rfi

កំពុងផ្សាយ
  • ផ្សាយផ្ទាល់
  • នាទីព័ត៌មាន
  • RFI ជាភាសាបារាំង
ព្រឹត្តិការណ៍អន្តរជាតិប្រចាំថ្ងៃ
rss itunes

អាមេរិក៖​សុន្ទរកថា​ទៅ​កាន់​ប្រជាជាតិ​របស់​លោក​ដូណាល់ ត្រាំ​ផ្តោតសំខាន់​លើ​នយោបាយ និង​ឯកភាព​ផ្ទៃក្នុង

ដោយ គួច គន្ធារ៉ា

នៅ​ថ្ងៃ​អង្គារ ទី៣០ មករា លោក​ប្រធានាធិបតី​អាមេរិក​ដូណាល់ ត្រាំ​បាន​ថ្លែង​សុន្ទរកថា​ទៅ​កាន់​ប្រជាជាតិ​នៅ​ចំពោះ​មុខ​សភាពេញអង្គ។ នៅ​ក្នុង​សសុន្ទរកថា​ដែល​មាន​រយៈពេល​ជាង ១ម៉ោង លោក​ដូណាល់ ត្រាំ​បាន​លើក​យក​ទៅ​និយាយ​នូវ​តុល្យការ​នៃ​ការ​កាន់​តំណែង ១ឆ្នាំ​របស់​លោក​ទាក់ទង​នឹង​នយោបាយ​ផ្ទៃក្នុង​ក៏​ដូច​ជា​នយោបាយ​ការបរទេស។ បន្ទាប់​មក លោក​ត្រាំ​ក៏​បាន​បង្ហាញ​ឲ្យ​ឃើញ​នូវ​ផែនការ​សម្រាប់​ឆ្នាំ​ខាង​មុខៗ។

សូម​ជម្រាប​ជូន​ថា នេះ​ជា​ការ​ថ្លែង​សុន្ទរកថា​លើក​ទី១ របស់​លោក​ដូណាល់ ត្រាំ​ទៅ​កាន់​ប្រជាជាតិ និង​ក៏​ជា​ឱកាស​សំខាន់​ខ្លាំង​ណាស់​សម្រាប់​គ្រប់រូប​ប្រធានាធិបតី​អាមេរិក​ដែល​ត្រូវ​ថ្លែង​ក្នុង​១ឆ្នាំ​ម្តង។

មុន​នឹង​និយាយ​ដល់​ខ្លឹមសារ​នៃ​សុន្ទកថា​របស់​លោក​ដូណាល់ ត្រាំ មាន​ចំណុច​ពិសេស​មួយ​ចំនួន​ដែល​គ្រប់​គ្នា​បាន​ចាប់​អារម្មណ៍ ទី១ លោក​ដូណាល់ ត្រាំ​បាន​ថ្លែង​សុន្ទរកថា​រយៈពេល ១ម៉ោង និង ២៣នាទី ពោល​ច្រើន​ជាង​លោក​បារ៉ាក់ អូបាម៉ា តែ​តិច​ជាង​លោក​ប៊ីល គ្លីនតុន​ដែល​បាន​ថ្លែង​រយៈពេល ១ម៉ោង និង ២៨នាទី។ ចំណែក​ចំណុច​ពិសេស​ទី២ គឺ​ទាក់ទង​នឹង​ការ​និយាយ​ស្តី​របស់​លោក​ដូណាល់ ត្រាំ។ នរណា​ក៏​ដឹង​ដែរ​ថា លោក​ដូណាល់ ត្រាំ​ជា​ប្រធានាធិបតី​អាមេរិក​ទី១ ដែល​ចូលចិត្ត​និយាយ​ច្រើន ពេល​ខ្លះ​និយាយ​ផ្តេសផ្តាស់​ឥតប្រយោជន៍ នឹក​ឃើញ​ចង់​និយាយ​អី គឺ​និយាយ​ភ្លាម​ដោយ​មិន​បាន​ពិចារណា​ថ្លឹងថ្លែង​ជា​មុន ទោះ​បី​នរណា​ខឹង ឬ​មិន​សប្បាយ​ក៏​ដោយ។

ជា​ទូទៅ លោក​ដូណាល់ ត្រាំ​ចូលចិត្ត​បញ្ចេញ​ប្រតិកម្ម​ជា​ភាសា​សរសេរ​នៅ​ក្នុង​ទំព័រ​បណ្តាញសង្គម twitter របស់​លោក​ដែល​គេ​បាន​ឃើញ​សឹង​តែ​រាល់​ថ្ងៃ តាំង​ពី​រឿង​កំប៉ិកកំប៉ុក​រហូត​ដល់​រឿង​ប្រទេសជាតិ។ ក៏​ប៉ុន្តែ និង​អ្វី​ដែល​គេ​បាន​សម្គាល់​ឃើញ​នៅ​ក្នុង​សុន្ទរកថា​ដែល​លោក​ត្រាំ​បាន​ថ្លែង​ជាង ១ម៉ោង​នា​ថ្ងៃ​អង្គារ ទី៣០ មករា លោក​ត្រាំ​បាន​អាន​សុន្ទរកថា​ទាំង​ស្រុង​ដោយ​មិន​មាន​ខ្វះ​ពាក្យពេចន៍ ឃ្លាឃ្លោង​ណា​មួយ​ឡើយ ពោល​ខុស​ពី​ទម្លាប់​សព្វ​មួយ​ដង​ដែល​លោក​ត្រាំ​ចូលចិត្ត​ថែមថយ បញ្ចេញបញ្ចូល។

លោក​ដូណាល់ ត្រាំ​ផ្តោត​លើ​នយោបាយ និង​ឯកភាព​ផ្ទៃក្នុង

នៅ​ក្នុង​សុន្ទរកថា​រយៈពេល ១ម៉ោង និង ២៣នាទី មាន​ជាង​ពាក់​កណ្តាល​ត្រូវ​បាន​លោក​ត្រាំ​ផ្តោត​សំខាន់​លើ​នយោបាយ​ផ្ទៃក្នុង តាំង​ពី​ក្នុង​សំណុំរឿង​សេដ្ឋកិច្ច សង្គម អន្តោប្រវេសន៍ ឬ​សន្តិសុខ​ផ្ទៃក្នុង។ នេះ​អាច​ថា​ជា​រឿង​មួយ​ធម្មតា​សម្រាប់​លោក​ដូណាល់ ត្រាំ​ដែល​គ្រប់​គ្នា​ស្គាល់​ជា​ប្រធានាធិបតី​អាមេរិក​ម្នាក់​ចេញ​មុខ​ការពារ គិត​ផលប្រយោជន៍ជាតិ និង​ពលរដ្ឋ​អាមេរិកាំង​ជា​ធំ ដូច​ដែល​លោក​ធ្លាប់​រម្លឹក​គ្រប់ពេល​នូវ​ឃ្លា​មួយ​ថា « America first »។ ឃ្លា « America first » ដែល​បាន​ធ្វើ​ឲ្យ​លោក​ដូណាល់ ត្រាំ​ជាប់ឆ្នោត​ជា​ប្រធានាធិបតី​អាមេរិក។

លោក​ត្រាំ​បាន​និយាយ​ច្រើន​លើ​លទ្ធផល​ដែល​លោក និង​រដ្ឋបាល​របស់​លោក​សម្រេច​បាន​ក្នុង​រយៈពេល ១ឆ្នាំ​កន្លង​ទៅ ពិសេស​ស្ថានភាព​សុខភាព​សេដ្ឋកិច្ច​ដ៏​ល្អ​ជាមួយ​នឹង​អត្រា​កំណើន​សេដ្ឋកិច្ច ២,៣% ក្នុង​ឆ្នាំ ២០១៧​ដែល​លើស​ឆ្នាំ ២០១៦ ដែល​មាន​ត្រឹម ១,៥%។ លោក​ត្រាំ​បាន​បញ្ជាក់​ថា​ក្នុង​រយៈពេល ១ឆ្នាំ​នៃ​ការ​កាន់​តំណែង​របស់​លោក មាន ២លាន ៤សែន​ការងារ​ត្រូវ​បាន​បង្កើត​ឡើង ហើយ​តម្លៃភាគហ៊ុន​នៅ​ផ្សារភាគហ៊ុន​ចេះ​តែ​ឡើង​ក្រឺតៗ។ បន្ទាប់​មក លោក​ត្រាំ​មិន​ភ្លេច​និយាយ​ពី​ជោគជ័យ​ជា​ប្រវត្តិសាស្រ្ត​នៅ​ក្នុង​កំណែទម្រង់​លើ​ច្បាប់​សារពើពន្ធ​ដែល​បាន​អនុញ្ញាត​ឲ្យ​ក្រុមហ៊ុន រោងចក្រ​អាមេរិក​ទទួល​បាន​ឡើង​វិញ​នូវ​ការ​ប្រកួតប្រជែង។

សំណុំរឿង​រសើប​មួយ​ទៀត គឺ​ទាក់ទង​នឹង​បញ្ហា​អន្តោប្រវេសន៍។ លោក​ត្រាំ​បាន​រម្លឹក​ជា​ថ្មី​ពី​បំណង​ចង់​ផ្តល់​សញ្ជាតិ​អាមេរិកាំង​ឲ្យ​ជនអន្តោប្រវេសន៍​ខុសច្បាប់​ចំនួន ១លាន ៨សែន​នាក់​ដែល​បាន​ចូល​ក្នុង​ទឹកដី​អាមេរិក​តាំង​ពី​ក្នុង​វ័យ​កុមារ។ បន្ទាប់​មក លោក​ត្រាំ​ក៏​មិន​ភ្លេច​និយាយ​ពី​ផែនការ​ចង់​សង់​ជញ្ជាំង​នៅ​តាម​បណ្តោយព្រំដែន​ជា​មួយ​ប្រទេស​ម៉ិកស៊ិច​ដើម្បី​ទប់ស្កាត់​លំហូរ​ជនអន្តោប្រវេសន៍។ លោក​ត្រាំ​ដឹង​ថា​ដើម្បី​អាច​សម្រេច​ផែនការ​នេះ​បាន លោក​ត្រូវ​ការ​កញ្ចប់​ថវិកា​មួយ​ដែល​យល់ព្រម​ដោយ​ក្រុម​អ្នកសាធារណរដ្ឋ និង​ក្រុម​អ្នកប្រជាធិបតេយ្យ។ អ៊ីចឹង​ហើយ​ជា​នៅ​ក្នុង​សុន្ទរកថា លោក​ត្រាំ​មិន​ញញើត​នឹង​បោះដៃ​រក​ក្រុម​ទាំង​ពីរ​ឲ្យ​ទទួល​យក​សំណើ​របស់​លោក​ក្នុង​គោលដៅ​ការពារ​ពលរដ្ឋ​អាមរិកាំង ដោយ​មិន​ប្រកាន់​ដើមកំណើត ព័ណ៌សម្បុរ និង​សាសនា។

កូរ៉េខាងជើង​ជា​បញ្ហា​ប្រឈម​អន្តរជាតិ​ទី១ របស់​លោក​ដូណាល់ ត្រាំ

រឿង​នយោបាយ​ការបរទេស​ក៏​ត្រូវ​បាន​លោក​ដូណាល់ ត្រាំ​ចង​ភ្ជាប់​នឹង​ផលប្រយោជន៍​អាមេរិកាំង។ សម្រាប់​លោក​ត្រាំ អាមេរិក​ត្រូវ​តែ​សើរើ​ពិនិត្យមើល​ឡើង​វិញ​លើ​ជំនួយ ការ​ចំណាយ​ផ្សេងៗ និង​គ្រប់​ទំនាក់ទំនង​របស់​ខ្លួន​នៅ​បរទេស។ លោក​ត្រាំ​ធ្លាប់​បាន​លើក​ឡើង​ច្រើន​ដង​ថា អាមេរិក​មិន​អាច​បន្ត​ឲ្យ​លុយ​អ្នកដទៃ​ដោយ​ល្ងីល្ងើ និង​គ្មាន​ទទួល​បាន​ផលប្រយោជន៍​អ្វី​ត្រឡប់​វិញ​ទៀត​ឡើយ។ អ្វី​ដែល​លោក​ត្រាំ​ចង់​បាន គឺ​ចង់​ឃើញ​ជំនួយ ឬ​ការ​ចំណាយ​របស់​អាមេរិក​នៅ​បរទេស​មាន​គោលដៅ​ច្បាស់លាស់ ផ្តល់​ប្រយោជន៍​ឲ្យ​អាមេរិក ឬ​ក៏​យ៉ាង​ហោចណាស់​ក៏​ទទួល​បាន​ការ​អរគុណ​ដែរ។

មាន​កិច្ចព្រមព្រៀង​អន្តរជាតិ​ខ្លះ​ជាមួយ​បរទេស​ត្រូវ​បាន​លោក​ត្រាំ​ចាត់​ទុក​ជា​កិច្ចព្រមពៀង​ដែល​បាន​ធ្វើ​ឲ្យ​អាមេរិក​បាត់បង់​ប្រយោជន៍​ច្រើន​ណាស់ និង​ចង់​បាន​ការ​ដោះដូរ​ពាណិជ្ជកម្ម​មួយ​ស្មើភាព​ដោយ​គ្មាន​នរណា​កេង​ចំណេញ​លើ​នរណា​ឡើយ។ បន្ទាប់​មក លោក​ត្រាំ​បាន​លើក​ឡើង​ពី​ការ​ដែល​អាមេរិក​កំពុង​ប្រឈម​មុខ​នឹង​របបយូកូម ក្រុម​អង្គការ​ភេរវនិយម គូប្រជែង​ដូច​ចិន និង​រុស្ស៊ី​ដែល​កំពុង​គំរាម​លើ​ផលប្រយោជន៍ សេដ្ឋកិច្ច និង​តម្លៃ​របស់​អាមេរិក។ របប​ដឹកនាំ​តាម​បែប​យូកូម​ដែល​លោក​ត្រាំ​បាន​ចង្អុល​លើ​របបដឹកនាំ​នៅ​កូរ៉េខាងជើង​របស់​លោក​គីម ជុងអ៊ុន និង​ដែល​លោក​ត្រាំ​បាន​ចាត់​ទុក​ជា​បញ្ហា​ប្រឈម​អន្តរជាតិ​ទី១ នៃ​រដ្ឋបាល​របស់​លោក។

សម្រាប់​លោក​ត្រាំ គ្មាន​របប​ដឹកនាំ​ណា​មួយ​ដែល​បាន​គាបសង្កត់​លើ​ពលរដ្ឋ​ខ្លួន​ឯង​យ៉ាង​ព្រៃផ្សៃ​ដូច​នៅ​កូរ៉េខាងជើង​ទេ។ បន្ទាប់​មក លោក​ត្រាំ​ក៏​មិន​ភ្លេច​បរិហារ​លើ​ក្រុម​ប្រទេស​សភាវៈ​អាក្រក់​មួយ​ចំនួន​ដោយ​ផ្តើម​ពី​ប្រទេស​វ៉េណេស៊ុយអេឡា គុយបា និង​ប្រទេស​អ៊ីរ៉ង់។ អ៊ីរ៉ង់​ដែល​លោក​ត្រាំ​បាន​លើក​ទឹកចិត្ត និង​គាំទ្រ​បុព្វហេតុ​របស់​ពលរដ្ឋ​ដើម្បី​សេរីភាព។ ទាក់ទង​នឹង​គុក Guantanamo នៅ​ក្នុង​ទឹកដី​គុយបា​ដ៏​ចម្រូងចម្រាស់​ត្រូវ​បាន​លោក​ត្រាំ​សម្រេច​ឲ្យ​បន្ត​ទុក​សម្រាប់​ឃុំខ្លួន​ពួក​ភេរវជន។ គួរ​រម្លឹក​ថា គុក​មួយ​នេះ​ត្រូវ​បង្កើត​ឡើង​នៅ​ក្រោយ​មហាភេរវកម្ម​ថ្ងៃ១១ កញ្ញា ២០០១ ដោយ​លោក​ប្រធានាធិបតី​អាមេរិក George W. Bush ដើម្បី​ឃុំ​ពួក​អាល់កៃដា។ នៅ​ក្នុង​ជំនាន់​លោក​អូបាម៉ា លោក​អូបាម៉ា​បាន​សម្រេច​បិទ​គុក​នេះ​វិញ តែ​ត្រូវ​បាន​សភា​ជំទាស់​នា​ពេល​នោះ។ ឥឡូវ​នេះ លោក​ត្រាំ​បាន​ចុះ​ហត្ថលេខា​លើ​ក្រិត្យ​មួយ​ឲ្យ​បន្ត​រក្សា​ទុក​ជា​បន្ត​ទៀត៕

អាមេរិកនិងចិន ត្រដាង​ជម្លោះ​ប្រជែង​ឥទ្ធិពល​នៅ​វេទិកា APEC

អាមេរិក​ថា ខ្លួន​មិន​ចង់​ក្លាយ​ជា​បងធំ​ទេ តែ​ចង់​រួមសហការណ៍​ជាមួយ​គ្រប់​ប្រទេស​នៅ​ក្នុង​តំបន់

សិង្ហបុរី៖​អាស៊ាន​ចង់​ឃើញ​សមុទ្រចិនខាងត្បូង​ក្លាយ​ជា​តំបន់​មាន​សន្តិភាព សន្តិសុខ និង​ស្ថិរភាព

សិង្ហបុរី៖​កិច្ចប្រជុំកំពូល​អាស៊ាន​លើក​ទី៣៣ និង​អាស៊ាន​ជាមួយ​ដៃគូ​ចាប់ផ្តើម​ដោយ​គ្មាន​វត្តមាន​លោកដូណាល់ ត្រាំ

បារាំង​ចង់​ជំរុញ​ឱ្យ​មាន​ការចរចា​បង្កើត​ក្រម​ប្រតិបត្តិ​អ៊ីនធ័រនែត

មុន​មកដល់​ប៉ារីស លោក​ដូណាល់ ត្រាំ ប្រើ​ពាក្យ​ធ្ងន់ៗ លើ​លោក​ម៉ាក្រុង

អាមេរិក៖​ហេតុអ្វី​បាន​ជា​លោក​ដូណាល់ ត្រាំ​កំចាត់​លោក Jeff Sessions ពី​តំណែង​រដ្ឋមន្រ្តី​ក្រសួង​យុត្តិធម៌?

អាមេរិក៖​លទ្ធផល​បោះឆ្នោត​ពាក់កណ្តាលអាណត្តិ​បាន​ធ្វើ​ឲ្យ​អាមេរិក​កាន់​តែ​ប្រេះឆាថែមទៀត?

អាមេរិក ៖ ហេតុផលនៃ​ចំណាប់​​អារម្មណ៍​ខ្លាំង​នឹង​ការ​បោះឆ្នោត​ពាក់​កណ្តាល​អាណត្តិ ២០១៨

លោកស៊ី ជីនពីង៖ ១៥​ឆ្នាំទៅមុខ ចិន នឹង​នាំចូល​ទំនិញ តម្លៃ ៣០ ០០០ពាន់លាន​ដុល្លារ

ទីបំផុត ពលរដ្ឋ​នូវែលកាឡេដូនី​មិន​ដាច់ចិត្ត​ផ្តាច់ខ្លួន​ចេញ​ពី​ប្រទេស​បារាំង​ទេ

លោកត្រាំ ប្រកាស​អនុវត្ត​ទណ្ឌកម្ម​ប្រេង​និង​ធនាគារ​លើ​អ៊ីរ៉ង់

៥ឆ្នាំ​​ក្រោយ​​មក ​គេ​នៅ​មិនទាន់​អាច​វែកមុខ​ឃាតករ​​ដែល​សម្លាប់​​អ្នកកាសែត RFI ២នាក់​ក្នុង​ប្រទេស​ម៉ាលី

ការ​ស្រាវជ្រាវ​ថ្មី​បង្ហាញថា ទឹក​សមុទ្រ​បាន​ស្រូប​កំដៅ ច្រើន​លើស​ពីអ្វី​ដែលគេ​ធ្លាប់​ប៉ាន់​ស្មាន

អាមេរិក អំពាវនាវឲ្យ ​ទំលាក់​អាវុធ​នៅយេម៉ែន

ផែនដី​ប្រឈម​នឹង​ការផុត​ពូជសត្វ​ទ្រង់ទ្រាយ​ធំ !

យន្តហោះដឹកអ្នកដំណើរ១៨៩នាក់ របស់ឥណ្ឌូណេស៊ីធ្លាក់ចូលសមុទ្រ

ការបោះឆ្នោតប្រេស៊ីល៖បេក្ខជនប្រធានាធិបតី​​ស្តាំនិយមជ្រុល​ឡើងកូដ ដោយសារ​បណ្តាញ​សង្គម

លោក​Mattis ថា​​ឃាតកម្ម​​លើ​​រូប​លោក​​ខាស្ហូហ្ស៊ី បាន​ធ្វើ​​ឲ្យ​ស្ថានភាព​​ដើមបូព៌ា កាន់តែ​វឹកវរ

អ្នកណា​នឹង​រងគ្រោះ នៅពេល​អាមេរិក​ដកខ្លួន​ចេញពី​សន្ធិសញ្ញា​ស្តីពីអាវុធ​នុយក្លេអ៊ែរ?