ស៊ីរី៖ក្រុមប្រឹក្សាសន្តិសុខបរាជ័យក្នុងការស្វែងរកបទឈប់បាញ់មួយដើម្បីជំនួយមនុស្សធម៌
នៅក្នុងទីក្រុងញូយ៉ក សហរដ្ឋអាមេរិក ក្រុមប្រឹក្សាសន្តិសុខដែលបានរួមប្រជុំបិទទ្វារនាថ្ងៃព្រហស្បតិ៍ ទី៨ កុម្ភៈបានទទួលបរាជ័យក្នុងការស្វែងរកបទឈប់បាញ់បណ្តោះអាសន្នមួយដើម្បីអនុញ្ញាតឲ្យមានការបញ្ជូនជំនួយមនុស្សធម៌ទៅកាន់តំបន់រងគ្រោះ។ ភាគីរុស្ស៊ីជាអ្នកដែលបានបោះឆ្នោតប្រឆាំងលើបទឈប់បាញ់បណ្តោះអាសន្នដោយលើកយកហេតុផលទៅពន្យល់ថា ពួកភេរវជននឹងមិនទទួលយកបទឈប់បាញ់នោះទេ។ គួរជម្រាបជូនថា កំណើនអំពើហិង្សានៅស៊ីរីនារយៈពេលប៉ុន្មានថ្ងៃចុងក្រោយនេះបានបណ្តាលឲ្យមានមនុស្សស្លាប់ជាង ២០០នាក់ដែលភាគច្រើនជាជនស៊ីវិល។
ចុះផ្សាយនៅថ្ងៃ៖
ស្តាប់ - ០២:០៣
កិច្ចប្រជុំបិទទ្វាររបស់ក្រុមប្រឹក្សាសន្តិសុខដែលបានរៀបចំនេះជាសំណើរបស់ប្រទេសស៊ុយអែត និងប្រទេសគុយវ៉ែតតាមការទាមទាររបស់ទីភ្នាក់ងារអង្គការសហប្រជាជាតិជាច្រើនដែលកំពុងធ្វើការនៅក្នុងទឹកដីស៊ីរី។ អ្វីដែលពួកគេទទូចចង់បាន គឺចង់ឲ្យមានបទឈប់បាញ់រយៈពេល ១ខែដើម្បីអនុញ្ញាតឲ្យមានការរៀបចំបញ្ជូនជំនួយមនុស្សធម៌ទៅឲ្យជនស៊ីវិលដែលកំពុងជាប់កុននៅក្នុងការវាយប្រហារគ្នារវាងពួកភេរវជន និងកម្លាំងរដ្ឋាភិបាលស៊ីរី រួមដៃជាកម្លាំងទ័ពរុស្ស៊ី។ ការវាយប្រហារដែលក្នុងរយៈពេល ៥ថ្ងៃកន្លងទៅបានបណ្តាលឲ្យមានមនុស្សស្លាប់ជាង ២០០នាក់។
លោក Vassili Nebenzia ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិបានលើកយកហេតុផលគ្រោះថ្នាក់ភេរវនិយមជាសំអាងដើម្បីបញ្ជាក់ពីមូលហេតុដែលរុស្ស៊ីបានបោះឆ្នោតប្រឆាំងនឹងបទឈប់បាញ់។ តាមលោក Vassili រុស្ស៊ីចង់ឲ្យមានបទឈប់បាញ់ខ្លាំងណាស់ តែគេមិនប្រាកដថាពួកភេរវជនទទួលយកទេ។ យ៉ាងណាក៏ដោយ លោក Mark Lowcock ប្រធានផ្នែកប្រតិបត្តិការមនុស្សធម៌របស់អង្គការសហប្រជាជាតិដែលមានវត្តមាននៅក្នុងកិច្ចប្រជុំមិនញញើតនឹងដំឡើងសម្លេងខ្លាំងៗដោយលើកឡើងពីស្ថានការណ៍ដ៏អាក្រក់គិតតាំងពីឆ្នាំ ២០១៥។
សូមជម្រាបជូនថាក្នុងរយៈពេលប៉ុន្មានថ្ងៃចុងក្រោយនេះ ទីក្រុងហ៊្គូតាខាងកើត និងទីក្រុងអ៊ីលីបដែលជាទីតាំងរបស់ក្រុមប្រឆាំងស៊ីរីបានស្ថិតក្រោមការវាយប្រហារផ្លូវអាកាសពីទ័ពរដ្ឋាភិបាលស៊ីរី រួមជាមួយទ័ពរុស្ស៊ី។ ព្រឹត្តិការណ៍មួយនេះត្រូវបានលោក François Delattre ឯកអគ្គរដ្ឋទូតបារាំងប្រចាំអង្គការសហប្រជាជាតិបានយល់ឃើញថា ជាការវិលក្រោយនៃស្ថានភាពដ៏អាក្រក់របស់ស៊ីរីដែលគេធ្លាប់បានឃើញកាលពីប៉ុន្មានឆ្នាំមុន។ ទន្ទឹមគ្នានេះ លោក Delattre ក៏បានរម្លឹកដៃគូរុស្ស៊ីជាថ្មីថា ស្ថានការណ៍នៅលើសមរភូមិពេលនេះមិនអាចកាត់ផ្តាច់ពីការខិតខំប្រឹងប្រែងផ្លូវនយោបាយរបស់រុស្ស៊ីខ្លួនឯងដើម្បីទទួលបានកិច្ចព្រមព្រៀងសន្តិភាពឲ្យស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ