បោះឆ្នោតនៅក្វាតេម៉ាឡា ក្រោមកំដៅតវ៉ារបស់ប្រជាជន
ថ្ងៃអាទិត្យ ទី៦កញ្ញានេះ ជាថ្ងៃដែលប្រជាជនប្រទេសក្វាតេម៉ាឡា ត្រូវចូលទៅបោះឆ្នោតជ្រើសរើសប្រធានាធិបតីថ្មី បន្ទាប់ពីប្រជាជនប្រទេស អាមេរិកកណ្តាលមួយនេះ បានងើបប្រឆាំងតវ៉ា ទម្លាក់អតីតប្រធានាធិបតី ចេញពីតំណែង ដោយសារតែអំពើពុករលួយ កាលពីដើមសប្តាហ៍នេះ។ ទោះបីជាយ៉ាងណា ប្រជាជនក្វាតេម៉ាឡា ភាគច្រើន មិនគាំទ្រការបោះឆ្នោតដោយតក់ក្រហល់បែបនេះទេ ព្រោះពួកគេ បានទាមទារនូវ ការកែទម្រង់ចាំបាច់ ជាច្រើនចំណុច ជាមុនសិន ដូចជាប្រព័ន្ធបោះឆ្នោត និងការគ្រប់គ្រងគណបក្សនយោបាយជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
ប្រជាជនក្វាតេម៉ាឡា យ៉ាងហោចណាស់ ៧លាន ៥សែន នាក់ ដែលត្រូវជ្រលក់ម្រាមដៃ ក្នុងទឹកខ្មៅ នៅថ្ងៃអាទិត្យទី ៦ កញ្ញា នេះ ដើម្បីជ្រើសរើសប្រធានាធិបតីថ្មី។ ព្រមគ្នានេះដែរ នេះគឺជាការបោះឆ្នោត ដោយកញ្ចប់ ដោយបូករួមទាំងការជ្រើសរើសតំណាងរាស្ត្រ និងប្រធានឃុំសង្កាត់។
បាតុកម្មអហឹង្សា បណ្តេញប្រធានាធីបតីពុករលួយ ពីតំណែង៖
សូមរំលឹកថា កាលពីដើមសប្តាហ៍នេះ ប្រជាជនប្រទេសអាមេរិកកណ្តាល ដ៏ក្រីក្រមួយនេះ បានងើបបះបោរបណ្តេញលោកប្រធានាធិបតី Otto Perez ដែលពួកគេបានចោទថាបានដឹកនាំប្រទេស ឲ្យធ្លាក់កប់ទៅក្នុងអំពើពុករលួយស៊ីរូង ទន្ទឹមពេលដែលជីវភាពប្រជាជនក្រីក្រ កាន់តែលំបាកទៅៗ។ ប្រជាជនក្វាតេម៉ាឡា បានជួបជុំធ្វើបាតុកម្មអហឹង្សា ជារៀងរាល់ថ្ងៃសៅរ៍ ចាប់តាំងពីខែមេសាមកម្លេះ ដើម្បីបរិហារ ពីសកម្មភាពពុករលួយ របស់មន្ត្រីដឹកនាំប្រទេស ហើយពួកគេទាមទារ ឲ្យមានការផ្លាស់ប្តូរ។
លោកស្រី Rigoberta Menchu ជ័យលាភីណូបែលសន្តិភាពឆ្នាំ១៩៩២ បានអបអរចំពោះជ័យជំនះ របស់ប្រជាជនក្វាតេម៉ាឡា ដែលលោកស្រីបានចាត់ទុកថា វាគឺជាគម្រូ ឲ្យដល់ប្រជាជនដទៃទៀត ដែលមិនទាន់មានសេចក្តីក្លាហាន ហ៊ានងើបប្រឆាំង នឹងរបបផ្តាច់ការពុករលួយ។
ក្រៅពីការទាមទារឲ្យប្រធានាធីបតី Otto Perez ចុះចេញពីតំណែង ប្រជាជនក្វាតេម៉ាឡា បានទាមទារនូវកំណែទម្រង់ជាច្រើនចំណុច ដោយផ្តើមចេញពី ការរៀបចំប្រព័ន្ធបោះឆ្នោតថ្មី ដើម្បីធានាឲ្យបានការគោរពលទ្ធិប្រជាធិបតេយ្យពេញលេញ។ ក្រៅពីនេះ នៅមានការកែប្រែច្បាប់គ្រប់គ្រងគណបក្សនយោបាយ ព្រមទាំងច្បាប់គ្រប់គ្រងមុខងារសាធារណៈផងដែរ ដើម្បីឈានទៅលប់បំបាត់ អំពើពុករលួយ តាមស្ថាប័នរដ្ឋ។
បោះឆ្នោតតក់ក្រហល់ ជាឆាកល្ខោនរបស់គណបក្សកាន់អំណាច៖
ប្រជាជនក៏ដូចជា គណបក្សនយោបាយតូចៗជាច្រើន បានទាមទារឲ្យពន្យារពេលបោះឆ្នោត ដើម្បីធ្វើកំណែទម្រង់ចាំបាច់ លើច្បាប់បោះឆ្នោត ព្រោះក្នុងលក្ខខណ្ឌបច្ចុប្បន្ននេះ បើបោះឆ្នោតទៅ គឺប្រព័ន្ធចាស់ដដែល ដូច្នេះ បោះដូចជាមិនបោះអញ្ចឹង។ ប៉ុន្តែការទាមទារនេះ ត្រូវបានតុលាការចាត់ចែង កិច្ចការបោះឆ្នោតបដិសេធ។
កាលពីថ្ងៃសៅរ៍ ទី៥កញ្ញា ក្បួនបាតុករស្លៀកខ្មៅពាក់ខ្មៅ បានដើរតវ៉ាពេញទីក្រុង ដោយបិរហារថា ការបោះឆ្នោតនៅថ្ងៃអាទិត្យនេះ គ្រាន់តែជាឆាកល្ខោន ព្រោះអ្វីៗ ស្ថិតក្នុងប្រពន្ធ័ចាស់ ក្នុងកណ្តាប់ដៃរបស់គណបក្សប្រធានាធិបតីពុករលួយដដែល។
លោក បាន គីមូន បានអំពាវនាវ ឲ្យប្រជាជនក្វាតេម៉ាឡា រក្សាការស្ងៀមស្ងាត់ ឲ្យចូលរួមបោះឆ្នោតដោយ សន្តិវិធី។ ការចូលរួមបោះឆ្នោត ឲ្យបានច្រើនកុះករ និងដោយសេរីយុត្តិធម៌ គឺជាអាវុធតែមួយគត់ ក្នុងការប្រយុទ្ធ ដើម្បីផ្លាស់ប្តូររបបដឹកនាំ។ គួរបញ្ជាក់ដែរថា ប្រជាជនក្វាតេម៉ាឡា ដែលក្រីក្រ អាចនឹងត្រូវគេអូសទាញ ឲ្យលក់សន្លឹកឆ្នោត បានយ៉ាងងាយ។
ក្រៅពីបេក្ខជនប្រធានាធិបតីចំនួន ១៤រូប ប្រជាជនក៏ត្រូវជ្រើសរើសផងដែរ តំណាងរាស្រ្ត ១៥៨រូប និងតំណាងឃុំសង្កាត់មូលដ្ឋាន ៣៣៨រូប។ ការបោះឆ្នោតជុំទីពីរ នឹងត្រូវប្រព្រឹត្តិទៅ នៅថ្ងៃទី ២៥ តុលា ខាងមុខ។ ចំណែកលោក អតីតប្រធានាធិបតី Otto Perez ដែលត្រូវបង្ខំចិត្តចុះចេញពីដំណែងដោយអាម៉ាស កំពុងតែរងចាំស្តាប់លទ្ធផលបោះឆ្នោត ពីមន្ទីរឃុំឃាំង ដែលលោកត្រូវបានគេឃុំទុក រហូតដល់ថ្ងៃអង្គារសប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ