ប្រធានាធិបតី អ៊ីរ៉ង់៖ ទោះដូណាល់ ត្រាំ ១០នាក់ ក៏មិនអាចប្រែក្រឡាស់កិច្ចព្រមព្រៀងស្តីពីនុយក្លេអ៊ែរ
ប្រធានាធិបតី អ៊ីរ៉ង់ លោកហាសាន់ រ៉ូហានី នៅថ្ងៃសៅរ៍ម្សិលមិញ បានចេញមុខការពារកិច្ចព្រមព្រៀង អន្តរជាតិស្តីពីនុយក្លេអ៊ែរអ៊ីរ៉ង់ ដែលប្រទេសមហាអំណាចសម្រេចចុះបានជាមួយអ៊ីរ៉ង់ កាលពីឆ្នាំ ២០១៥។ ប្រធានាធិបតី អាមេរិក លោកដូណាល់ ត្រាំធ្លាប់បានគំរាម ចង់ប្តូរជំហររបស់អាមេរិក ទៅលើកិច្ចព្រមព្រៀងនុយក្លេអ៊ែរអ៊ីរ៉ង់ ប៉ុន្តែ នៅថ្ងៃម្សិលមិញ លោកហាសាន់ រ៉ូហានី បានវាយតម្លៃថា ប្រធានាធិបតីអាមេរិក ដូណាល់ ត្រាំមិនអាចលុប បំផ្លាញចោលកិច្ចព្រមព្រៀងបាននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
“ទោះមានដូណាល់ ត្រាំ ១០នាក់ផ្សេងទៀត នៅក្នុងលោក ក៏គេមិនអាចត្រលប់ទៅកែប្រែកិច្ចព្រមព្រៀងអន្តរជាតិស្តីពីនុយក្លេអ៊ែរអ៊ីរ៉ង់បានដែរ។” នេះជាប្រសាសន៍របស់ប្រធានាធិបតីអ៊ីរ៉ង់ នៅក្នុងពិធីជួបជុំនៅក្នុងសកលវិទ្យាល័យ មួយ ក្នុងទីក្រុងតេហេរ៉ង់។
តាមលោកប្រធានាធិបតី ហាសាន់ រ៉ូហានី ទាំងក្នុងពេលចរចា និងនៅក្នុងកិច្ចព្រមព្រៀង គ្រប់ភាគីបានយល់ស្របគ្នារួចហើយ លើចំណុច និងផលប្រយោជន៍ ដែលគេមិនអាចសើរើ កែប្រែក្រឡាស់បាន។ ដូច្នេះ សម្រាប់ប្រធានាធិបតីអ៊ីរ៉ង់ ប្រធានាធិបតី អាមេរិក លោកដូណាល់ ត្រាំ មិនអាចទៅបំផ្លាញចោលកិច្ចព្រមព្រៀងបាននោះទេ។
លោកហាសាន់ រ៉ូហានីបានលើកឡើងយ៉ាងដូច្នេះ នៅក្រោយ ដំណឹងលេចលឺដែលថា លោកដូណាល់ ត្រាំ នឹងប្រកាសលែងទទួលស្គាល់កិច្ចព្រមព្រៀងនុយក្លេអ៊ែរ ដែលលោកដូណាល់ ត្រាំ រិះគន់ថា ជាកិច្ចព្រមព្រៀងដ៏អាក្រក់បំផុត បន្សល់ទុកដោយអាណត្តិលោកអូបាម៉ា។ ពីពេលនេះរហូតដល់ថ្ងៃទី ១៥តុលាលោកដូណាល់ ត្រាំ ត្រូវប្រកាសឲ្យគេដឹងពីជំហររបស់លោក ទៅលើកិច្ចព្រមព្រៀងនុយក្លេអ៊ែរអ៊ីរ៉ង់។ តាមការចុះផ្សាយរបស់កាសែតអាមេរិកាំង លោកដូណាល់ ត្រាំ ត្រៀមខ្លួនរួចហើយដើម្បីប្រកាសថា អ៊ីរ៉ង់មិនគោរពកិច្ចព្រមព្រៀង។ ជំហររបស់លោកដូណាល់ ត្រាំ ខុសផ្ទុយ ពីទីភ្នាក់ងារអន្តរជាតិផ្នែកថាមពលនុយក្លេអ៊ែរ AIEA ដែលបានបញ្ជាក់ថា អ៊ីរ៉ង់ បានគោរពធ្វើតាមកិច្ចព្រមព្រៀង។
ការបរិហាររបស់លោកដូណាល់ ត្រាំ នឹងបើកផ្លូវឲ្យសភាអាមេរិក (ក្នុងរយៈពេល ៦០ឆ្នាំ) មានសិទ្ធិបោះឆ្នោត ដើម្បីសម្រេចដាក់ឡើងវិញ ទណ្ឌកម្មសេដ្ឋកិច្ចទៅលើអ៊ីរ៉ង់ ដែល អាមេរិកបានដកចេញ នៅក្រោយរកឃើញកិច្ចព្រមព្រៀងនុយក្លេអ៊ែរជាមួយអ៊ីរ៉ង់ នៅឆ្នាំ ២០១៥។ ជំហរផ្លាស់ប្តូររបស់រដ្ឋបាលអាមេរិកទៅលើកិច្ចព្រមព្រៀងនុយក្លេអ៊ែរអ៊ីរ៉ង់ កំពុងធ្វើឲ្យប្រទេសមហាអំណាចផ្សេងទៀត ដែលចូលរួម នៅក្នុងការចរចា នៅទីក្រុងវីយ៉ែន កើតក្តីព្រួយបារម្ភ។ ការចង់ត្រលប់ទៅដាក់ទណ្ឌកម្មសេដ្ឋកិច្ចលើអ៊ីរ៉ង់ មិនត្រឹមតែប៉ះពាល់ដល់ផលប្រយោជន៍សេដ្ឋកិច្ច ដែលបានមកពីកិច្ចព្រមព្រៀង តែប៉ុណ្ណោះទេ ប៉ុន្តែ វានឹងលើកទឹកចិត្ត ផងដែរ ឲ្យអ៊ីរ៉ង់ត្រូវត្រលប់ទៅជំរុញកម្មវិធីនុយក្លេអ៊ែរយោធា ដើម្បីក្លាយជាមហាអំណាចនុយក្លេអ៊ែរ មួយទៀត ដូចកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ