សហគមន៍អន្តរជាតិអំពាវនាវឲ្យមានភាពស្ងប់ស្ងាត់នៅសាធារណរដ្ឋប្រជាធិបតេយ្យកុងហ្គោ
នៅថ្ងៃសៅរ៍ ទី២៤ កញ្ញា អង្គការសហប្រជាជាតិ សហភាពអាហ្រ្វិក សហភាពអឺរ៉ុប និងអង្គការនៃប្រទេសនិយាយភាសាបារាំងបានអំពាវនាវរួមគ្នាឲ្យមានភាពស្ងប់ស្ងាត់ ឲ្យមានកិច្ចសន្ទនានយោបាយ និងការរៀបចំបោះឆ្នោតដោយសេរី យុត្តិធម៌ និងតម្លាភាពនៅសាធារណរដ្ឋប្រជាធិបតេយ្យកុងហ្គោ។ ការអំពាវនាវនេះបានធ្វើឡើង ចំពេលដែលកម្តៅនយោបាយនៅសាធារណរដ្ឋប្រជាធិបតេយ្យកុងហ្គោកំពុងឡើងដល់កម្រិតកំពូលជាមួយនឹងការស្លាប់មនុស្សជាច្រើននាក់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីអំពាវនាវរួមគ្នារបស់អង្គការសហប្រជាជាតិ សហភាពអាហ្រ្វិក សហភាពអឺរ៉ុប និងអង្គការនៃប្រទេសនិយាយភាសាបារាំងត្រូវបានផ្សព្វផ្សាយនៅក្នុងទីក្រុងញូយ៉កចំពេលដែលអង្គការសហប្រជាជាតិកំពុងបន្តមហាសន្និបាតប្រចាំឆ្នាំលើកទី៧១ របស់ខ្លួន។ សេចក្តីថ្លែងការណ៍រួមរបស់អង្គការអន្តរជាតិទាំង ៤ បានអំពាវានាវដល់គ្រប់ភាគីនយោបាយទាំងអស់ឲ្យមានការអត់ធ្មត់នៅក្នុងសកម្មភាពនយោបាយ ក៏ដូចជានៅក្នុងការថ្លែងរបស់ខ្លួន ពិសេសជំរុញក្រុមសកម្មជនរបស់ខ្លួនកុំឲ្យប្រើប្រាស់អំពើហិង្សាសងសឹកគ្នាទៅវិញ ទៅមក។
ទន្ទឹមគ្នានេះ អង្គការអន្តរជាតិទាំង ៤ ក៏បានស្នើឲ្យរដ្ឋអំណាចចូលរួមជួយការពារសិទ្ធិមនុស្ស និងគោរពសេរីភាពជាមូលដ្ឋាន រួមទាំងសេរីភាពក្នុងការធ្វើបាតុកម្មអហិង្សាផង។ នៅក្នុងសេចក្តីថ្លែងការណ៍រួមដដែល អង្គការអន្តរជាតិទាំង ៤ បានគូសបញ្ជាក់ថា ភាគីជម្លោះនីមួយៗមានចំណែកទទួលខុសត្រូវលើផលវិបាកទាំងឡាយដែលបានកើតចេញ និងដែលអាចកើតចេញពីទង្វើហិង្សា ការបំពានច្បាប់ និងការមិនគោរពគ្នាទៅវិញ ទៅមក។ ដោយបន្តគាំទ្រ និងជួយជំរុញកិច្ចសន្ទនាដែលកំពុងមានសព្វថ្ងៃ អង្គការអន្តរជាតិបានអះអាងថា មានតែកិច្ចសន្ទនាទេដែលនឹងឈានដល់ការបង្កើតឲ្យមានបរិយាកាសនៃការទុកចិត្តគ្នា និងឈានដល់ការរៀបចំបោះឆ្នោតមួយដោយសេរី យុត្តិធម៌ និងតម្លាភាព។
ដោយឡែក និងក្រៅពីអំពាវនាវដល់ភាគីពាក់ព័ន្ធផ្ទាល់ក្នុងកិច្ចចរចានយោបាយ អង្គការអន្តរជាតិទាំង ៤ ក៏បានស្នើដល់ភាគីផ្សេងឲ្យដើរតួនាទីប្រកបដោយក្តីស្ថាបនាដើម្បីជួយឲ្យមានការរៀបចំបោះឆ្នោតនាពេលឆាប់ៗខាងមុខ។ ប្រតិកម្មរបស់អង្គការអន្តរជាតិទាំង ៤បានធ្លាក់មក ចំពេលដែលកម្តៅនយោបាយនៅសាធារណរដ្ឋប្រជាធិបតេយ្យកុងហ្គោកំពុងឡើងខ្លាំងនារយៈពេលចុងក្រោយនេះ។ អំពើហិង្សានយោបាយកាលពីថ្ងៃព្រហស្បតិ៍ និងថ្ងៃសុក្រ ទី២៣ កញ្ញាបានបណ្តាលឲ្យមានមនុស្សស្លាប់ជាច្រើននាក់ ហើយនៅពេលនេះ កិច្ចសន្ទនានយោបាយក៏ត្រូវបានផ្អាកមួយរយៈ។
វិបត្តិនយោបាយដែលកំពុងទាញសាធារណរដ្ឋប្រជាធិបតេយ្យកុងហ្គោឲ្យធ្លាក់ក្នុងភាពវឹកវរជាថ្មី គឺការព្យាយាមតោងអំណាចប្រធានាធិបតីរបស់លោក Joseph Kabila។ រដ្ឋធម្មនុញ្ញរបស់ប្រទេសបានហាមលោក Kabila ដែលបានកាន់តំណែងតាំងពីឆ្នាំ ២០០១ មិនឲ្យឈរឈ្មោះជាថ្មីទេ តែលោក Kabila ហាក់ដូចជាធ្វើមិនដឹងដោយនៅមិនទាន់បានបញ្ចេញកាយវិការណាមួយដើម្បីចុះចេញពីអំណាចទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ