រញ្ជួយដីនៅម៉ិចស៊ិកសម្លាប់មនុស្សយ៉ាងតិច ២០០នាក់
គ្រោះរញ្ជួយដីមួយ កម្រិត ៧,១មាត្រដ្ឋានរិចទែរបានកក្រើករញ្ជួយខ្លាំង នៅតំបន់ភាគកណ្តាលរបស់ម៉ិចស៊ិក ដោយបានសម្លាប់មនុស្សច្រើនជាង២០០នាក់ ដែលនៅក្នុងនោះ មានកុមារយ៉ាងតិច ២៧នាក់។ នៅព្រឹកថ្ងៃពុធនេះ ក្រុមជួយសង្រ្គោះ នៅបន្តរើកកាយ ដុំថ្ម របស់អគាររលំបាក់ដោយសារកម្លាំងរញ្ជួយដី ក្នុងក្តីសង្ឃឹមស្វែងរកអ្នករស់រានមានជីវិត ដែលអាចរងសង្កត់ដោយគំនរថ្មបាក់ស្រុតរបស់អគារ។
ចុះផ្សាយនៅថ្ងៃ៖ កែប្រែថ្ងៃទី៖
គ្រោះរញ្ជួយដីកើតមាននៅម៉ោង១រសៀល ថ្ងៃអង្គារម្សិលមិញ នៅភាគកណ្តាលប្រទេសម៉ិចស៊ិក។ ទីក្រុងម៉ិចស៊ិក និងរដ្ឋចំនួន៥របស់ប្រទេសបានរងប៉ះពាល់ ធ្ងន់ធ្ងរ ដោយសារគ្រោះរញ្ជួយដី កម្រិត៧,១មាត្រដ្ឋានរិចទែរ ដែលរហូតមកដល់ពេលនេះ បានសម្លាប់មនុស្សយ៉ាងតិច ២០០នាក់ ដែលនៅក្នុងនោះ ២១នាក់ជាកុមារ ដែលភាគច្រើនស្លាប់ នៅក្នុងការលំបាក់អគារសាលារៀន។ អាជ្ញាធរម៉ិចស៊ិកបារម្ភថា តុល្យការបាត់បង់ជីវិតមនុស្ស អាចធ្ងន់ធ្ងរជាងនេះ ព្រោះថា នៅមានមនុស្សជាច្រើនទៀត កំពុងនៅកប់ ជាប់គាំង នៅក្រោមអគាររលំបាក់បែក ដោយសារគ្រោះរញ្ជួយដី។
នៅទីក្រុងម៉ិចស៊ិក អាជ្ញាធរបានរាយការណ៍ពីការរលំបាក់អគារជាង៥០កន្លែង។ ទាហានជាង៣ពាន់នាក់ ត្រូវបានពង្រាយនៅតំបន់ដែលរងគ្រោះបាក់អគារដើម្បីជាជំនួយបន្ថែមដល់ក្រុមជួយសង្រ្គោះ និងប៉ូលិស ជាង ២ម៉ឺននាក់ដែលកំពុងធ្វើការរុករកជនរងគ្រោះ នៅក្រោមគំនរបាក់បែករបស់អគារថ្ម។
គ្រោះរញ្ជួយដីនៅថ្ងៃអង្គារកើតមាន នៅតែពីសប្តាហ៍ក្រោយទឹកដីភាគខាងត្បូងម៉ិចស៊ិកបានជួបរងគ្រោះដោយសារការរញ្ជួយដីកម្រិត ៨,២ មាត្រដ្ឋានរិចទែរ ដែលបានសម្លាប់មនុស្សជាង១០០នាក់។ កម្រិតរញ្ជួយនៅថ្ងៃអង្គារមានត្រឹមតែ ៧,១ មាត្រដ្ឋានរិចទែរ គឺតិច ជាងកម្រិតរញ្ជួយ កាលពីថ្ងៃទី ៧កញ្ញា ប៉ុន្តែ វាបានបង្កឲ្យមានការខូចខាត និងសម្លាប់មនុស្សច្រើនជាង កាលពី១៣ថ្ងៃមុន ព្រោះថា ចំណុចរញ្ជួយលើកនេះ កើតមាននៅចម្ងាយតែ១២០គីឡូម៉ែត្រ ពីរដ្ឋធានីម៉ិចស៊ិក គឺជិតជាង ចំណុចរញ្ជួយលើកមុន ដែលស្ថិតនៅចម្ងាយ ៧០០គីឡូម៉ែត្រ ពីទីក្រុងប្រជុំជនរបស់ម៉ិចស៊ិក។
ប្រជាជនម៉ិចស៊ិកមានភ័ព្វអាក្រក់ជាមួយគ្រោះរញ្ជួយដី ព្រោះថា គ្រោះរញ្ជួយដី នៅថ្ងៃអង្គារម្សិលមិញ កើតឡើង ចំនៅថ្ងៃដែលប្រជាជនម៉ិចស៊ិក នៅទូទាំង ប្រទេស កំពុងប្រារព្ធខួប៣២ឆ្នាំ នៃសោកនាដកម្ម បង្កឡើងគ្រោះរញ្ជួយដី មហាយក្ស ដែលបានសម្លាប់ជីវិតមនុស្សជាង១ម៉ឺននាក់ នៅឆ្នាំ ១៩៨៥ នៅម៉ិចស៊ិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ