ស្លាប់៨នាក់ នៅតិចសាស់ ក្នុងឡានកាមីញ៉ុងរត់ពន្ធមនុស្ស
ជាព័ត៌មានគួរឱ្យរន្ធត់ ! ប៉ូលិសអាមេរិកបានរកឃើញ មានមនុស្ស៨នាក់ស្លាប់ ជាងម្ភៃនាក់ស្ថិតក្នុងស្ថានភាពធ្ងន់ធ្ងរខ្លាំង នៅក្នុងឡានកាមីញ៉ុងមួយថតចោលនៅទីវាលមុខផ្សារ នាក្រុង San Antonio រដ្ឋតិចសាស់។ បើតាមអាជ្ញាធរមូលដ្ឋាន ជនរងគ្រោះទាំងនោះទំនងជាមានពាក់ព័ន្ធនឹងសំណុំរឿងជួញដូរមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
គឺបុគ្គលិកធ្វើការនៅក្នុងផ្សារទំនើបម្នាក់ ដែលបានផ្តល់ដំណឹងសង្ស័យដល់ប៉ូលិសមូលដ្ឋាន ក្រោយពីបានឱ្យទឹកអ្នកដំណើរជិះក្នុងឡានកាមីញ៉ុងម្នាក់ផឹក។ ជាការពិត ពេលប៉ូលិសមកដល់ និងធ្វើការឆែកឆេរ ស្រាប់តែឃើញ សាកសពមនុស្ស៨នាក់ និងមនុស្សជាងម្ភៃនាក់ទៀត កំពុងត្រដរខ្យល់ខ្សោះជាតិទឹក ខ្លះធ្ងន់ធ្ងរខ្លាំង ខ្លះគួរឱ្យព្រួយបារម្ភ ដែលត្រូវការសង្គ្រោះបន្ទាន់បំផុត។ នៅក្នុងចំណោមអ្នករួចពីស្លាប់មួយចំនួនផ្សេងទៀត មានពីរនាក់ជាកុមារ និងជាច្រើននាក់ទៀតរងរបួស ព្រោះប្រព័ន្ធខ្សល់ម៉ាស៊ីនត្រជាក់ឡានខូច។ នេះបើតាមការរៀបរាប់លម្អិតរបស់ក្រុមអ្នកសង្គ្រោះ។
បើតាមរូបភាពវីដេអូសុវត្ថិភាពនៅចំណតរថយន្តរបស់ផ្សារ មានឡានជាច្រើនបានមកទទួលទំនិញ (យកមនុស្ស) ពីកាមីញ៉ុងនេះ នៅពេលយប់។ ហេតុដូច្នេះហើយបានជាប៉ូលិសសង្ស័យថា នេះជាសកម្មភាពជួញដូរមនុស្សដ៏រន្ធត់មួយ។ អ្នកបើកឡាននោះត្រូវឃាត់ខ្លួន និងបញ្ជូនទៅតុលាការដើម្បីកាត់ទោស។
ក្រុង San Antonio នៃរដ្ឋតិចសាស់ ស្ថិតនៅជិតព្រំដែនជាប់ប្រទេសម៉ិចស៊ិក និងមានច្រកចេញចូលខុសច្បាប់ច្រើនណាស់។ បើតាមមេប៉ូលិស នេះមិនមែនជាឧប្បត្តិហេតុដំបូង ដាច់ដោយឡែកទេ ! ករណីរត់ពន្ធមនុស្សបែបនេះធ្លាប់មានច្រើនមកហើយ គ្រាន់តែនៅ លើកនេះ ប៉ូលិសចាប់បានដោយចៃដន្យ និងមានអ្នករួចជីវិត។
គ្មានព័ត៌មានលម្អិតទាក់ទងនឹងជាតិសាសន៍របស់ក្រុមជនរងគ្រោះក្នុងឡានកាមីញ៉ុងនោះទេ ប៉ុន្តែភ្នាក់ងារអន្តោប្រវេសន៍បានទទួលដំណឹងនិងទទួលបន្ទុកការងារហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ