លោកអាស្តុន កាទ័រ៖អាមេរិកត្រៀមខ្លួនធ្វើទំនើបកម្មគ្រាប់មីស៊ីលអន្តរទ្វីបមានផ្ទុកគ្រាប់ក្បាលនុយក្លេអ៊ែរ
ចុះផ្សាយនៅថ្ងៃ៖
ស្តាប់ - ០៥:៤៦
នៅសហរដ្ឋអាមេរិក លោករដ្ឋមន្រ្តីក្រសួងការពារជាតិអាស្តុន កាទ័របានប្រកាសឲ្យដឹងនៅថ្ងៃចន្ទ ទី២៦ កញ្ញាថា អាមេរិកបានត្រៀមខ្លួនដើម្បីធ្វើទំនើបកម្មគ្រាប់មីស៊ីលអន្តរទ្វីបមានផ្ទុកក្បាលគ្រាប់នុយក្លេអ៊ែរ។ លោកកាទ័របានថ្លែងយ៉ាងដូចនេះនៅពេលដែលលោកបានធ្វើដំណើរទៅកាន់តំបន់ Minot ស្ថិតក្នុងរដ្ឋដាកូតាខាងជើង។ តំបន់ Minot ជាតំបន់មួយក្នុងចំណោម ៣ទៀតដែលអាមេរិកគ្រោងនឹងដាក់ពង្រាយគ្រាប់មីស៊ីលអន្តរទ្វីបមានផ្ទុកក្បាលគ្រាប់នុយក្លេអ៊ែររបស់អាមេរិកចំនួន ៤០០ដើម។ ការថ្លែងរបស់លោកកាទ័រហាក់ដូចជាផ្ទុយនឹងឆន្ទៈរបស់លោកប្រធានាធិបតីអូបាម៉ាដែលចង់បាន និងចង់ឃើញពិភពលោកគ្មានអាវុធនុយក្លេអ៊ែរ។
ទន្ទឹមនឹងការប្រកាសឲ្យដឹងពីការធ្វើទំនើបកម្មគ្រាប់មីស៊ីលអន្តរទ្វីបមានផ្ទុកក្បាលគ្រាប់នុយក្លេអ៊ែរទាំង ៤០០ដើមដែលអាមេរិកមានសព្វថ្ងៃ លោកអាស្តុន កាទ័រក៏បានរម្លឹកប្រាប់ឲ្យដឹងផងដែរពីគម្រោងធ្វើទំនើបកម្មគ្រាប់បែកនុយក្លេអ៊ែរ B-៦១ ព្រមទាំងមានគម្រោងសាងសង់នាវាមុជទឹក រួមទាំងគ្រាប់មីស៊ីលថ្មីៗបន្ថែមទៀតនៅឆ្នាំខាងមុខ។ លោករដ្ឋមន្រ្តីការពារអាមេរិករូបនេះដដែលបានបញ្ជាក់ច្បាស់ៗថា អាមេរិកមានការប្រុងប្រយ័ត្នជាប់ជានិច្ចចំពោះរឿងនុយក្លេអ៊ែរ ហើយក៏មិនចង់កាត់បន្ថយវាដែរ។
លោកអាស្តុន កាទ័របានលើកយកហេតុផលទៅពន្យល់យ៉ាងសាមញ្ញថា មិនមែនអាមេរិកជាប្រទេសល្មោភនុយក្លេអ៊ែរ ឬមួយក៏ចង់ប្រើអាវុធនុយក្លែអ៊ែរដើម្បីគំរាមកំហែងពិភពលោកទេ។ តែបញ្ហានៅត្រង់ថា នៅពេលដែលអាមេរិកកំពុងព្យាយាមកាត់បន្ថយ និងឈប់ធ្វើការអភិវឌ្ឍអាវុធនុយក្លេអ៊ែរនោះ ស្រាប់តែមានប្រទេសសត្រូវ និងគូប្រជែងរបស់អាមេរិកជាច្រើនបែរជាកំពុងបន្តអភិវឌ្ឍន៍អាវុធនុយក្លេអ៊ែរយ៉ាងគគ្រឹកគគ្រេងទៅវិញ។
លោកកាទ័របានអះអាងថាក្នុងរយៈពេល ២៥ឆ្នាំចុងក្រោយនេះ អាមេរិកមិនបានបង្កើតអ្វីថ្មីទាំងអស់ តែស្របពេលគ្នាហ្នឹង ប្រទេសផ្សេងបានធ្វើច្រើនណាស់។ នៅត្រង់ចំណុចនេះ លោកកាទ័របានលើកចំឈ្មោះប្រទេសរុស្ស៊ី កូរ៉េខាងជើង ចិន ឥណ្ឌា ប៉ាគីស្ថាន និងប្រទេសអ៊ីរ៉ង់។ នេះជាហេតុផលមួយ រីឯហេតុផលមួយទៀតលើកឡើងដោយលោកកាទ័រ គឺមកពីគ្រាប់មីស៊ីលដែលអាមេរិកមានសព្វថ្ងៃ មានភាគច្រើនជាគ្រាប់មីស៊ីលចាស់ៗផលិតតាំងពីក្នុងទសវត្សឆ្នាំ ៦០ ដែលគ្មានបំពាក់បច្ចេកវិទ្យាទំនើបដូចសព្វថ្ងៃនេះទេ។
ស្ថានការណ៍ពិភពលោកមានការផ្លាស់ប្តូរច្រើនក្នុងរយៈពេល ៧ឆ្នាំកន្លងទៅ
អ្វីដែលលោករដ្ឋមន្រ្តីការពារអាមេរិកអាស្តុន កាទ័រថ្លែងពេលនេះ ហាក់ដូចជាផ្ទុយនឹងសុន្ទរកថារបស់លោកអូបាម៉ាដែលបានថ្លែងកាលពីឆ្នាំ ២០០៩។ គឺជាសុន្ទរកថាមួយដែលលោកអូបាម៉ាបានថ្លែងនៅក្នុងទីក្រុងប្រាក ប្រទេសឆែកកាលពីថ្ងៃទី៥ មេសា ឆ្នាំ ២០០៩ នាឱកាសជំនួបកំពូលអឺរ៉ុប និងអាមេរិក។ សុន្ទរកថារបស់លោកអូបាម៉ាកាលណោះបានទទួលការសាទរនៅទូទាំងពិភពលោក ព្រោះវាបានបង្កប់ដោយអត្ថន័យ និងខ្លឹមសារជាច្រើនចំពោះមនុស្សជាតិ។ អត្ថន័យ និងខ្លឹមសារដែលគ្រប់គ្នាមិនអាចភ្លេចបាននោះ គឺការសន្យារបស់លោកអូបាម៉ាក្នុងការស្វែងរកសន្តិភាព និងសន្តិសុខឲ្យពិភពលោកមួយគ្មានអាវុធនុយក្លេអ៊ែរ។
នៅក្នុងសុន្ទរកថាដដែលនោះ លោកអូបាម៉ាបានបញ្ជាក់ច្បាស់ៗថា សង្រ្គាមត្រជាក់បានបិទបញ្ចប់មែន ហើយការគំរាមកំហែងសង្រ្គាមនុយក្លេអ៊ែរក៏បានកាត់បន្ថយដែរ តែហានិភ័យនៃការវាយប្រហារនុយក្លេអ៊ែរមានការកើនឡើង ព្រោះបរិមាណនៃសំណល់អាវុធនុយក្លេអ៊ែរនៅបន្តមានច្រើនណាស់នៅក្នុងលោក។ ជាការពិត អ្វីដែលលោកអូបាម៉ាបានលើកឡើងកាលពី ៧ឆ្នាំមុនមិនខុសទេ តែបញ្ហានៅត្រង់ថា ៧ឆ្នាំក្រោយមក ស្ថានការណ៍ក្នុងលោកមានការប្រែប្រួលច្រើនណាស់ រួមមាន ការផ្ទុះបដិវត្តន៍អារ៉ាប់ ការបន្តសាកល្បងនុយក្លេអ៊ែរ និងគ្រាប់មីស៊ីលរបស់កូរ៉េខាងជើង ឬមួយក៏ការទន្ទ្រានយកទឹកដីប្រទេសផ្សេង ដូចករណីរុស្ស៊ីក្រសោបយកទឹកដីគ្រីមេរបស់អ៊ុយក្រែនជាដើម។
លោកអាស្តុន កាទ័រទិតៀនរុស្ស៊ី តែសរសើរចិន
លោករដ្ឋមន្រ្តីការពារជាតិអាមេរិកអាស្តុន កាទ័របានរិះគន់ ទិតៀនរុស្ស៊ីខ្លាំងៗ និងបានលើកសរសើរប្រទេសចិន។ តាមលោកកាទ័រ រុស្ស៊ីសម័យថ្មីដែលកំពុងគ្រប់គ្រងដោយលោកប្រធានាធិបតីពូទីនកំពុងធ្វើឲ្យពិភពលោកព្រួយបារម្ភខ្លាំងជាងសម័យសហភាពសូវៀតក្នុងសង្រ្គាមត្រជាក់ទៅទៀតទាក់ទងនឹងការប្រើប្រាស់អាវុធនុយក្លេអ៊ែរ។ លោកកាទ័រចង់និយាយថា នៅក្នុងសម័យសហភាពសូវៀត ថ្នាក់ដឹកនាំជំនាន់នោះហាក់ដូចជាមានការអត់ធ្មត់ច្រើន យល់ដឹងច្រើន និងមានការពិចារណាខ្ពស់។ តែចំពោះថ្នាក់ដឹកនាំរុស្ស៊ីសម័យថ្មីនេះវិញ គឺមានះចង់ធ្វើអ្វីតាមតែកំហឹងដោយគ្មានការពិចារណារកហេតុផល និងផលវិបាក។
លោកកាទ័របានគូសបញ្ជាក់ថានៅក្រោយការច្បាមយកដែនដីគ្រីមេរបស់អ៊ុយក្រែនពីរុស្ស៊ី លោកពូទីនបានថ្លែងជាសាធារណៈថា លោកបានត្រៀមខ្លួននឹងប្រើអាវុធនុយក្លេអ៊ែរជាស្រេចនៅក្នុងប្រតិបត្តិការវាយយកតំបន់គ្រីមេកាលណោះ។ ដោយឡែក ទន្ទឹមនឹងការរិះគន់ ទិតៀនរុស្ស៊ីរបស់លោកពូទីន លោកកាទ័របានឆ្លៀតសរសើរចិនដែលលោកយល់ថា ជាប្រទេសដែលបានប្រកាន់ឥរិយាបទប្រកបដោយវិជ្ជាជីវៈខ្ពស់ក្នុងសំណុំរឿងនុយក្លេអ៊ែរ នោះបើទោះបីជាចិនកំពុងមានអាវុធនុយក្លេអ៊ែរច្រើន និងគុណភាពខ្ពស់ក៏ដោយ។
តើការដែលលោករដ្ឋមន្រ្តីការពារជាតិអាមេរិកប្រកាសធ្វើទំនើបកម្មគ្រាប់មីស៊ីល និងការអភិវឌ្ឍថ្មីបន្ថែមពេលនេះ មិនមែនជាការប្រកាសឲ្យពិភពលោកផ្តើមប្រកួតប្រជែងគ្រឿងសព្វាវុធជាថ្មីឡើងវិញទេឬយ៉ាងណា?។ លោកកាទ័រឆ្លើយថា អត់ទេ តែដើម្បីដើរឲ្យទាន់អ្នកផ្សេងក្នុងគោលដៅការពារខ្លួន និងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ