សហរដ្ឋអាមេរិកនិងតួកគីប្រកាសសង្គ្រាមទិដ្ឋាការ
ចុះផ្សាយនៅថ្ងៃ៖
ស្តាប់ - ០៥:២០
ទំនាក់ទំនងការទូតរវាងសហរដ្ឋអាមេរិក និងតួកគី ដែលជាសមាជិកសម្ព័ន្ធអូតង់ កំពុងចុះដុនដាបខ្លាំងឡើងៗ។ ជាវិបត្តិដ៏ធ្ងន់ធ្ងរមិនធ្លាប់មានទេ ! នៅល្ងាចថ្ងៃអាទិត្យ ប្រទេសទាំងពីរបានប្រកាសផ្អាកការផ្តល់ទិដ្ឋាការ ដល់គ្នាទៅវិញទៅមក ដោយគ្មានពេលកំណត់។ ភាពតានតឹងការទូតនេះ បានធ្វើឱ្យទីផ្សារភាគហ៊ុនតួកគីដាំក្បាលចុះយ៉ាងខ្លាំង។ ហើយលុយតួកគីក៏បានបន្តបាត់បង់តម្លៃឥតឈប់ ជាហេតុធ្វើឱ្យអាជ្ញាធរតួកគីព្រួយបារម្ភខ្លាំង និងបានអំពាវនាវឱ្យអាមេរិកលុបវិធានការនេះចោលវិញ។
ស្ថានទូតអាមេរិកប្រចាំទីក្រុងអង់ការ៉ា ជាអ្នកផ្តើមមុន នៅយប់មិញ ដោយបានបានចេញសេចក្តីថ្លែងការណ៍ ផ្អាកការផ្តល់ទិដ្ឋាការ គ្រប់ប្រភេទទាំងអស់ ដល់តួកគី លើកលែងតែទិដ្ឋាការសម្រាប់ជនអន្តោប្រវេសន៍ ដែលសុំស្នាក់នៅជាអចិន្ត្រៃយ៍ នៅអាមេរិក ឬដែលកំពុងសុំសញ្ជាតិអាមេរិក។ មានន័យថាអាមេរិកលែងផ្តល់ទិដ្ឋាការ សម្រាប់រាល់គ្រប់ការស្នើសុំទៅអាមេរិក ក្នុងក្របខ័ណ្ឌ ទេសចរណ៍ ការងារ ជំនួញ សិក្សា ឬព្យាបាលជំងឺ ... ។ល។ និង។ល។
ការផ្អាកផ្តល់ទិដ្ឋាការនេះ ដើម្បីកាត់បន្ថយចំនួនអ្នកសុំចូលស្ថានទូតអាមេរិក នៅទូទាំងប្រទេសតួកគី ត្រូវចូលជាធរមានភ្លាមតែម្តង និងសម្រាប់រយៈកាលមួយដោយគ្មានការកំណត់ ដើម្បីទុកពេលឱ្យរដ្ឋាបាលអាមេរិក មានពេលពិចារណាឡើងវិញសិន។
សេចក្តីថ្លែងការណ៍តបដូចគ្នាបេះដាក់
គ្រាន់បានឮនិងឃើញសេចក្តីថ្លែងការណ៍របស់ស្ថានទូតអាមេរិក ប្រមាណតែប៉ុន្មានម៉ោង ស្ថានទូតតួកគីប្រចាំទីក្រុងវ៉ាស៊ីនតោន បានចេញសេចក្តីថ្លែងការណ៍ដែរ ប្រកាសផ្អាកសេវាកម្មផ្តល់ទិដ្ឋាការ គ្រប់ប្រភេទដល់ពលរដ្ឋអាមេរិក រាប់ទាំងទិដ្ឋាការសុំតាមប្រព័ន្ធអ៊ីនធ័រនែត និងសុំនៅតាមព្រំដែន។
ក្នុងន័យចំអក តួកគីបានចេញសេចក្តីថ្លែងការណ៍ពីរបន្តបន្ទាប់គ្នា ! ក្នុងទម្រង់ខ្លឹមសារ ដូចគ្នាស្ទើរបេះបិទ នឹងសេចក្តីថ្លែងការណ៍អាមេរិក ដោយគ្រាន់តែប្តូរឈ្មោះប្រទេស។ និងទីពីរ ក្នុងអត្ថន័យលម្អិតវិធានការដែលមានលក្ខណៈតឹងតែងជាងចំណាត់ការរបស់អាមេរិកទៅទៀត ៖ ពោលគឺ មិនមែនតែស្ថានកុងស៊ុលនៅអាមេរិកទេដែលលែងផ្តល់ទិដ្ឋាការនោះ តួកគីបានសម្រេចផ្អាកសុពលភាពនៃទិដ្ឋាការ ដែលគេចេញឱ្យបិទលើលិខិតឆ្លងដែន ទិដ្ឋាការអេឡិចត្រូនិក និងទិដ្ឋាការសុំបាននៅតាមច្រកព្រំដែនគោក នៅតួកគីដោយផ្ទាល់ទៀត។
ការចាប់ខ្លួនជាដើមហេតុ
អាមេរិកបានពន្យល់អំពីមូលហេតុនៃការផ្អាកទិដ្ឋាការនៅក្នុងសេចក្តីថ្លែងការណ៍របស់ខ្លួនថា “ហេតុការណ៍ដែលទើបកើតឡើងនាពេលថ្មីៗនេះ បានបង្ខំឱ្យរដ្ឋាភិបាលអាមេរិកពិនិត្យឡើងវិញអំពីសកម្មភាពរបស់រដ្ឋាភិបាលតួកគី ក្នុងការការពារសន្តិសុខនៃបេសកកម្មទូត និងសន្តិសុខរបស់បុគ្គលិកអាមេរិក លើទឹកដីតួកគី”។
ប៉ុន្តែមូលហេតុពិតអាចមានវែងឆ្ងាយ ! សេចក្តីសម្រេចផ្អាកទិដ្ឋាការនេះ កើតឡើងក្រោយពីមានការចាប់ខ្លួនឃុំឃាំងជាបណ្តោះអាសន្ន បុគ្គលិកស្ថានកុងស៊ុលអាមេរិកប្រចាំទីក្រុងអ៊ីស្តង់ប៊ូលម្នាក់ កាលពីថ្ងៃពុធ ក្រោមសេចក្តីសម្រេចរបស់តុលាការអ៊ីស្តង់ប៊ូល ពីបទសង្ស័យ មានជាប់ពាក់ព័ន្ធ ជាមួយនឹងប្រមុខសាសនា Fethullah Gülen។ និទេសខ្លួននៅសហរដ្ឋអាមេរិកប្រមុខសាសនារូបនេះ ត្រូវបានអាជ្ញាធរតួកគី ចាត់ទុកជាមេក្លោងដឹកនាំធ្វើរដ្ឋប្រហារមិនសម្រេចកាលពីខែកក្កដា២០១៦។ រដ្ឋប្រហារដែលបានសម្លាប់ជីវិតមនុស្សអស់២៤០នាក់ ចាប់ខ្លួនជាង៥ម៉ឺននាក់ និង១៥ម៉ឺននាក់ព្យួរការងារ។
សេចក្តីសម្រេចរបស់តុលាការតួកគីចាប់ខ្លួនមន្ត្រីទូតអាមេរិកដើមកំណើតតួកគី ត្រូវបានវ៉ាស៊ីនតោន ធ្វើការថ្កោលទោស និងចាត់ទុកជាសេចក្តីសម្រេចដែលគ្មានមូលដ្ឋាន និងដែលបង្កការខូចខាតខ្លាំងដល់ប្រទេសទាំងពីរ ក្នុងនាមជាសមាជិកសម្ព័ន្ធអូតង់តែមួយ។
គម្លាតកាន់តែឆ្ងាយរវាងអាមេរិកនិងតួកគី
ឯខាងតួកគីវិញ ក៏ពន្យល់ដូចគ្នា ដោយស្រង់ឃ្លារបស់អាមេរិកមកទាំងស្រុង គ្រាន់តែប្តូរឈ្មោះប្រទេសប៉ុណ្ណោះ។ តែតាមការពិត តួកគីខឹងសម្បារខ្លាំងនឹងសហរដ្ឋអាមេរិក។ តាំងពីលោកត្រាំ ឡើងកាន់តំណែងមក រដ្ឋាភិបាលអង់ការ៉ា សង្ឃឹមថាទំនាក់ទំនងតួកគីអាមេរិកនិងបានប្រសើរ។ តួកគីបានដាក់សម្ពាធលើរដ្ឋាភិបាលវ៉ាស៊ីនតោន ដើម្បីធ្វើបច្ចាប័ន ប្រមុខសាសនាGülen ពីរដ្ឋប៉ែនស៊ីវ៉ានីមកតួកគីវិញ ជាថ្នូរនឹងការដោះលែងគ្រូគង្វាលសាសនាអាមេរិកម្នាក់ចាប់ខ្លួននៅតួកគីកាលពីខែតុលា២០១៦។ ប៉ុន្តែគ្មានចម្លើយវិជ្ជមានហើយ អាមេរិកបានគាំទ្រពួកគួដឌីស្ថាននៅស៊ីរី ដែលអង់ការ៉ាចាត់ទុកជាបណ្តាញភេរវនិយមទៀត។ ជាចុងក្រោយ និងកាន់តែងំខ្លាំងទៀតសម្រាប់ប្រធានាធិបតីតួកគី គឺអាមេរិកទើបបានធ្វើការចោទប្រកាន់អង្គរក្សរបស់លោក ពីបទបានប្រើអំពើហិង្សាលើបាតុករ នាដំណើរទស្សនកិច្ចផ្លូវការរបស់លោកអ៊ែរដូហ្កាននៅសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ