ហេតុអ្វី បានជាគេត្រូវប្រយុទ្ធប្រឆាំងនឹង “ព័ត៌មានមិនពិត”
អ្នកជំនាញ ហើយនិងក្រុមហ៊ុនព័ត៌មានវិទ្យាធំៗក្នុងពិភពលោកបានរួមគ្នា ដើម្បីប្រយុទ្ធប្រឆាំងនឹងការផ្សព្វផ្សាយព័ត៌មានមិនពិត។ គេជឿថា ការផ្សព្វផ្សាយព័ត៌មានមិនពិតបានកើតមានច្រើន នៅក្នុងសម័យបោះឆ្នោតប្រធានាធិបតីអាមេរិក ហើយនិងអាចជះឥទ្ធិពលអាក្រក់លើការបោះឆ្នោតបារាំង និងអាល្លឺម៉ង់ ដែលត្រូវប្រព្រឹត្តទៅនៅខែមេសា និងខែកញ្ញាឆ្នាំ ២០១៧។
ចុះផ្សាយនៅថ្ងៃ៖
នៅថ្ងៃចន្ទ សម្ព័ន្ធក្រុមហ៊ុនបច្ចេកវិទ្យា រួមជាមួយអង្គការដើម្បីការសិក្សា បានបង្ហាញកញ្ចប់ទឹកប្រាក់ប្រមាណ ១៤លានដុល្លារ ដែលផ្តល់ដោយFacebook មូលនិធិFord ហើយនិងMozilla សម្រាប់យុទ្ធនាការប្រយុទ្ធប្រឆាំងនឹងព័ត៌មានមិនពិត។ សម្រាប់អ្នកជំនាញជាច្រើន ដើម្បីប្រយុទ្ធប្រឆាំងនឹងផ្សព្វផ្សាយព័ត៌មានមិនពិត គឺមានតែធ្វើឲ្យសាធារណជន យល់ ស្គាល់ច្បាស់ពីសារព័ត៌មាន ហើយនិងទុកចិត្តឡើងវិញលើអ្នកកាសែត។
ក្រុមហ៊ុន Facebook និងក្រុមហ៊ុនGoogle ដែលជាក្រុមហ៊ុនអ៊ីនធ័រនែតនាំមុខគេក្នុងពិភពលោកបានខ្នះខ្នែងខ្លាំង ដើម្បីលុបបំបាត់ការផ្សព្វផ្សាយព័ត៌មានមិនពិត ដោយបានកាត់បន្ថយប្រាក់ចំណូលផ្សាយពាណិជ្ជកម្ម របស់វិបសៃតិ៍ដែលផ្សព្វផ្សាយព័ត៌មានមិនពិត។ ការស៊ើបអង្កេតជាច្រើនបង្ហាញថា ការចុចចូលមើលព័ត៌មាន មិនត្រឹមត្រូវ ដែលសរសេរ ប្រឌិតឡើង បានធ្វើឲ្យក្រុមហ៊ុនវិបសៃតិ៍ជាច្រើនទទួលបានប្រាក់ចំណូលកើនឡើង។
តែពីប្រើសា្លកសញ្ញាទង់ជ័យ ដើម្បីសំគាល់ព័ត៌មាន ដែលគេជឿថា ត្រូវបានប្រឌិតសរសេរឡើង Facebook នៅបានបង្កើតគម្រោងអ្នកកាសែត ដើម្បីជំរុញការផ្សព្វផ្សាយសារព័ត៌មានវិជ្ជាជីវៈ។ លោកស្រី Campbell Brown អតីតអ្នកកាសែតរបស់ទូរទស្សន៍អាមេរិកាំង NBC និងជាបច្ចុប្បន្នជាអ្នកកាសែតរបស់ទូរទស្សន៍CNNត្រូវបាន ក្រុមហ៊ុនFacebook អញ្ជើញឲ្យចូលរួមដឹកនាំក្បាលម៉ាស៊ីន ប្រយុទ្ធប្រឆាំងនឹងព័ត៌មានមិនពិត នៅលើបណ្តាញសង្គម Facebook។ សម្រាប់លោកស្រី Campbell Brown កង្វះចំណេះដឹងផ្នែកវិភាគព័ត៌មាន គឺជាកង្វល់ដ៏ធំមួយ របស់សាធារណជន ក្នុងពិភពលោក។ “វាមានសារៈសំខាន់ណាស់ ដែលមនុស្សអាចកំណត់ ស្គាល់ពីព័ត៌មានបំភ័ន្ត និងយល់ដឹងពីព័ត៌មានដែលលេចមុខនៅតាមបណ្តាញសង្គម Facebook ឬនៅលើវិបសៃតិ៍ដទៃទៀត”។
ការផ្សព្វផ្សាយព័ត៌មានមិនពិតបានចោទជាបញ្ហា នៅក្នុងយុទ្ធនាការឃោសនាបោះឆ្នោតប្រធានាធិបតី នៅអាមេរិកនៅឆ្នាំ ២០១៦។ គេរកឃើញថា ការចែកចាយ ផ្សព្វផ្សាយព័ត៌មានមិនពិត នៅលើបណ្តាញសង្គម ដើរតួយ៉ាងសំខាន់ ធ្វើឲ្យមានការប្តូរចិត្ត ក្នុងចំណោមម្ចាស់ឆ្នោត មួយចំនួន នៅអាមេរិក។ ឥទ្ធិពលអាក្រក់នៃព័ត៌មានមិនពិតទៅលើអ្នកបោះឆ្នោត បានក្លាយជាក្តីបារម្ភផងដែរ នៅអឺរ៉ុប ជាពិសេសនៅបារាំង និងអាល្លឺម៉ង់ ដែលត្រូវរៀបចំការបោះឆ្នោត នៅខែ មេសា និងខែកញ្ញាខាងមុខ។
នៅខែកុម្ភៈកន្លងទៅ ក្រុមហ៊ុនកាសែតបារាំង និងអន្តរជាតិ ប្រមាណ ៣៧ ដែលគាំទ្រទទួលជំនួយពីក្រុមហ៊ុនGoogle បានផ្តើមវិធានការមួយឈ្នោះ Crosscheckដើម្បីត្រួតពិនិត្យលើខ្លឹមសារព័ត៌មាន និងកំណត់ស្វែងរក មុខ ព័ត៌មានមិនពិត ដែលអាចជះឥទ្ធិពលអាក្រក់ទៅលើការបោះឆ្នោតប្រធានាធិបតីបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ