ចោរអ៊ីនធ័រនែតអាចវាយប្រហារការបោះឆ្នោតប្រធានាធិបតីអាមេរិក
ចុះផ្សាយនៅថ្ងៃ៖
ការបោះឆ្នោតប្រធានាធិបតីអាមេរិក ថ្ងៃទី ៨ វិច្ឆិកា អាចនឹងត្រូវពួកចោរអ៊ីនធ័រនែតលួចបន្លំបានឬ ? សំណួរបែបនេះត្រូវបានចោទសួរឡើងតាំងពីជាច្រើនខែមកហើយ និងកាន់តែផុសផុលខ្លាំងទៀតតាំងពីល្ងាចថ្ងៃសុក្រទី ៣០កញ្ញានេះមក។ ព្រោះក្រសួងសន្តិសុខផ្ទៃក្នុង ទើបបានបង្ហើបឱ្យដឹង ថាមានប្រព័ន្ធបោះឆ្នោតនៅជាង២០រដ្ឋរបស់អាមេរិកបានរងការវាយប្រហារតាមអ៊ីនធ័រនែត។ ជាទូទៅ គ្មាននរណាអាចទៅប៉ះពាល់ការបោះឆ្នោតបានទេ ព្រោះប្រព័ន្ធបោះឆ្នោតមិនភ្ជាប់អ៊ីនធ័រនែតទាំងស្រុងឡើយ។ ប៉ុន្តែបញ្ជីឈ្មោះបោះឆ្នោតអាចនឹងត្រូវគេលួចបន្លំបាន តាមបែប តាមយ៉ាង។
ការព្រួយបារម្ភ អំពីការវាយប្រហារតាមអ៊ីនធ័រនែត មានជាយូរខែថ្ងៃមកហើយ ! ហើយគេក៏បានដឹងជាយូរក្រែលដែលថា រដ្ឋ អារីស្ហូណា អ៊ីលីន័រ ជាផ្ទាំងស៊ីបនៃរបស់ពួកចោរអ៊ីនធ័រនែត។ លោក ដូណាល់ ត្រាំ បេក្ខជប្រធានាធិបតីអាមេរិកបក្សសាធារណរដ្ឋ ក៏ធ្លាប់បានលើកឡើង ដោយចំៗ កាលពីថ្ងៃទី ៣សីហា ក្នុងពេលធ្វើមិទ្ទិញ ថា លោកសង្ស័យតែមានការលួចបន្លំ នៅពេលបោះឆ្នោតប្រធានាធិបតីថ្ងៃទី ៨វិច្ឆិកាទេ។ ជាបន្តបន្ទាប់មក លោក ត្រាំ បានទន្ទេញ អំពីភាពសង្ស័យនេះ។ សម្ពាធនេះ បូកផ្សំនឹងការវាយប្រហារលើប្រព័ន្ធអ៊ីនធ័រនែតរបស់បក្សប្រជាធិបតេយ្យ ទើបគេកាន់តែខ្លាចឡើងៗថាអាចមានការវាយប្រហារចូលដល់ប្រព័ន្ធបោះឆ្នោត។
ជាងនេះទៅទៀតនៅសប្តាហ៍នេះ នាយកទីភ្នាក់ងារស៊ើបការណ៍អាមេរិកFBI បានសម្តែងការខ្វាយខ្វល់ជាសាធារណៈ អំពីចំណុចខ្សោយនៃប្រព័ន្ធចុះឈ្មោះអ្នកបោះឆ្នោត និងថាស្ថានភាពវាយប្រហារតាមអ៊ីនធ័រនែតមានលក្ខណៈធ្ងន់ធ្ងរ ជាងអ្វីដែលគ្រប់គ្នាបានគិតទៅទៀត ព្រោះជាសរុបមានរដ្ឋជាង ២០ ត្រូវបានរងការវាយប្រហារ ក្នុងរយៈពេលប៉ុន្មានខែមកនេះ ពោលគឺដល់ទៅជាងពាក់កណ្តាលនៃរដ្ឋអាមេរិកទាំងមូល។
អ្នកទទួលត្រូវអាមេរិកម្នាក់ដែលបានបញ្ជាក់ព័ត៌មាននេះជាថ្មី កាលពីថ្ងៃសុក្រម្សិលមិញ និងដែលសុំមិនបញ្ចេញឈ្មោះ មិនបានបញ្ជាក់ថាតើការវាយប្រហារតាមអ៊ីនធ័រនែតនេះមានប្រភពមកពីណា និងមានបំណងយ៉ាងណាទេ។ តែចលនាវាយប្រហារដ៏គួរភ័យខ្លាចមួយនេះ លើប្រព័ន្ធព័ត៌មានវិទ្យា មានទម្រង់ជាការសាកល្បង ដើម្បីបានដឹងអំពីភាពផុយស្រួយងាយរងគ្រោះនៃដំណើរការបោះឆ្នោតប្រធានាធិបតីអាមេរិក។
លោក ដូណាល់ ត្រាំ ចោទ
ក្នុងករណីរដ្ឋ Arizona និង Illinois ឬករណីវាយប្រហារតាមអ៊ីនធ័រនែតលើបក្សប្រជាធិបតេយ្យរបស់លោកស្រី ហ៊ីលឡារី គ្លីនតុន រដ្ឋការអាមេរិកចោទជាស្នាដៃចោរអ៊ីនធ័រនែតរុស្ស៊ី។ ជាហេតុបំផុសឱ្យមានសំណួរ បើរដ្ឋាភិបាលក្រុងម៉ូស្គូ ស្ថិតនៅពីក្រោយប្រតិបត្តិការនេះ? ដើម្បីប្រយោជន៍លោក ដូណាល់ ត្រាំ ? បេក្ខជនប្រធានាធិបតីបក្សសាធារណរដ្ឋ ដែលបានបរិហារឥតដាច់ថាការបោះឆ្នោតខាងមុខនឹងមានការលួចបន្លំពីក្រុមអ្នកអំណាចមួយក្រុម។ ចង់ឬមិនចង់ ភាពតានតឹងកើនឡើង និងបានពង្រឹងភាពសង្ស័យអំពីភាពមិនប្រក្រតីនៃការបោះឆ្នោត ឬអាចនិយាយយ៉ាងខ្លីថា ពួកចោរអ៊ីនធ័រនែត បានសម្រេចកម្មវត្ថុដំបូងរបស់ខ្លួនហើយ។
អាចមានការវាយប្រហារតាមអ៊ីនធ័រនែត តែត្រូវមានមធ្យោបាយធំ
ប្រសិនបើត្រឹមជាការវាយប្រហារលួចទិន្នន័យព័ត៌មានទាក់ទងនឹងបញ្ជីចុះឈ្មោះបោះឆ្នោត នោះវាមិនបានធ្វើឱ្យប៉ះពាល់ដល់លទ្ធផលនៃការបោះឆ្នោតថ្ងៃទី ៨វិច្ឆិកាឡើយ។ ប៉ុន្តែ បើការវាយប្រហារចូលដល់ប្រព័ន្ធបោះឆ្នោតអេឡិចត្រូនិក នោះគឺជាគ្រោះថ្នាក់ដ៏ធ្ងន់ធ្ងរ។ គ្រាន់តែថា ពួកចោរមិនអាចធ្វើការវាយប្រហារបានដោយងាយៗទេ ព្រោះម៉ាស៊ីនបោះឆ្នោតនោះ គ្មានភ្ជាប់ប្រព័ន្ធអ៊ីនធ័រនែតឡើយ។
អ្នកឯកទេសផ្នែកសុវត្ថិភាពអ៊ីនធ័រនែតឯករាជ្យ បានធានាអះអាងថា ហានិភ័យសូន្យពិតជាគ្មានទេ ! ពួកចោរនៅតែអាចវាយប្រហារបាន តែត្រូវការប្រើមធ្យោបាយធំមែនទែន។ បន្ថែមពីលើសមត្ថភាពវិភាគនិងវាយតម្លៃនិន្នាការនៃសំឡេងឆ្នោត ដើម្បីអាចលួចបន្លំឱ្យបានសក្តិសម ចោរនោះត្រូវមានចំណេះដឹងផ្នែកបច្ចេកទេសខ្ពស់ ហើយត្រូវធ្វើសកម្មភាពដោយបង្ហាញវត្តមានបុគ្គលផ្ទាល់ ដោយសម្ងាត់កុំឱ្យគេចាប់បាន ដើម្បីលាក់មីក្រូប្រូសេសឺក្រោមម៉ាស៊ីនបោះឆ្នោត។
ទោះបីនៅក្នុងរដ្ឋសំខាន់ៗ ឬនៅរដ្ឋដែលមានពលរដ្ឋមិនទាន់សម្រេចចិត្តច្បាស់លាស់ អាចប្តូរផ្លាស់សំឡេងពីបក្សមួយទៅបក្សមួយ ក្នុងនាទីចុងក្រោយយ៉ាងណាក្តី ក៏ដើម្បីអាចធ្វើឱ្យប៉ះពាល់ដល់លទ្ធផលឆ្នោតថ្នាក់ជាតិបាន ទាល់ការវាយប្រហារមានទ្រង់ទ្រាយធំមែនទែន។ ម្យ៉ាងវិញទៀត ប្រព័ន្ធបោះឆ្នោតនៅអាមេរិកខុសគ្នាពីតំបន់មួយទៅតំបន់ ខ្លះបោះឆ្នោតជាការគូសសន្លឹកឆ្នោត ខ្លះតាមអ៊ីមែល ខ្លះតាមបែបអេឡិចត្រូនិក ខ្លះលាយគ្នា ដែលពួកចោរអ៊ីនធ័រនែត ពិតជាមិនងាយចូលវាយប្រហារធ្វើប៉ះពាល់ដល់ដំណើរការបោះឆ្នោតបានស្រួលឡើយ ឬក៏អាចប៉ះពាល់ជាលក្ខណៈបុគ្គល ពីម្នាក់ទៅម្នាក់។
ឧបមាថា ក្រុមចោរអ៊ីនធ័រនែតមានរដ្ឋនៅពីក្រោយខ្នង ដូចយ៉ាង រុស្ស៊ី ដែលមានមធ្យោបាយវាយប្រហារលើប្រព័ន្ធបោះឆ្នោតអាមេរិក ប៉ុន្តែបើតាមអ្នកវិភាគ ពួកគេធ្វើ មិនមែនដើម្បីល្បងសមត្ថភាពទេ និងដើម្បីប្តូរលទ្ធផលឆ្នោតទេ តែដើម្បីរំខាន ធ្វើឱ្យការបោះឆ្នោត ដែលតានតឹងស្រាប់បាត់ស្ថិរភាពច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ