ម៉ិចស៊ិកដំឡើងសំឡេងដាក់អាមេរិកក្នុងរឿងលុយសង់ជញ្ជាំង
ចុះផ្សាយនៅថ្ងៃ៖
នៅក្នុងសមាជក្រុមអភិរក្សនិយមរបស់គណបក្ស នៅថ្ងៃសុក្រ ទី ២៥ កុម្ភៈ លោកប្រធានាធិបតីអាមេរិក ដូណាល់ ត្រាំបានថ្លែងថា ផែនការសាងសង់ជញ្ជាំង នៅព្រំដែនអាមេរិក ម៉ិចស៊ិកកំពុងបោះជំហានទៅមុខ លឿនជាងកាលគ្រោងទុក។ រដ្ឋមន្រ្តីការបរទេស បានព្រមានអាមេរិកថា នឹងដំឡើងពន្ធលើទំនិញអាមេរិកនាំចូលពីម៉ិចស៊ិក។
នៅមួយថ្ងៃក្រោយសន្និសីទកាសែតរួមជាមួយរដ្ឋមន្រ្តីការបរទេសអាមេរិក លោកRex Tillerson ប្រមុខការបរទេសម៉ិចស៊ិក នៅថ្ងៃសុក្រម្សិលមិញ បានបញ្ជាក់ថា និយាយតាមវិទ្យុថា ម៉ិចស៊ិកនឹងចាត់វិធានការសងសឹកវិញ បើសិនជាអាមេរិក រករឿងដំឡើងពន្ធលើទំនិញ នាំចូលពីម៉ិចស៊ិក ដើម្បីយកលុយទៅសង់ជញ្ជាំង។
នៅក្នុងសន្និសីទកាសែត នៅ ថ្ងៃព្រហស្បតិ៍ភាគីអាមេរិក និងម៉ិចស៊ិក មិនបាននិយាយពីរឿងសាងសង់ជញ្ជាំង នៅព្រំដែនម៉ិចស៊ិក ហើយនិងរឿងអន្តោប្រវេសន៍ ដែលជាប្រធានបទរសើប នោះទេ។
លោកដូណាល់ ត្រាំ ប្រធានាធិបតីថ្មីរបស់អាមេរិកដែលជាមេគំនិត បញ្ជាឲ្យសង់ជញ្ជាំងនៅព្រំដែនម៉ិចស៊ិក បានទាមទារឲ្យម៉ិចស៊ិកជាអ្នកចេញលុយសង់ជញ្ជាំង។ ម៉ិចស៊ិកបានបដិសេធមិនចេញលុយសង់ជញ្ជាំង និងរិះគន់ប្រឆាំងនយោបាយរបស់ប្រធានាធិបតីអាមេរិក។ ប៉ុន្តែ លោកដូណាល់ ត្រាំ បានលើកស្នើឲ្យគេដំឡើងពន្ធ២០ភាគរយលើទំនិញនាំចូលពីម៉ិចស៊ិក ដើម្បីយកទៅលុយសាងសង់ជញ្ជាំង។ តាមអ្នកនាំពាក្យរបស់សេតវិមាន លោកSean Spicer ដំឡើងពន្ធប្រមាណ ២០ភាគរយលើទំនិញ នាំចូលពីម៉ិចស៊ិក នឹងអាចធ្វើឲ្យអាមេរិក រកបានចំណូល ១០ពាន់លានដុល្លារ សម្រាប់យកទៅបង្រ្គប់ការសាងសង់ជញ្ជាំង។
នៅក្នុងបទសម្ភាសន៍ជាមួយវិទ្យុ នៅថ្ងៃម្សិលមិញ រដ្ឋមន្រ្តីការបរទេសលោក Luis Videgaray បាននិយាយថា គេមិនអាចឈរឱបដៃ ទុកឲ្យអាមេរិកសម្រេចតែម្នាក់ទៀតទេ។ ប្រជាជនម៉ិចស៊ិកហាក់ឆ្អែតឆ្អន់ ដែលត្រូវអាមេរិករបស់ លោកដូណាល់ ត្រាំ ប្រមាថ មើលងាយ ជាពិសេស នៅក្នុងរឿងចង់សាងសង់ជញ្ជាំងបិទព្រំដែនជាមួយម៉ិចស៊ិកនេះតែម្តង។
តាមការចុះផ្សាយរបស់កាសែតម៉ិចស៊ិក រដ្ឋមន្រ្តីការបទេសម៉ិចស៊ិកបានកំណត់មុខរួចហើយ បណ្តារដ្ឋអាមេរិក ដូចជាIowa Winsconsin និងTexasដែលនឹងត្រូវប្រឈមនឹងការដំឡើងពន្ធនាំចូលក្នុងទឹកដីម៉ិចស៊ិក។
បើសិនម៉ិចស៊ិកចង់ដំឡើងពន្ធ មែន នោះ គឺក្រុមហ៊ុនអាមេរិកដែលនឹងរងប៉ះពាល់ ខាតប្រយោជន៍ ព្រោះថា បើតាមនាយកដ្ឋានពាណិជ្ជកម្មអាមេរិក ម៉ិចស៊ិកជាទិសដៅនាំចូល ដ៏សំខាន់សម្រាប់ទំនិញមកពីរដ្ឋតិចសាស់។ នៅឆ្នាំ ២០១៥ ទំនិញអាមេរិក នាំចូលពីរដ្ឋតិចសាស់ ទៅម៉ិចស៊ិក មានតម្លៃប្រមាណ ៩២ពាន់លានដុល្លារ។
សម្រាប់រដ្ឋមន្រ្តីការបទេសម៉ិចស៊ិក រដ្ឋាភិបាលនឹងជ្រើសរើសលើមុខទំនិញអាមេរិកមួយចំនួន ដែលនឹងត្រូវដំឡើងពន្ធ គឺមិនទាំងអស់នោះទេ។ ធ្វើដូច្នេះ គឺដើម្បីជៀសវាង មិនដាក់ទណ្ឌកម្ម ពិន័យលើអ្នកប្រើប្រាស់ក្នុងទឹកដីម៉ិចស៊ិក។
លោកដូណាល់ ត្រាំផែនការសង់ជញ្ជាំងលឿនជាងកាលកំណត់
នៅក្នុងសមាជដែលប្រមូលផ្តុំសុទ្ធតែក្រុមអ្នកគាំទ្រអភិរក្សនិយម នៅថ្ងៃសុក្រម្សិលមិញ លោកដូណាល់ ត្រាំបានអះអាង ថា ផែនការសាងសង់ជញ្ជាំងរបស់លោកបានរំកិលទៅមុខ លឿនជាងពេលគ្រោងទុក។
តាមទីភ្នាក់ងារពន្ធ និងការការពារព្រំដែនរបស់រដ្ឋាភិបាលអាមេរិក គេនឹងចាប់បើកឲ្យក្រុមហ៊ុនដាក់ពាក្យសុំសាងសង់ជញ្ជាំង ចាប់តាំងពីខែមីនា។ នៅថ្ងៃទី ២០មីនា បេក្ខជនក្រុមហ៊ុនដែលគេជ្រើសរើស នឹងត្រូវបញ្ជាក់លម្អិតពីតម្លៃទឹកប្រាក់ ដែលគេត្រូវការសម្រាប់សង់ជញ្ជាំង។
អាមេរិកចង់សាងសង់ជញ្ជាំងលើបណ្តោយព្រំដែនម៉ិចស៊ិក និងអាមេរិកដែលមានប្រវែងប្រមាណជាង ៣ពាន់គីឡូម៉ែត្រ។ លោកដូណាល់ ត្រាំធ្លាប់និយាយថា លោកនឹងចំណាយលុយតិចបំផុតសម្រាប់សាងសង់ជញ្ជាំង ដែលអាចការពារកុំឲ្យមានការលួចឆ្លងខុសច្បាប់របស់ជនបរទេសចូលទឹកដីអាមេរិក។ លោកដូណាល់ ត្រាំវាយតម្លៃថា ជញ្ជាំងរបស់លោកនឹងមានតម្លៃប្រមាណ ១២ពាន់លានដុល្លារអាមេរិក។
ប៉ុន្តែ របាយការណ៍របស់នាយកដ្ឋានសន្តិសុខផ្ទៃក្នុង ដែលទីភ្នាក់ងារព័ត៌មានReuters ទទួលបាន បានបង្ហាញថា គេត្រូវការថវិកាប្រមាណ ២០ពាន់លានដុល្លារ គឺច្រើនជាងការវាយតម្លៃរបស់លោកដូណាល់ត្រាំ ហើយនិងត្រូវការពេលវេលា ៣ឆ្នាំ ដើម្បីសង់ជញ្ជាំង។
ម៉ិចស៊ិកមិនទទួលជនអន្តោប្រវេសន៍ដែលអាមេរិកបញ្ជូនចេញនោះទេ
នៅថ្ងៃសុក្រ ម្សិលមិញ រដ្ឋមន្រ្តីមហាផ្ទៃម៉ិចស៊ិកវិញ ក៏បានចេញមុខព្រមានអាមេរិកពីរឿងចាប់បញ្ជូនជនអន្តោប្រវេសន៍ខុសច្បាប់ពីទឹកដីអាមេរិក។ រដ្ឋមន្រ្តីក្រសួងសន្តិសុខជាតិអាមេរិក នៅថ្ងៃព្រហស្បតិ៍បានបញ្ជាក់ទៅសមភាគីម៉ិចស៊ិកថា នឹងគ្មានការចាប់បញ្ជូនចេញជនអន្តោប្រវេសន៍ខុសច្បាប់ ទាំងកម្រោល និងក្នុងចំនួនច្រើននោះទេ។
រដ្ឋមន្រ្តីម៉ិចស៊ិកតវ៉ា ព្រោះកាលពីថ្ងៃអង្គារកន្លងទៅ គឺក្រសួងសន្តិសុខជាតិអាមេរិក ផ្ទាល់ដែលបានចេញបទបញ្ជាឲ្យចាប់បញ្ជូនជនឆ្លងដែនខុសច្បាប់ ទៅប្រទេសដែលពួកគេបានប្រើឆ្លងចូលអាមេរិក។ តាមន័យនេះ គឺអាជ្ញាធរអាមេរិកអាចចាប់បញ្ជូន រាល់ជនអន្តោប្រវេសន៍ ដោយមិនគិតពីសញ្ជាតិ ឲ្យទៅនៅក្នុងទឹកដីម៉ិចស៊ិក។
សម្រាប់រដ្ឋមន្រ្តី ក្រសួងមហាផ្ទៃម៉ិចស៊ិក ម៉ិចស៊ិកមិនអាចទទួលយកជនជាតិប្រទេសដទៃ ដែលអាមេរិកចាប់បញ្ជូនចេញពីទឹកដីអាមេរិកនោះទេ នោះបើទោះបីជាជនជាតិទាំងនោះបានប្រើទឹកដីម៉ិចស៊ិកដើម្បីឆ្លងចូលទៅអាមេរិកក៏ដោយ។ លើសពីនោះ ម៉ិចស៊ិកក៏មិនអាចធ្វើតាមសំណើរបស់អាមេរិកដែលចង់ប្រើទឹកដីម៉ិចស៊ិក ដើម្បីចាប់ដាក់ឃុំបណ្តោះអាសន្ន ជនឆ្លងដែនខុសច្បាប់ ដែលត្រូវរង់ចាំការសម្រេចបញ្ជូនចេញរបស់តុលាការអាមេរិកដែរ។ បច្ចុប្បន្ននេះ មានជនអន្តោប្រវេសន៍រស់នៅខុសច្បាប់ប្រមាណ ១១លាននាក់ នៅអាមេរិក ដែលនៅក្នុងនោះពាក់កណ្តាលជាជនជាតិម៉ិចស៊ិក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ