អាមេរិកបរិហារអ៊ីរ៉ង់ដែលនៅតែលួចលាក់ជួយផ្តល់អាវុធឲ្យក្រុមហាម៉ាស ប៉ាឡេស្ទីន
ឯកអគ្គរដ្ឋទូតអាមេរិកប្រចាំអង្គការសហប្រជាជាតិ នៅថ្ងៃព្រហស្បតិ៍ម្សិលមិញ បានបរិហារ រិះគន់អ៊ីរ៉ង់ ដែលថ្មីៗនេះបានខិតទៅជិតស្និទ្ធនឹងក្រុមហាម៉ាស ប៉ាឡេស្ទីន ដែលអាមេរិកបានចាត់ទុកជាក្រុមភេរវនិយម។ សម្រាប់វ៉ាស៊ីនតោន ដោយពង្រឹងសម្ព័ន្ធភាព លក់អាវុធទៅឲ្យក្រុមហាម៉ាស រដ្ឋាភិបាលអ៊ីរ៉ង់កំពុងរំលោភសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលបានហាមអ៊ីរ៉ង់មិនឲ្យលក់ នាំចេញអាវុធ ដោយគ្មានការអនុញ្ញាតិពីក្រុមប្រឹក្សាសន្តិសុខ។
ចុះផ្សាយនៅថ្ងៃ៖
ដោយសំអាងទៅលើសំដីអះអាងរបស់មេក្រុមហាម៉ាស ឯកអគ្គរដ្ឋទូតអាមេរិក បានចេញសេចក្តីថ្លែងការណ៍ ចោទប្រកាន់ចំៗរដ្ឋាភិបាលអ៊ីរ៉ង់ ថាបានរំលោភសេចក្តីសម្រេចរបស់ក្រុមប្រឹក្សាសន្តិសុខ ក្នុងរឿង លក់ នាំចេញអាវុធទៅបរទេស។
នៅថ្ងៃចន្ទ ដើមសប្តាហ៍នេះ Yahya al Sinwar មេក្រុមហាម៉ាស ដែលកំពុងគ្រប់គ្រងចលនាប៉ាឡេស្ទីននៅតំបន់ហ្កាហ្សា បាននិយាយប្រាប់អ្នកកាសែតថា អ៊ីរ៉ង់ ជាអ្នកគាំទ្រដ៏សំខាន់របស់ចលនាហាម៉ាស និងថា ទំនាក់ទំនងរវាងហាម៉ាស និងអ៊ីរ៉ង់បានត្រលប់ទៅល្អល្អូកល្អឺន ដូចមុន។ តាមមេដឹកនាំក្រុមហាម៉ាស ជំនួយយោធារបស់អ៊ីរ៉ង់ សម្រាប់ហាម៉ាស គឺជាជំនួយយុទ្ធសាស្រ្ត។ ទំនាក់ទំនងល្អប្រសើរជាមួយ អ៊ីរ៉ង់បានជួយឲ្យក្រុមហាម៉ាស ពង្រឹងសមត្ថភាពក្រុមទាហានប្រយុទ្ធរបស់ខ្លួន ដើម្បីទប់ទល់អ៊ីស្រាអែល។
សម្រាប់លោកស្រី នីកគី ហាឡេ Nikki Haley ឯកអគ្គរដ្ឋទូតអាមេរិក ប្រចាំអង្គការសហប្រជាជាតិ ការអះអាងរបស់មេដឹកនាំហាម៉ាសបានបញ្ជាក់យ៉ាងច្បាស់ថា អ៊ីរ៉ង់កំពុងរំលោភបម្រាមរបស់ក្រុមប្រឹក្សាសន្តិសុខអង្គការសហប្រជាជាតិ។
ទៅតាមសេចក្តីសម្រេចរបស់ក្រុមប្រឹក្សាសន្តិសុខ ដែលបានផ្តល់សុពលភាពលើកិច្ចព្រមព្រៀងស្តីពីនុយក្លេអ៊ែរអ៊ីរ៉ង់ នៅឆ្នាំ ២០១៥ អ៊ីរ៉ង់ត្រូវបានហាមមិនឲ្យលក់ នាំចេញអាវុធ ដោយគ្មានការអនុញ្ញាតិពីក្រុមប្រឹក្សាសន្តិសុខ។
នៅក្នុងសេចក្តីថ្លែងការណ៍ នៅថ្ងៃព្រហស្បតិ៍ លោកស្រី ឯកអគ្គរដ្ឋទូតអាមេរិក ដែលមាននិន្នាការស្និទ្ធទៅរកអ៊ីស្រាអែល បានអំពាវនាវឲ្យរដ្ឋាភិបាលអ៊ីរ៉ង់ ជ្រើសរើសរវាងសហគមន៍អន្តរជាតិ ឬក្រុមហាម៉ាស ភេរវនិយម។
អាមេរិក បានចាត់ទុកក្រុមហាម៉ាស ជាក្រុមភេរវនិយមដែលបានធ្វើសង្រ្គាមបីដង ប្រឆាំងនឹងអ៊ីស្រាអែល តាំងពីឆ្នាំ ២០០៨មក។ ហាម៉ាសដែលចូលគ្រប់គ្រងផ្តាច់មុខតំបន់ហ្កាហ្សាប៉ាឡេស្ទីន តាំងពីឆ្នាំ ២០០៧ បានទទួលជំនួយ ទាំងហិរញ្ញវត្ថុ និងយោធា ជាច្រើនឆ្នាំ ពីអ៊ីរ៉ង់។ អ៊ីរ៉ង់ ដែលបានព្រមានបាញ់កម្ទេច អ៊ីស្រាអែល ឲ្យរលាយសាបសូន្យពីផែនទីពិភពលោក។ កន្លងមក ក្រុមហាម៉ាសធ្លាប់បានដកខ្លួន ឃ្លាតឆ្ងាយពីក្រុងតេហេរ៉ង់ ដែលបានចេញមុខគាំទ្ររដ្ឋាភិបាលស៊ីរី របស់លោកបាស្ហា អាល់ អាសាដ។ ប៉ុន្តែ ថ្មីៗនេះ មេដឹកនាំហាម៉ាសបានចាប់បញ្ជូនអ្នកតំណាងរបស់ខ្លួនទៅក្រុងតេហេរ៉ង់ នៅបន្ទាប់ពីអ៊ីរ៉ង់ចាប់ដំឡើងសំលេងដាក់អាមេរិក ដែលបានសម្រេចដាក់ទណ្ឌកម្មថ្មីៗ បន្ថែមប្រឆាំងអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ