ប៉េរូ ផ្ទុះចលនាបាតុកម្មក្រោយការលើកលែងទោសអតីតប្រធានាធិបតី Fujimori
ចុះផ្សាយនៅថ្ងៃ៖
ស្តាប់ - ០៦:៥០
បាតុកម្មរបស់ប្រជាពលរដ្ឋប៉េរូ មិនបានថមថយទេ ! តាំងពីពីរថ្ងៃមកនេះ បាតុកររាប់ពាន់នាក់ បានប្រមូលផ្តុំគ្នានៅកណ្តាលក្រុងលីម៉ា ស្រែកទាមទារឱ្យប្រធានាធិបតីកាន់អំណាចចុះចេញពីតំណែង ខ្លះកាន់បដា ខ្លះកាន់រូបថតជនរងគ្រោះ ... បាតុកម្មនេះបានផ្ទុះឡើង បន្ទាប់ពីលោក Kuczynski ប្រធានាធិបតីកំពុងកាន់អំណាច បានប្រកាសលើកលែងទោស លោក Fujimori អតីតប្រធានាធិបតីប៉េរូ ដែលតុលាការកាត់ទោសឱ្យជាប់ពន្ធនាគារ ២៥ឆ្នាំ ពីបទពុករលួយនិងបទឧក្រិដ្ឋកម្មប្រឆាំងមនុស្សជាតិ។
លោក អាល់បែរតូ ហ្វូជីម៉ូរី Alberto Fujimori ជានរណា ?
កើតនៅឆ្នាំ១៩៣៨ ដើមកំណើតជប៉ុន លោក ហ្វូជីម៉ូរី ជាប្រធានាធិបតីប៉េរូ ពីឆ្នាំ ១៩៩០ដល់ឆ្នាំ២០០០។ លោកជាប្រធានាធិបតីដ៏ចម្រូងចម្រាសសម្រាប់ប្រវត្តិសាស្ត្រសម័យថ្មីរបស់ប៉េរូ។ សម្រាប់ពលរដ្ឋប៉េរូខ្លះ លោក ហ្វូជីម៉ូរី ជាមេដឹកនាំពុករលួយ មានបាតដៃប្រលាក់ឈាម ដោយបានបង្កើតកងពលយោធាសម្លាប់មនុស្ស អស់២៥នាក់ នៅពេលធ្វើសង្គ្រាមជាមួយពួកម៉ៅនិយម។ ប៉ុន្តែសម្រាប់អ្នកខ្លះផ្សេងទៀត លោកជាប្រធានាធិបតីដែលបានស្តារស្ថិរភាពសេដ្ឋកិច្ចជូនជាតិ បានបិទបញ្ចប់បដិវត្តបង្ហូរឈាមរបស់ពួកចលនាម៉ៅនិយម Sentier Lumineux។
ស្នាដៃនេះ បានធ្វើលោក ហ្វូជីម៉ូរី ជាប់ឈ្មោះជាបុរសខ្លាំងប្រចាំទ្វីបអាមេរិកខាងត្បូង ពីសំណាក់ទស្សនាវដ្តី Times នាឆ្នាំ១៩៩៣។ លោកបានជាប់ឆ្នោតជាប្រធានាធិបតីអាណត្តិទីពីរ នៅប៉េរូ ក្នុងឆ្នាំ ១៩៩៥ ជាមួយនឹងសំឡេងគាំទ្រ៦៤%។ នៅឆ្នាំ២០០០ លោកបានជាប់ឆ្នោតជាលើកទីបី ប៉ុន្តែដោយមានភស្តុតាងពុករលួយ សភាប៉េរូបានបោះឆ្នោតទម្លាក់រូបលោកចេញវិញ ហើយលោក ហ្វូជីម៉ូរី ក៏បានរត់គេចទៅប្រទេសជប៉ុន ជាស្រុកកំណើតរបស់ឪពុកម្តាយ។
លីម៉ាបានប្រឹងចរចាជាមួយតូក្យូ ដើម្បីធ្វើបត្យាប័នលោក ហ្វូជីម៉ូរី តែមិនសម្រេច។ រហូតដល់ឆ្នាំ២០០៥ នៅពេលលោកធ្វើដំណើរមកឈីលី ទើបប្រទេសនេះចាប់បញ្ជូនមកឱ្យប៉េរូ នៅឆ្នាំ២០០៧ ដើម្បីអនុវត្តទោសជាប់ពន្ធនាគារចំនួន ២៥ឆ្នាំ ពីបទពុករលួយ និងឧក្រិដ្ឋកម្មប្រឆាំងមនុស្ស (ពេលធ្វើសង្គ្រាមជាមួយពួកឆ្វេងជ្រុលនិយម Sentier Lumineux)។
ហើយនៅល្ងាចថ្ងៃអាទិត្យ មួយថ្ងៃមុនបុណ្យណូអែល ប្រធានាធិបតីកាន់អំណាច លោក គូហ្ស៊ីនស្គី Pedro Pablo Kuczunski បានចេញប្រកាសលើកលែងទោស អតីតប្រធានាធិបតីហ្វូជីម៉ូរី ដោយមូលហេតុសុខភាព។ លោក ហ្វូជីម៉ូរី កំពុងមានជំងឺជាទម្ងន់និងបានបញ្ជូនទៅសម្រាកនៅព្យាបាលក្នុងមន្ទីរពេទ្យ។
ល្បែងនយោបាយ ?
ពលរដ្ឋប៉េរូប្រមាណ៦៥% ក៏ចង់ឱ្យមានការដោះលែងអតីតប្រធានាធិបតី ហ្វូជីម៉ូរីដែរ នេះបើយោងការស្ទង់មតិ ! ប្រធានាធិបតីកាន់អំណាចលើកលែងទោស ក្នុងថ្ងៃបុណ្យណូអែល ចូលឆ្នាំ ដល់អ្នកទោស ជារឿងធម្មតាទេ ! ប៉ុន្តែបញ្ហារបស់ប្រទេសប៉េរូ គឺសេចក្តីប្រកាសលើកលែងទោស ក្រោមហេតុផលសុខភាពនេះ ត្រូវបានគេមើលឃើញថាមានលក្ខណៈនយោបាយខ្លាំង និងជាពិសេសគឺដើម្បីរក្សាអំណាចរបស់លោកប្រធានាធិបតីខ្លួនឯងប៉ុណ្ណោះ។
លោក គូហ្ស៊ីនស្គី ទើបបានឈ្នះឆ្នោតប្រធានាធិបតី កាលពីឆ្នាំ ២០១៦ ដោយបានយកឈ្នះដាច់ លើគូប្រជែង កៃកូ ហ្វូជីម៉ូរី ជាកូនស្រី របស់លោកអតីតប្រធានាធិបតី អាល់បែរតូ ហ្វូជីម៉ូរី ដោយសារតែពាក្យឃោសនា សន្យាមិនលើកលែងទោសឱ្យ លោក ហ្វូជីម៉ូរីដាច់ខាត។ តែថ្ងៃនេះលោកបែរជាសុខចិត្តក្បត់ពាក្យសំដីខ្លួនទៅវិញ ! ព្រោះអ្វី ?
សេចក្តីប្រកាសលើកលែងទោស ប្រព្រឹត្តទៅតែបីថ្ងៃក្រោយការបោះឆ្នោតសភាតែប៉ុណ្ណោះ ! កាលពីថ្ងៃព្រហស្បតិ៍សភាប៉េរូ បានរៀបចំការបោះឆ្នោត ដកទំនុកចិត្តពី លោក ប្រធានាធិបតីកាន់អំណាច តែត្រូវបានសមាជិកសភាបក្សប្រឆាំង១០រូប ក្នុងនោះមានម្នាក់ជាកូនប្រុសរបស់លោកហ្វូជីម៉ូរីផង បានបោះឆ្នោតអនុប្បវាទ ទើបធ្វើឱ្យលទ្ធផលឆ្នោតប្តូរផ្លាស់ មិនអាចទម្លាក់លោក គូហ្ស៊ីនស្គីបាន។
ហេតុដូច្នេះហើយបានជាបាតុករប៉េរូ យល់ថាការលើកលែងទោសនេះ មិនមែនដើម្បីអតីតប្រធានាធិបតីនេះទេ តែតាមការពិតទំនងជាមានការចរចាដោះដូរគ្នារវាងលោក គូហ្ស៊ីនស្គី ជាមួយសមាជិកសភាបក្សកម្លាំងប្រជាជន (បក្សប្រឆាំងដឹកនាំដោយលោកស្រី កៃកូ ហ្វូជីម៉ូរី) មួយក្រុមតូច ជាថ្នូរនឹងសំឡេងឆ្នោតអនុប្បវាទ នៅពេលបោះឆ្នោតដកទំនុកចិត្តប្រធានាធិបតី។
ល្បែងតែងនឹងរេ
ផលវិបាកជាក់ស្តែង គឺភាពតានតឹងខ្លាំងនៅក្រុងលីម៉ា ដោយហេតុតែចលនាបាតុកម្ម តាំងពីពីរថ្ងៃមកហើយ បាតុករបាននាំគ្នាទៅប្រមូលផ្តុំនៅមុខផ្ទះប្រទេសធានាធិបតី និងនៅមុខវិមានប្រធានាធិបតី រហូតដល់ថ្នាក់ប្រើគ្រាប់បែកផ្សែង ដើម្បីបំបែកនិងបង្ក្រាបចលនាបាតុកម្មផង។ ក្រុមគ្រួសារជនរងគ្រោះ បានប្រកាសចេតនាចង់ធ្វើបណ្តឹងឧទ្ធរណ៍ទៅស្ថាប័នអន្តរជាតិ ដើម្បីលុបសេចក្តីលើកលែងរបស់ប្រធានាធិបតី ហើយអាចនាំលោក ហ្វីជីម៉ូរ៉ូ ចូលពន្ធនាគារដើម្បីបញ្ចប់ទោស។
លើផ្នែកនយោបាយវិញ លោកប្រធានាធិបតីកាន់អំណាចនឹងកាន់តែចុះខ្សោយ ! ភាពរង្គោះរង្គើក្នុងរង្វង់បក្សកាន់អំណាច ក៏ចាប់ផ្តើម ! សមាជិកសភារបស់បក្សកាន់អំណាចបីនាក់ បាននាំគ្នាដើរចេញពីបក្សរបស់លោកប្រធានាធិបតី ធ្វើឱ្យបក្សនេះមានគ្នាកាត់តែតិចនៅក្នុងសភា។ អនុរដ្ឋមន្ត្រីក្រសួងសិទ្ធិមនុស្ស បានលាលែងចេញពីតំណែង ! នឹងមានការរុះរើរដ្ឋាភិបាល នៅក្នុងពេលដ៏ខ្លីខាងមុខ ដោយត្រូវផ្តុំរំពឹងតែលើកម្លាំងមនុស្សជំនិតដែលមានកាន់តែតិចទៅៗ។
អ្នកដែលអាចទាញប្រយោជន៍បានអំពីហេតុការណ៍នេះ គឺលោក គីនជី ហ្វូជីម៉ូរី ជាសមាជិកសភាបក្សប្រឆាំង និងជាកូនប្រុសរបស់លោកអតីតប្រធានាធិបតីហ្វូជីម៉ូរី ដែលបានប្រឹងធ្វើគ្រប់យ៉ាង ហ៊ានជំនះលើបងស្រីទៀតដើម្បីសេរីភាពឪពុក។ តើនេះមិនមានន័យថា លោក គីនជី ហ្វូជីម៉ូរី កំពុងបញ្ជាក់កាន់តែច្បាស់ អំពីមហិច្ឆតាចង់ក្លាយជាប្រធានាធិបតីប៉េរូដែរទេឬ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ