អាមេរិកបិទបញ្ចប់ការផ្តល់សិទ្ធិជ្រកកោននយោបាយដល់អន្តោប្រវេសន៍គុយបា
ចុះផ្សាយនៅថ្ងៃ៖
ស្តាប់ - ០៦:០៧
ប្រជាពលរដ្ឋគុយបា ដែលរត់ភៀសខ្លួនមកសហរដ្ឋអាមេរិក មិនអាចទទួលបានសិទ្ធិជ្រកកោននយោបាយជាស្វ័យប្រវត្តិដូចពេលមុនទៀតឡើយ។ រដ្ឋបាលអាមេរិកនិងគុយបា ទើបបានរកឃើញកិច្ចព្រមព្រៀងលើសំណុំរឿងអន្តោប្រវេសន៍ខុសច្បាប់។ នៅមួយសប្តាហ៍មុនផុតអាណត្តិ លោក អូបាម៉ា បានប្រកាសលុបចោលសិទ្ធិពិសេសសម្រាប់អន្តោប្រវេសន៍មកពីគុយបា។ ប៉ុន្តែវិធានការចុងក្រោយនេះ អាចនឹងបង្កបង្កើតឱ្យមានប្រតិកម្មពីសំណាក់តំណាងរាស្ត្រដែលប្រឆាំងនឹងការភ្ជាប់ទំនាក់ទំនងជាធម្មតាឡើងវិញជាមួយគុយបា។
ប្រជាពលរដ្ឋគុយបា បានទទួលសិទ្ធិពិសេស ពីសហរដ្ឋអាមេរិក រាប់ទសវត្សរ៍មកហើយ។ ពោលគឺចាប់ពី នៅឆ្នាំ១៩៦៦ ក្នុងពេលកំពុងមានសង្គ្រាមត្រជាក់ សហរដ្ឋអាមេរិកបានបង្កើតច្បាប់អន្តោប្រវេសន៍មួយ ចូលជាធរមាន អនុគ្រោះ និងសម្រួលដល់ប្រជាពលរដ្ឋគុយបាភៀសខ្លួនឱ្យបានស្នាក់នៅក្នុងសហរដ្ឋអាមេរិក និងមានលទ្ធភាពបានទទួលសិទ្ធិស្នាក់នៅជាអចិន្ត្រៃយ៍ ក្នុងរង្វង់ពេលតែមួយឆ្នាំប៉ុណ្ណោះ។ ប៉ុន្តែចាប់ពីឆ្នាំ១៩៩៥មក អាមេរិកបានអនុវត្តគោលការណ៍មួយ “ជើងសើម ជើងស្ងួត” ដោយ ចាប់បញ្ជូនអន្តោប្រវេសន៍ខុសច្បាប់ ចាប់បានក្នុងដែនទឹក ឱ្យគុយបាជាស្វ័យប្រវត្តិ និងទទួលយក ព្រមទាំងផ្តល់សិទ្ធិពិសេស ឱ្យជ្រកកោននយោបាយ តែពលរដ្ឋគុយបាណា ដែលបានឆ្លងចូលជាន់ដីអាមេរិកតែប៉ុណ្ណោះ។
“ច្បាប់ជើងសើម ជើងស្ងួត”
បដិវត្តកាស្ត្រូ ឆ្នាំ១៩៥៩ បានរុញច្រានឱ្យមានរលកចំណាកស្រុកជាលើកដំបូង ដោយមានពលរដ្ឋគុយបា យ៉ាងហោចណាស់ ៣០ម៉ឺននាក់ ដែលភាគច្រើនជាអ្នកគាំទ្រមេដឹកនាំចាស់ បាននាំគ្នារត់គេចចេញពីកោះ ក្នុងទម្រង់ជាអន្តោប្រវេសន៍នយោបាយ បន្ទាប់មកជាអន្តោប្រវេសន៍សេដ្ឋកិច្ច ក្រោយពីគុយបាបានអនុវត្តប្រព័ន្ធសេដ្ឋកិច្ចផែនការកុម្មុយនីស្ត ឱ្យប្រជាពលរដ្ឋត្រដររស់។
មិនយូរប៉ុន្មាន វិបត្តិអន្តោប្រវេសន៍មកពីគុយបា បានផ្ទុះឡើងខ្លាំង។ នៅឆ្នាំ១៩៨០ លោក ហ្វីដែល កាស្ត្រូ ជាអតីតប្រធានាធិបតីគុយបាសម័យនោះ បានបើកកំពង់ផែមួយ ទទួលទូកមកពីFlorida ដោយធ្មេញភ្នែកបណ្តោយឱ្យអ្នកទោស ឬអ្នកនៅក្នុងមន្ទីរពេទ្យឆ្កួត អាចរត់ឆ្លងទៅអាមេរិក។ តែនៅពេលអាមេរិកចាប់បញ្ជូនមកវិញ គុយបាមិនទទួលយកពលរដ្ឋខ្លួនឯងវិញទេ ប្រសិនបើជននោះមានប្រវត្តិឧក្រិដ្ឋ។ ចរន្តរត់ភៀសខ្លួនតាមទូក ដ៏រខេករខាក ក៏បានចាប់ផ្តើមឡើង និងជាដំណាក់សោកដកម្មដ៏ធំធេង ដោយមានស្លាប់ក៏ច្រើន បាត់ខ្លួនក៏ច្រើន ព្រមទាំងគួរឱ្យកត់សម្គាល់បំផុតនៅឆ្នាំ ១៩៩៤។
ប្រឈមនឹងស្ថានភាពបែបនេះ នៅឆ្នាំ១៩៩៥ អាមេរិកក្នុងសម័យប្រធានាធិបតី ប៊ីល គ្លីនតុន បានកែសម្រួលច្បាប់អន្តោប្រវេសន៍ អនុគ្រោះនិងរក្សាសិទ្ធិពិសេសសម្រាប់គុយបាដដែល តែចំពោះបើជនណាដែលអាចឆ្លងដែនចូលជាន់ដីអាមេរិកបាន។
រលកនិរទេសក្រោយការភ្ជាប់ទំនាក់ទំនងជាធម្មតាជាមួយអាមេរិក
ចរន្តអន្តោប្រវេសន៍រត់មកអាមេរិក មិនបានស្ងប់ស្ងាត់ទេ ! គេសង្កេតឃើញថាមួយរយៈចុងក្រោយនេះ និងក្រោយពីអាជ្ញាធរក្រុងឡាហាវ៉ាន បានបន្ធូរបន្ថយលក្ខខណ្ឌធ្វើដំណើរ ប្រជាពលរដ្ឋគុយបា បាននាំគ្នាប្រើប្រាស់ប្រទេសទីបី ដើម្បីជាឈ្នាន់សម្រាប់លួចចូលអាមេរិកតាមដីគោក។
នៅចុងឆ្នាំ២០១៤ ក្រោយពីសហរដ្ឋអាមេរិក និងគុយបា បានប្រកាសជាប្រវត្តិសាស្ត្រភ្ជាប់ទំនាក់ទំនងគ្នាឡើងវិញក្តី ក៏ចរន្តអន្តោប្រវេសន៍មិនធូរថយឡើយ។ បើតាមវិទ្យាស្ថានស្រាវជ្រាវអាមេរិក ចំនួនអន្តោប្រវេសន៍ រត់ទៅដល់ជាន់ទឹកដីអាមេរិក បានកើនឡើងជាងទ្វេដង ពី ជាងពីរម៉ឺននាក់ នៅឆ្នាំ២០១៤ ទៅ ជាងបួនម៉ឺននាក់ នៅឆ្នាំ២០១៥ និង ជិត៥ម៉ឺននាក់ នៅឆ្នាំ១០ខែដំបូងនៃឆ្នាំ២០១៦។ ពលរដ្ឋគុយបាបន្តនិរទេសខ្លួន ដោយខ្លាចមានការប្រែប្រួលច្បាប់នៅពេលប្រទេសបើកចំហ។ ការព្រួយបារម្ភដែលមិនខុសមែន ! ព្រោះឥលូវគេបានបាត់បង់អភ័យឯកសិទ្ធិអន្តោប្រវេសន៍ ដែលគ្មានប្រទេសណាក្នុងលោកធ្លាប់បានទទួលដូចគុយបាឡើយ។ ចាប់ពីពេលនេះទៅ ពលរដ្ឋគុយបាណាដែលចូលអាមេរិកដោយខុសច្បាប់នឹងត្រូវចាប់បញ្ជូនទៅវិញ មិនថាមកតាមផ្លូវទឹក ឬផ្លូវគោកឡើយ។
ក្នុងរយៈពេលកន្លះសតវត្សរ៍នេះ ក្នុងចំណោមពលរដ្ឋសរុប ១១,២លាននាក់ មានជាងពីរលាននាក់ បាននិរទេសខ្លួនចេញពីប្រទេស ក្នុងនោះ ៨០%រស់នៅសហរដ្ឋអាមេរិក ឬនិយាយឱ្យចំនៅរដ្ឋFlorida។
ក្រុងឡាហាវ៉ានសប្បាយចិត្ត
ច្បាប់អន្តោប្រវេសន៍អាមេរិក ដែលផ្តល់សិទ្ធិពិសេសដល់ពលរដ្ឋគុយបានេះ ធ្លាប់ត្រូវបានអាជ្ញាធរកុម្មុយនិស្តគុយបា បរិហារជាញយដងថា ជាការលើកទឹកចិត្តឱ្យមានការរត់ភៀសខ្លួន និងរត់ពន្ធមនុស្សខុសច្បាប់។ ក្រុងឡាហាវ៉ាន តែងតែបង្ហាញចេតនាចង់ឃើញវ៉ាស៊ីនតោនលុបសិទ្ធិពិសេសនេះចេញ ដោយចាត់ទុកថា ជាញុះញង់ឱ្យមានអន្តោប្រវេសន៍សេដ្ឋកិច្ច។
សម្រាប់ឡាហាវ៉ាន សិទ្ធិពិសេសនេះពិតជាមិនសក្តិសមនិងត្រឹមត្រូវទេ ប្រសិនបើប្រទេសទាំងពីរ គុយបា និងសហរដ្ឋអាមេរិក ភ្ជាប់ទំនាក់ទំនង ស្ទើរជាធម្មតានឹងគ្នាទៅហើយនោះ។
ប៉ុន្តែបើតាមកិច្ចចរចាស្ងាត់រហូតសម្រេចបានលទ្ធផលថ្ងៃនេះ អាមេរិកសុខចិត្តលុបសិទ្ធិពិសេសសម្រាប់អន្តោប្រវេសន៍ខុសច្បាប់គុយបាចេញ តែឡាហាវ៉ានត្រូវសុខចិត្តទទួលពលរដ្ឋដែលអាជ្ញាធរអាមេរិកចាប់បញ្ជូនទៅវិញ មិនអាចបដិសេធ ដូចអ្វីដែលឡាហាវ៉ានធ្លាប់ធ្វើរហូតមកឡើយ។
ចំពោះលោក ត្រាំ ដែលនឹងត្រូវចូលកាន់តំណែងជាប្រធានាធិបតី ចាប់ពីថ្ងៃទី ២០មករា សប្តាហ៍ក្រោយនេះទៅវិញ ធ្លាប់បានបង្ហើរជំហរមិនច្បាស់លាស់ក្នុងសំណុំរឿងគុយបា។ លោកបានបង្ហោះសារក្នុងប្រព័ន្ធសង្គម ថានឹងបិទបញ្ចប់ភាបត្រូវរ៉ូវជាមួយគុយបា ប្រសិនបើប្រទេសកោះមួយនេះមិនព្រមប្រឹងប្រែងផ្នែកសិទ្ធិមនុស្ស និងបើកទូលាយទីផ្សារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ