លោកអូបាម៉ាធ្លាប់ព្រមានថៅកែហ្វេសប៊ុកពីឥទ្ធិពលរុស្ស៊ីក្នុងបណ្តាញសង្គម
សារព័ត៌មាន វ៉ាស៊ីនតោន ប៉ុស្តិ៍ បានចុះផ្សាយនៅថ្ងៃអាទិត្យម្សិលមិញ ថាអតីតប្រធានាធិបតីអាមេរិក ធ្លាប់ប្រាប់ផ្ទាល់មាត់ ទៅលោកMark Zuckerberg ជាថៅកែហ្វេសប៊ុក អោយប្រុងប្រយ័ត្នពីការជ្រៀតជ្រែករបស់រុស្ស៊ី តាមរយៈបណ្តាញសង្គម ដើម្បីអុកឡុកការបោះឆ្នោតប្រធានាធិបតីអាមេរិក។ ការប្រាប់ផ្ទាល់មាត់នេះ ធ្វើឡើងតាំងតែ២ខែ មុនពេលលោកដូណាល់ ត្រាំ ស្បថឡើងកាន់អំណាចម្ល៉េះ។ ហ្វេសប៊ុកទើបនឹងយល់ព្រមសហការជាមួយសភាអាមេរិក ក្នុងក្របខណ្ឌស៊ើបអង្កេតពីការលូកដៃរុស្ស៊ីក្នុងការបោះឆ្នោតអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
យោងតាមការចុះផ្សាយរបស់កាសែតវ៉ាស៊ីនតោន ប៉ុស្តិ៍ ថៅកែហ្វេសប៊ុក គឺលោក Mark Zuckerberg ធ្លាប់ត្រូវបានប្រធានាធិបតីអូបាម៉ា អាណត្តិមុន ព្រមានផ្ទាល់មាត់រួចមកហើយ តាំងពីឆ្នាំទៅមិញ អោយប្រយ័ត្នប្រយែងអោយមែនទែន ពីការជ្រៀតជ្រែករបស់រុស្ស៊ី ក្នុងការចុះផ្សាយព័ត៌មានមិនពិត បំភ្លៃព័ត៌មាន ក្នុងបណ្តាញសង្គម ដើម្បីអុកឡុកការបោះឆ្នោតនៅអាមេរិក។ លោកអូបាម៉ាប្រាប់ថៅកែហ្វេសប៊ុកថា វាអាចនឹងប៉ះពាល់ការបោះឆ្នោតលើកក្រោយទៀត។ លោកអូបាម៉ាព្រមានដូច្នេះ ក៏ដោយសារតែលោក Zuckerberg បានបង្ហាញការមិនយល់ស្របចំពោះទស្សនៈដែលថា ព័ត៌មានមិនពិតក្នុងបណ្តាញសង្គម ដើរតួនាទីក្នុងការបោះឆ្នោតអាមេរិក។ បើយោងតាមកាសែតវ៉ាស៊ីនតោន ប៉ុស្តិ៍ ថៅកែហ្វេសប៊ុកទីបំផុតទៅ បានទទួលស្គាល់បញ្ហានេះ នៅចំពោះមុខលោកអូបាម៉ា ប៉ុន្តែ បានលើកឡើងទៅលោកអូបាម៉ាវិញថា បញ្ហានេះពិបាកនឹងដោះស្រាយ។
ប៉ុន្មានសប្តាហ៍មកនេះ ហ្វេសប៊ុកជួបរឿងអាស្រូវដោយសារមានការបែកធ្លាយព័ត៌មានថា មានគណនីក្នុងបណ្តាញសង្គម ប្រហែលជាង៤០០ ដែលអាចមានប្រភពចេញមកពីខាងរុស្ស៊ី បានទិញយកការផ្សព្វផ្សាយពាណិជ្ជកម្មផ្សេងៗ ក្នុងតម្លៃជិត១សែនដុល្លារ ពីចន្លោះខែមិថុនា ឆ្នាំ២០១៥ ដល់ខែឧសភាឆ្នាំ២០១៧។ ការទិញពាណិជ្ជកម្មទាំងនេះ គឺដើម្បីចុះផ្សាយព័ត៌មានមិនពិត ដល់អ្នកលេងបណ្តាញសង្គម ទាក់ទងនឹងការបោះឆ្នោតអាមេរិក ជាព័ត៌មានដែលលំអៀងផងដែរទៅរកលោកដូណាល់ ត្រាំ។
រុស្ស៊ីបានបដិសេធដាច់អហង្កា រឿងអាស្រូវគណនីទាំងនេះ។ រឿងរ៉ាវនេះបានក្លាយជាសម្ពាធរុញអោយ លោក Zuckerberg ព្រមសហការជាមួយសភាអាមេរិក។ កាលពីថ្ងៃព្រហស្បតិ៍សប្តាហ៍មុន លោក Zuckerberg បានប្រកាសថា នឹងផ្តល់ព័ត៌មានទាក់ទងនឹងគណនីរួមទាំងខ្លឹមសារពាក់ព័ន្ធទាំងអស់នេះអោយទៅសភាអាមេរិក ក្នុងក្របខណ្ឌនៃការស៊ើបអង្កេតពីការលូកដៃរបស់រុស្ស៊ី ទាក់ទងការបោះឆ្នោតអាមេរិក។ ជាថ្មីម្តងទៀត រុស្ស៊ីបានបដិសេធដាច់អហង្កានូវការចោទប្រកាន់ទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ