ធនាគារពិភពលោក៖ការបញ្ជូនលុយទៅកាន់ប្រទេសក្រីក្រនឹងកើនឡើងក្នុងឆ្នាំ ២០១៧
នៅថ្ងៃអង្គារ ទី៣ តុលា ធនាគារពិភពលោកបានចេញផ្សាយរបាយការណ៍មួយស្តីពីទំហំលុកកាក់ដែលប្រជាជនរស់នៅបរទេសបានផ្ញើទៅឲ្យក្រុមគ្រួសាររបស់ពួកគេរស់នៅក្នុងប្រទេសកំណើត ពិសេសក្នុងប្រទេសក្រីក្រដែលប្រាក់បៀវត្សមានកម្រិតទាប និងមធ្យម។ តាមរបាយការណ៍ ការផ្ទេរប្រាក់ដែលជាប្រភពចំណូលយ៉ាងសំខាន់សម្រាប់ប្រទេសក្រីក្រនឹងមានការកើនឡើងក្នុងឆ្នាំ ២០១៧ នេះ បន្ទាប់ពីមានការធ្លាក់ចុះរយៈពេល ២ឆ្នាំជាប់ៗគ្នាកន្លងមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
តាមរបាយការណ៍របស់ធនាគារពិភពលោក ចំនួនទឹកប្រាក់ដែលបញ្ជូនទៅកាន់ប្រទេសក្រីក្រសម្រាប់ឆ្នាំ ២០១៧ នឹងមានការកើនឡើង ៤,៨% ពោលនឹងមានទឹកប្រាក់សរុបចំនួន ៤៥០ ០០០លានដុល្លារ។ ស្ថានភាពសេដ្ឋកិច្ចល្អនៅក្នុងប្រទេសរុស្ស៊ី ក្នុងប្រទេសអឺរ៉ុប ឬមួយនៅអាមេរិកឆ្នាំ ២០១៧ នេះបានអនុញ្ញាតឲ្យប្រជាជនរស់នៅក្នុងប្រទេសទាំងនេះអាចបញ្ជូនលុយបន្ថែមទៀតទៅឲ្យក្រុមគ្រួសាររបស់ពួកគេរស់ក្នុងប្រទេសកំណើត ពិសេសនៅអាហ្រ្វិកស៊ុបសាហារ៉ា អាស៊ីកណ្តាល អាមេរិកឡាទីន និងនៅក្នុងបណ្តាប្រទេសអឺរ៉ុបក្រីក្រមួយចំនួន។
ដោយឡែក ការធ្លាក់ថ្លៃតម្លៃប្រេងឆៅនៅក្នុងបណ្តាប្រទេសជង្រុកប្រេងឆៅនៅក្នុងតំបន់ឈូងសមុទ្រពែក្សបានធ្វើឲ្យរដ្ឋអំណាចក្នុងប្រទេសទាំងនោះផ្អាកទទួលយកពលករបរទេស ពិសេសពីអាស៊ីអាគ្នេយ៍។ ការផ្អាកនេះបានធ្វើឲ្យធ្លាក់ចុះជាស្វ័យប្រវត្តិនូវបរិមាណទឹកប្រាក់ដែលបានបញ្ជូនទៅកាន់ប្រទេសនៅអាស៊ីអាគ្នេយ៍។ លោកឌីលីប រ៉ាត្ថា អ្នករៀបចំរបាយការណ៍របស់ធនាគារពិភពលោកបានអះអាងថា ការបញ្ជូនលុយរបស់អ្នកនៅបរទេសទៅកាន់ប្រទេសកំណើតជាប្រភពចំណូលយ៉ាងសំខាន់សម្រាប់ក្រុមប្រទេសកំពុងអភិវឌ្ឍន៍។
តែអ្វីដែលលោកឌីលីប រ៉ាត្ថាមានការសោកស្តាយខ្លាំងនោះ គឺតម្លៃសេវាផ្ទេរប្រាក់ដែលនៅមានកម្រិតថេរ តែដូចជាខ្ពស់បន្តិច។ ឧទាហរណ៍ អ្នកផ្ទេរលុយចំនួន ២០០ដុល្លារត្រូវបង់ថ្លៃសេវាផ្ទេរដល់ទៅ ជិត ១៥ដុល្លារ។ នៅក្នុងន័យនេះ លោកឌីលីបបានអំពាវនាវដល់ប្រទេសពាក់ព័ន្ធឲ្យបញ្ចុះតម្លៃសេវាផ្ទេរលុយទៅកាន់ប្រទេសក្រីក្រ។ តាមរបាយការណ៍ដដែល ឥណ្ឌាជាប្រទេសដែលទទួលបានលុយពីពលរដ្ឋខ្លួននៅបរទេសច្រើនជាងគេក្នុងឆ្នាំ ២០១៧ នេះ ពោលមានទឹកប្រាក់ដល់ទៅ ៦៥ ០០០លានដុល្លារ។
បន្ទាប់មកចិនមានចំនួន ៦១ ០០០លានដុល្លារ ហ្វីលីពីនចំនួន ៣៣ ០០០លានដុល្លារ និងម៉ិចស៊ិកចំនួន ៣១ ០០០លានដុល្លារ។ ធនាគារពិភពលោកប្រមើលមើលថា ការផ្ទេរលុយទៅកាន់ប្រទេសក្រីក្រនឹងបន្តកើនឡើងនៅឆ្នាំ ២០១៨ ក្នុងកម្រិត ៣,៥% ពោលនឹងមាន ៤៦៦ ០០០លានដុល្លារ។ តែបើបូករួមទាំងការផ្ទេរលុយទៅកាន់បរទេស គិតទាំងប្រទេសក្រីក្រ និងប្រទេសអ្នកមាននឹងអាចកើនពី ៥៩៦ ០០០លានដុល្លារក្នុងឆ្នាំ ២០១៧ ទៅ ៦១៦ ០០០លានដុល្លារនៅឆ្នាំ ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ