លោកដូណាល់ ត្រាំកំពុងដើរជាន់ដានរបស់លោកនិចស៊ុន ?
ប្រធានាធិបតីអាមេរិក លោកដូណាល់ ត្រាំនៅតែរងភ្លៀងរិះគន់ បន្ទាប់ពីលោកបានបណ្តេញនាយកFBI ចេញពីតំណែងយ៉ាងទាន់ហន់ នៅថ្ងៃអង្គារកន្លងទៅ។ លោកប្រធានាធិបតីដូណាល់ ត្រាំបានអះអាងថា លោកជែម ខមីត្រូវបានបណ្តេញចេញ ដោយសារតែលោកគ្មានសមត្ថភាពដឹកនាំស្ថាប័នស៊ើបអង្កេតរបស់FBIតទៅទៀត។ ប៉ុន្តែ ប្រព័ន្ធផ្សព្វផ្សាយអាមេរិក រួមទាំងសមាជិកសភាអាមេរិក ជឿផ្ទុយទៅវិញថា លោកជែម ខមី ត្រូវ លោកដូណាល់ ត្រាំ ដកហូតចេញពីតំណែង ដោយសារតែលោកកំពុងស៊ើបអង្កេតលើទំនាក់ទំនងរុស្ស៊ី ជាមួយមនុស្សដែលធ្វើការឲ្យលោកដូណាល់ ត្រាំ នៅក្នុងអំឡុងយុទ្ធនាការឃោសនាបោះឆ្នោត។ សមាជិកសភាមកពីគណបក្សប្រជាធិបតេយ្យបានប្រៀបធៀប លោកដូណាល់ ត្រាំទៅនឹងអតីតប្រធានាធិបតី Richard Nixon ដែល បានដកបញ្ឈរជើងរដ្ឋអាជ្ញាពិសេសម្នាក់ កាលពីឆ្នាំ ១៩៧៤។
ចុះផ្សាយនៅថ្ងៃ៖
នៅឆ្នាំ ១៩៧៤ លោកអតីតប្រធានាធិបតី Richard Nixonបានបណ្តេញចេញពីតំណែង លោកArchibald Coxចេញពីតំណែងរដ្ឋអាជ្ញា ដែលបង្កើតឡើងជាពិសេស ដើម្បីស៊ើបអង្កេតលើរឿងអាស្រូវ Watergate។ នៅក្នុងរឿងអាស្រូវ Watergate ការស៊ើបអង្កេតជាច្រើនបានបង្ហាញថា លោកប្រធានាធិបតី Richard Nixonមានជាប់ពាក់ព័ន្ធ នឹងការបញ្ជូនចោរឲ្យទៅចូលលួចក្នុងទីស្នាក់ការរបស់គណបក្សប្រជាធិបតេយ្យ។ នៅរដូវក្តៅ ឆ្នាំ ១៩៧៤ លោកប្រធានាធិបតី Richard Nixonបានប្រកាសលាលែងពីមុខតំណែង នៅមុនពេលដែលសភា ប្រុងនឹងបោះឆ្នោតទម្លាក់លោកចេញពីតំណែង ដោយសារតែរឿងអាស្រូវWatergateនេះ។
៣៣ឆ្នាំក្រោយរឿងអាស្រូវ Watergate លោកដូណាល់ ត្រាំ ប្រធានាធិបតីមកពីគណបក្សសាធារណរដ្ឋដដែលនេះ បានសម្រេចបណ្តេញចេញតំណែង នាយកFBI ដែលកំពុងស៊ើបអង្កេតលើរឿងអាស្រូវ ដែលនៅក្នុងនោះអាចមានជាប់ពាក់ព័ន្ធលោកដូណាល់ ត្រាំ។ នៅក្នុងលិខិតជូនដំណឹងទៅលោកជេម ខមី លោកប្រធានាធិបតីដូណាល់ ត្រាំ បានសរសេរថា លោកសម្រេចទៅតាមការសើ្នរបស់រដ្ឋមន្រ្តីក្រសួងយុត្តិធម៌ ដែល បញ្ជាក់ថា លោកជេម ខមីគ្មានសមត្ថភាពធ្វើការ។ អ្នកនាំពាក្យរបស់សេតវិមាននៅបានបញ្ជាក់ថា លោកជេម ខមីត្រូវដកហូតចេញពីតំណែង នាយកFBIដោយសារតែលោកមិនចេះធ្វើការការស៊ើបអង្កេត លើរឿងបែកលេចធ្លាយម៉ែលរបស់លោកស្រីហ៊ីឡារីគ្លីនតុន។
កាសែតអាមេរិកាំង និងសមាជិកសភា មកពីគណបក្សប្រជាធិបតេយ្យមិនជឿលើអំណះអំណាងរបស់សេតវិមាន ព្រោះថា លោកជេម ខេមី ត្រូវបានបណ្តេញចេញពីតំណែង បន្ទាប់ពីលោកទើបបានស្នើសុំក្រសួងយុត្តិធម៌ថវិកាដើម្បី រើសមនុស្សបន្ថែម សម្រាប់ ស៊ើបអង្កេតលើទំនាក់ទំនងរបស់ក្រុមឃោសនាបោះឆ្នោតរបស់លោកដូណាល់ត្រាំ ជាមួយរដ្ឋាភិបាលរុស្ស៊ី។ នៅថ្ងៃពុធ សមាជិកសភាបានស្នើឲ្យគេតែងតាំងរដ្ឋអាជ្ញាពិសេស ដូចករណីលោកប្រធានាធិបតី Nixon ដើម្បីដឹកនាំការស៊ើបអង្កេត ប្រកបដោយឯករាជ្យ ប៉ុន្តែ សេតវិមានបានឆ្លើយបកមកវិញ ថាមិនមែន ជារឿងចាំបាច់។
សម្រាប់សមាជិកសភា មកពីគណបក្សប្រជាធិបតេយ្យ លោកដូណាល់ ត្រាំ កំពុងតែគិត បើសិនជាលោកសម្រេចដកលោកជេម ខមី ដើម្បីបិទខ្ទប់FBI កុំឲ្យស៊ើបអង្កេតទៅលើក្រុមការងាររបស់លោក នោះ។ បើសិនអនាគតFBIថ្មី សម្រេចបោះបង់ចោល ការស៊ើបអង្កេត ទៅលើទំនាក់ទំនងលោកដូណាល់ ត្រាំ និងរុស្ស៊ី នោះ រឿងអាស្រូវនេះនឹងបែកខ្ចរខ្ចាយ កាន់តែខ្លាំង ហើយនឹងអាចធ្វើឲ្យលោកដូណាល់ត្រាំ រងការរិះគន់ មិនថា ពីខាងក្រុមគណបក្សសាធារណរដ្ឋរបស់លោកផ្ទាល់។
នៅក្នុងពេលរង់ចាំការតែងតាំងប្រធានRBI ថ្មី សភាអាមេរិក នៅតែបន្តស៊ើបអង្កេតពីតួនាទីរបស់រុស្ស៊ី នៅក្នុងយុទ្ធនាការឃោសនាបោះឆ្នោតប្រធានាធិបតី អាមេរិក ដែលនៅក្នុងនោះ ម៉ែលរបស់លោកស្រីហ៊ីឡារី ត្រូវបានចោរអ៊ីនធ័រនែតត្រូវបញ្ចេញផ្សព្វផ្សាយ ដែលជាឧកាសហុចផលឲ្យលោកដូណាល់ ត្រាំឈ្នះឆ្នោតប្រធានាធិបតី។ នៅឆ្នាំ ១៩៧៤ ការស៊ើបអង្កេត ទាំងអ្នកកាសែត ហើយនិងសភាអាមេរិក បានឈានទៅបំភ្លឺការពិតមួយ រហូតធ្វើឲ្យលោកRichard Nixon ត្រូវបង្ខំចិត្ត លាលែងចេញពីមុខតំណែង។ តើរឿងអាស្រូវលើកនេះ នឹងអាចធ្វើឲ្យដូណាល់ ត្រាំ ជួបវាសនា ដូចលោកលោកRichard Nixonដែរ ឬទេ? គេនឹងរង់ចាំមើលវគ្គបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ