូលជួប ប្រធានាធិបតី អេហ្ស៊ីប លោកស៊ីស៊ី នៅថ្ងៃចន្ទនេះ។ តាមមន្រ្តីក្រសួងការបរទេសអាមេរិក ទស្សនកិច្ចរបស់លោកលោករេច ធីល័រសុន នៅអេហ្ស៊ីប នឹងផ្តោតសំខាន់ទៅលើការរួមគ្នា ប្រយុទ្ធប្រឆាំងក្រុមភេរវនិយម បញ្ហានៅលីប៊ី និងស៊ីរី ដែលជាសំណុំរឿងឈឺក្បាលរួមគ្នារបស់ប្រទេសទាំងពីរ ហើយនិងជម្លោះអ៊ីស្រាអែល ប៉ាឡេស្ទីន។
លោករដ្ឋមន្រ្តីការបរទេសអាមេរិក ទៅទីក្រុងគែរ លើកនេះ គឺនៅមួយខែក្រោយ ទស្សនកិច្ចរបស់អនុប្រធានាធិបតី អាមេរិក លោកMike Pence នៅអេហ្ស៊ីប ដែលនៅពេលនោះ លោក Mike Pence បាននិយាយជាមួយភាគីអេហ្ស៊ីប ពី បញ្ហាសន្តិសុខ ក្នុងតំបន់ ហើយនិងការផ្តល់ជំនួយរបស់អាមេរិក សម្រាប់អេហ្ស៊ីប។
សូមអាន៖លោកដូណាល់ ត្រាំទទួលប្រធានាធិបតីអេហ្ស៊ីបក្រោមសំឡេងរិះគន់របស់អង្គការការពារសិទ្ធិមនុស្ស
បន្ទាប់ពី អេហ្ស៊ីប ប្រមុខការបរទេសអាមេរិកនឹងធ្វើដំណើរទៅប្រទេសកូវ៉ែត ជាទីដែលលោកនឹងចូលរួមនៅក្នុងកិច្ចប្រជុំរបស់ក្រុមប្រទេសសម្ព័ន្ធអន្តរជាតិដើម្បីប្រយុទ្ធប្រឆាំងនឹងក្រុមជីហាតអង្គការរដ្ឋអ៊ីស្លាម ក្នុងទឹកដីអ៊ីរ៉ាក់ និងស៊ីរី។ បន្ទាប់ពីនោះ រដ្ឋមន្រ្តីការបរទេស លោករេច ធីល័រសុននឹងចូលជួបព្រះចៅរបស់ប្រទេសអូម៉ង់ មុននឹងធ្វើដំណើរទៅជួបប្រធានាធិបតីលីបង់។
លោករេច ធីល័រសុននឹងបិទបញ្ចប់ទស្សនកិច្ចមួយជុំនៅដើមបូព៌ា នៅប្រទេសតួកគី។ គឺ ទស្សនកិច្ចនៅតួកគី ដែលជាដំណាក់កាលស្មុគស្មាញសម្រាប់ប្រមុខការបរទេសអាមេរិក។ តាមអ្នកទទួលខុសត្រូវម្នាក់របស់ក្រសួងការបរទេសអាមេរិក លោករេច ធីល័រសុនបាន គិតទុករួចហើយថា ជំនួបពិភាក្សាជាមួយភាគីតួកគី នឹងលំបាក ជាពិសេសនៅក្នុងសំណុំរឿងស៊ីរី។ អាមេរិក និងតួកគី ជាសមាជិករបស់អង្គការអូតង់ ប៉ុន្តែ ប្រទេសទាំងពីរ កំពុងប្រឈមមុខដាក់គ្នា ដោយសារតែតួកគីបានបើកការវាយប្រហារទៅលើក្រុមគួឌីស្ថាន ស៊ីរី នៅក្នុងទឹកដីស៊ីរី។
អាមេរិកធ្លាប់បានអំពាវនាវឲ្យតួកគីបញ្ឈប់ប្រតិបត្តិការយោធា វាយប្រហារទៅលើក្រុមគួឌីស្ថាន ស៊ីរី ដែលជាដៃគូប្រយុទ្ធ បានជួយអាមេរិក វាយយកឈ្នះ លើក្រុមជីហាតរដ្ឋអ៊ីស្លាម នៅស៊ីរី។ ប៉ុន្តែ រដ្ឋាភិបាលតួកគីវិញ ដែលបានបញ្ជូនទ័ពទៅវាយប្រហារលើក្រុមគួឌីស្ថានក្នុងទឹកដីស៊ីរី តាំងពីខែមករា បាននិយាយដាច់ណាត់ ហើយថា នឹងពង្រីកសមរភូមិប្រយុទ្ធ ទៅភាគខាងជើងស៊ីរី ក្បែរទឹកដីអ៊ីរ៉ាក់ និងបាន ទាមទារឲ្យអាមេរិកដកកងទ័ពចេញពីស៊ីរី បើសិនមិនចង់ប្រឈមមុខនឹងទាហានតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ