វិបត្តិថវិកាអាមេរិក ៖ លោកត្រាំឆ្លងឧបសគ្គទីមួយផុត តែមិនប្រាកដពេលដល់ព្រឹទ្ធសភា
ចុះផ្សាយនៅថ្ងៃ៖
ស្តាប់ - ០៦:០០
លោកដូណាល់ ត្រាំ កំពុងត្រៀមខ្លួនអបអរខួបមួយឆ្នាំគត់នៃការចូលកាន់តំណែងជាប្រធានាធិបតីអាមេរិក នៅថ្ងៃស្អែក ក្នុងបរិបទនៃភាពតានតឹងខ្លាំងផ្នែកថវិកា។ សភាអាមេរិកបានបោះឆ្នោតអនុម័តគម្រោងថវិកាបណ្តោះអាសន្នហើយនៅយប់មិញ ដើម្បីបញ្ចៀសការបិទទ្វារស្ថាប័នរដ្ឋាភិបាលសហព័ន្ធ បង្កឡើងដោយវិបត្តិថវិកាជាប់គាំង។ ប៉ុន្តែគ្រោះហានិភ័យ មន្ត្រីរដ្ឋការអាមេរិកជាច្រើនជួបគ្រោះអត់ការងារធ្វើដោយបង្ខំ នៅតែធំធេងខ្លាំង ព្រោះព្រឹទ្ធសភាអាមេរិកមិនប្រាកដនឹងអាចរកសំឡេងគ្រប់គ្រាន់មកអនុម័តច្បាប់នេះទេ។ ព្រឹទ្ធសភាអាមេរិកមានពេលត្រឹមម៉ោង១២អាធ្រាត្រថ្ងៃសុក្រទី១៩មករានេះប៉ុណ្ណោះ។
សភាអាមេរិកបានបោះឆ្នោតអនុម័តចេញរួច ក្នុងសំឡេងគាំទ្រ២៣០ ទល់នឹងសំឡេងប្រឆាំង១៩៧។ ឥលូវច្បាប់ថវិកា ត្រូវបន្តទៅព្រឹទ្ធសភាទៀត ! គឺនៅទីនោះហើយ ភាពសង្ស័យមានកាន់តែធំ។ បក្សសាធារណរដ្ឋរបស់ត្រាំ មានតំណាងតែ៥២រូបប៉ុណ្ណោះ តែគេត្រូវរកសំឡេងឱ្យគ្រប់៦០ លើ១០០ទើបអនុម័តច្បាប់ថវិកានេះបាន។ ព្រឹទ្ធសភាអាមេរិកមានពេលរហូតយប់ថ្ងៃសុក្រ ត្រឹមម៉ោង១២អាធ្រាត្រ ជាឱសានវាទ សម្រាប់ផ្តល់ភ្លើងខៀវ បើពុំនោះទេរដ្ឋាភិបាលសហព័ន្ធនឹងបិទទ្វារហើយ។
ចំណាប់ថ្នូរនយោបាយ
លោក ដូណាល់ ត្រាំ ដែលបានប្រឹងចេញមុខបញ្ចុះបញ្ចូលសភា ឱ្យព្រមអនុម័តគម្រោងថវិកានេះ ក៏បានទទួលស្គាល់អំពីគ្រោះជាប់គាំងថវិកា ដែលនឹងអាចធ្វើឱ្យស្ថាប័នរដ្ឋត្រូវបិទទ្វារ។ លោកត្រាំបានទម្លាក់កំហុសជាស្រេចទៅហើយទៅលើក្រុមអ្នកប្រជាធិបតេយ្យ។
ចំណែកប្រធានសភា ជាអ្នកសាធារណរដ្ឋលោក ប៉ូល រ៉ាយ៉ាន វិញ បន្ទាប់ពីបានប្រឹងប្រែងខ្លាំងអស់ពេញមួយថ្ងៃព្រហស្បតិ៍ក្នុងការបញ្ចុះបញ្ចូលសមាជិក បានអបអរសរសើរនៅក្នុងសារទ្វីតព្រឹកមិញ សេចក្តីសម្រេចចិត្តដ៏ត្រឹមត្រូវរបស់សភាអាមេរិក និងបានចោទសួរ ថាតើព្រឹទ្ធសភានឹងមានជំហរល្អដូចសភាដែរឬទេ ? ឬក៏បណ្តោយឱ្យប្រទេសធ្លាក់ក្នុងវិបត្តិជាប់គាំងថវិកា ?
ប្រធានបក្សសាធារណរដ្ឋ នៅព្រឹទ្ធសភា បានចោទប្រធានក្រុមអ្នកប្រជាធិបតេយ្យ ប្រចាំព្រឹទ្ធសភាថា កំពុងយកប្រទេសជាចំណាប់ថ្នូរ ! ប្រទេសដែលកំពុងប្រឈមនឹងស្ថានភាពបន្ទាន់ណាស់។
អ្នកប្រជាធិបតេយ្យបានច្រានចោទពាក្យចោទប្រកាន់ទាំងនោះ ហើយអះអាងគម្រោងច្បាប់ថវិកាអនុម័តដោយសភា នឹងទំនងជាត្រូវព្រឹទ្ធសភាទទួលយកមិនបានទេ។
គ្មានជញ្ជាំង គ្មានកិច្ចព្រមព្រៀង
ច្បាប់ថវិកាដែលសភាអាមេរិកទើបបានអនុម័ត នៅយប់មិញនេះ ជាការពន្យារគម្រោងថវិកាឱ្យបានដល់ថ្ងៃទី ១៦កុម្ភៈ២០១៨។ ក្រៅតែពីជាវិធានការបណ្តោះអាសន្ន អ្នកសាធារណរដ្ឋចង់អនុម័តគម្រោងថវិកាឆ្នាំ២០១៨ ដែលបំប៉នខ្លាំងកម្លាំងកងទ័ព។ ការប៉ូវចំណាយយោធាជាចំណែកមួយនៃពាក្យសន្យារបស់លោកត្រាំ ក្នុងយុទ្ធនាការឃោសនាបោះឆ្នោត ព្រោះលោកត្រាំយល់ថាកងទ័ពអាមេរិក មានការបំពាក់អាវុធមិនគ្រប់គ្រាន់ ក្រោយពីបានឆ្លងកាត់សង្គ្រាមអស់រយៈពេលជាង១៦ឆ្នាំ ជាប់គ្នា។
ដើម្បីលួងចិត្តអ្នកប្រជាធិបតេយ្យ អ្នកសាធារណរដ្ឋបានផ្តល់ជាថ្នូរ នូវកម្មវិធីធានារ៉ាប់រងសុខភាពសាធារណៈសម្រាប់កុមារក្រីក្រទុរគត ឬកម្មវិធី« Chip » សម្រាប់រយៈពេល៦ឆ្នាំ។
ប៉ុន្តែសម្រាប់អ្នកប្រជាធិបតេយ្យ ដែលមានសំឡេងភាគតិចនៅក្នុងសភានិងព្រឹទ្ធសភា ចង់ឃើញអាមេរិកផ្តល់ហិរញ្ញវត្ថុយូរអង្វែងដល់កម្មវិធីChip ដោះស្រាយជោគវាសនាជនអន្តោប្រវេសន៍ Dreamers ចំនួន ៦៩ម៉ឺននាក់។ Dreamers ជាអន្តោប្រវេសន៍ រត់មកដល់ដីសហរដ្ឋអាមេរិកតាំងពីនៅវ័យក្មេង ជាកុមារនៅឡើយ តែត្រូវប្រឈមនឹងគ្រោះបណ្តេញចេញទៅវិញ ក្រោយពីមានការរំលាយកម្មវិធី Daca ច្បាប់អន្តោប្រវេសន៍អនុម័តក្រោមរដ្ឋាបាលលោកអូបាម៉ា ដែលបានអនុញ្ញាតឱ្យក្មេងទាំងនោះអាចរស់នៅ និងរកស៊ីធ្វើការដោយស្របច្បាប់នៅអាមេរិកបាន។
ជាទូទៅ អ្នកសាធារណរដ្ឋ បានព្រមព្រៀងទទួលពួកDreamersហើយ ប៉ុន្តែលោក ដូណាល់ ត្រាំ ទាមទារឱ្យភ្ជាប់ជាមួយនូវហិរញ្ញវត្ថុសម្រាប់សាងសង់ជញ្ជាំងជាមួយម៉ិចស៊ិក ព្រមទាំងចាត់វិធានការប្រឆាំងនឹងអន្តោប្រវេសន៍ជាខ្សែ (សុំជួបជុំគ្រួសារ) និងលុបចោលការចាប់ឆ្នោតផ្តល់សំណាងមករស់នៅអាមេរិក។ នៅយប់មិញនេះទៀត លោកត្រាំ បានបញ្ជាក់ជាថ្មី ថាបើគ្មានជញ្ជាំង ក៏គ្មានកិច្ចព្រមព្រៀង។ ឯអ្នកប្រជាធិបតេយ្យបដិសេធដាច់ខាតមិនផ្តល់ហិរញ្ញវត្ថុសង់ជញ្ជាំងឡើយ ព្រោះវាជានិម្មិត្តរូបនៃនយោបាយស្អប់ខ្ពើមគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ