ទស្សនកិច្ចលោកអូបាម៉ា នៅប្រទេសកេនយ៉ា ស្រុកកំណើតរបស់ឪពុកលោក
វាជាលើកទីមួយសម្រាប់លោក បារ៉ាក់ អូបាម៉ា ដែលបានធ្វើដំណើរទៅ បំពេញទស្សនកិច្ច នៅប្រទេសកេនយ៉ា ក្នុងនាមជាប្រធានាធិបតីសហរដ្ឋអាមេរិក។ លោក អូបាម៉ា ដែលឪពុកលោក មានស្រុកកំណើត នៅប្រទេសកេនយ៉ា បានអះអាងថា ដំណើរទស្សនកិច្ចផ្លូវរដ្ឋនេះ គឺ លោកធ្វើឡើងដើម្បីពង្រីកទំហំទំនាក់ទំនង រវាងសហរដ្ឋអាមេរិក និងទ្វីបអាហ្វ្រិកទាំងមូល។
ចុះផ្សាយនៅថ្ងៃ៖
ស្តាប់ - ០១:៤៦
មុននឹងឡើងយន្តហោះ ទៅកាន់កេនយ៉ា កាលពីថ្ងៃពុធ លោកបារ៉ាក់ អូបាម៉ា បានអញ្ជើញមន្ត្រីទូត និងតំណាងអង្គការនានា ដែលមានបេសកកម្មនៅទ្វីបអាហ្វ្រិក ដើម្បីជួបពិភាក្សាគ្នា នៅសេតវិមាន ក្រុងវ៉ាស៊ីនតោន។
ថ្លែងក្នុងឱកាសនោះ លោកអូបាម៉ា បានមានប្រសាសន៍ថា ទ្វីបអាហ្វ្រិក គឺជាទ្វីបដែលកំពុងតែមានសន្ទុះរីកចំរើន មិនគួរឲ្យចង់ជឿ ហើយជាទីផ្សារដ៏ធំសម្រាប់កំណើនសេដ្ឋកិច្ច ពិភពលោកទាំងមូល។ ហេតុដូច្នេះហើយ បានជាក្នុងនាមលោកជាប្រធានាធិបតីសហរដ្ឋអាមេរិក លោកនឹងខិតខំធ្វើយ៉ាងណា ដើម្បីពង្រីកវិសាលភាព នៃទំនាក់ទំនង រវាងសហរដ្ឋអាមេរិក និងទ្វីបអាហ្វ្រិក ឲ្យបានកាន់តែទូលំទូលាយ។ វិសាលភាពដែលលោកអូបាម៉ាចង់សំដៅនេះ គឺកម្រិតនៃការនាំចេញ របស់សហរដ្ឋអាមេរិក ទៅទ្វីបអាហ្វ្រិក។
ជាការពិតណាស់ ដំណើរទស្សនកិច្ចរបស់លោកប្រធានាធិបតីអាមេរិក នៅប្រទេសកេនយ៉ា ថ្ងៃនេះ គឺផ្តោតសំខាន់ តែទៅលើវិស័យពាណិជ្ជកម្ម ដែលលោកអូបាម៉ា នឹងធ្វើការដឹកនាំវេទិកាសេដ្ឋកិច្ចមួយ ជាមួយនឹងភាគី កេនយ៉ា។ ក្រៅពីនេះ គេមិនប្រាកដទេ ថា លោកបារ៉ាក់អូបាម៉ា និងពិភាក្សាពីបញ្ហាសន្តិភាព ការប្រយុទ្ធប្រឆាំងនឹងភេរវនិយម របស់ក្រុមអ៊ីស្លាមជ្រុលនិយមនៅអាហ្វ្រិក។ អំពើភេរវកម្ម ដែលស្ថានទូតអាមេរិក ប្រចាំនៅ រដ្ឋធានីកេនយ៉ា ខ្លួនឯងផ្ទាល់ធ្លាប់បានទទួលរង កាលពីឆ្នាំ១៩៩៨ ដែលបានសម្លាប់មនុស្សជាង២០០នាក់ ក្នុងនោះ មានជនជាតិអាមេរិក១២ នាក់ផងដែរ។
ដោយឡែក កម្មវិធីលំអិត ស្តីពីម៉ោងពេលទៅដល់ និងដំណើរទស្សនកិច្ចនេះ ត្រូវបានអាជ្ញាធរកេនយ៉ា ប្រកាសឲ្យគេឯងដឹងឮ ទូរទាំងពិភពលោក ដែលនេះ វាជាការធ្វេសប្រហែលមួយធំណាស់ សម្រាប់សន្តិសុខ របស់ប្រធានាធិបតីអាមេរិក។ ទោះបីជាយ៉ាងណា ក៏ដោយ អ្នកនាំពាក្យសេតវិមាន បានបញ្ជាក់ថា វានឹងមិនមានការផ្លាស់ប្តូរណាមួយទេ ទាក់ទិននឹងកម្មវិធីទស្សនកិច្ចនេះ បើទោះបីជាត្រូវ បានគេប្រកាសអស់ហើយក្តី។ អ្នកនាំពាក្យបន្តថា លោកអូបាម៉ា ទៅកេនយ៉ា មិនមែនទៅអ៊ីរ៉ាក់ រឺអាហ្វហ្កានីស្ថានឯណា ដូច្នេះគ្មានអ្វីត្រូវព្រួយបារម្ភជ្រុលហួសហេតុនោះទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ