នៅកូឡុំប៊ី ពួកឧទ្ទាមងាកបែរពីការផលិតកូកាអ៊ីន ទៅធ្វើអាជីវកម្មជីកមាស និងត្បូង
ចុះផ្សាយនៅថ្ងៃ៖
ស្តាប់ - ០៤:៣០
របាយការណ៍មួយរបស់ការិយាល័យប្រយុទ្ធប្រឆាំងគ្រឿងញៀនរបស់អង្គការសហប្រជាជាតិ ចេញផ្សាយ នៅចុងសប្តាហ៍ មុន បង្ហាញថា ចំនួនដីដាំដើមកូកា បានថយចុះច្រើន នៅអាមេរិកឡាទីន។ នៅកូឡុំប៊ី ទំហំដីដើមកូកា ដែលជាធាតុផ្សំសំខាន់សម្រាប់ផលិតថ្នាំញៀន កូកាអ៊ីន បានថយចុះ ប្រមាណ២៥ភាគរយ នៅឆ្នាំ ២០១២។ តើមានមូលហេតុអ្វីខ្លះដែលធ្វើឲ្យចំការដាំដើមកូកាថយចុះនៅអាមេរិកឡាទីន?
កូឡុំប៊ី បានជាប់ចំណាត់ថា្នក់ជាមួយប្រទេសបូលីវី និងប្រទេសប៉េរូ ថា ជាក្រុមប្រទេសអាមេរិកឡាទីន ធំបីនៅក្នុងពិភពលោកខាងផលិតថ្នាំញៀន កូកាអ៊ីន។ នៅប្រទេសកូឡុំប៊ី ពួកឧទ្ទាមទ័ពព្រៃ និងពួកក្រុមជនខិលខូច បានសាបព្រួសដាំដើមកូការាប់ម៉ឺនហិចតា។ ពួកទ័ពព្រៃបានធ្វើអាជីវកម្មដាំ និងផលិតថ្នាំញៀនកូកាអ៊ីន ដើម្បីយកលុយមកទិញកាំភ្លើងសម្រាប់តស៊ូប្រយុទ្ធប្រឆាំងនឹងទ័ពរដ្ឋាភិបាលកូឡុំប៊ី។
ប៉ុន្តែ ក្នុងនាមជាប្រទេសធំមួយ ខាងផលិតថ្នាំញៀនកូកាអ៊ីន កូឡុំប៊ីបានចាត់វិធានការរាប់ឆ្នាំដើម្បីប្រយុទ្ធប្រឆាំងនឹងការផលិត និងការជួញដូរថ្នាំញៀនខុសច្បាប់ ទៅតាមការដាក់សម្ពាធពីលុយជំនួយអាមេរិកាំង។ ជាលទ្ធផល ក្នុងរយៈពេល១០ឆ្នាំ ដីចម្ការដាំដើមកូកានៅកូឡុំប៊ីបានថយចុះពី១សែន ៤ម៉ឺន ហិចតា នៅឆ្នាំ ២០០១ មកនៅជាង៤ម៉ឺនហិចតា នៅឆ្នាំ ២០១២។ នៅឆ្នាំ ២០១២ ដីចម្ការថយចុះដល់ទៅ ២៥ភាគរយ នៅពេលដែលការផលិតថ្នាំកូកាអ៊ីនបានថយចុះដែរពី៣៤៥តោន មកត្រឹម៣០៩តោន។ តម្លៃជួញដូរថ្នាំញៀនកូកាអ៊ីនបានថយចុះពី៤២២លានដុល្លារ នៅឆ្នាំ ២០១១ មកនៅត្រឹម៣៧០លានដុល្លារ នៅឆ្នាំ ២០១២។ នេះបើតាមរបាយការណ៍របស់អង្គការសហប្រជាជាតិ ផ្នែកប្រយុទ្ធប្រឆាំងគ្រឿងញៀន។
តាំងពីមុនពេលចេញផ្សាយរបាយការណ៍របស់អង្គការសហប្រជាជាតិម្ល៉េះ កងទ័ពកូឡុំប៊ីបានអបអរស្នាដៃការងាររបស់ពួកគេ ក្នុងការប្រយុទ្ធប្រឆាំងនឹងការជួញដូរថ្នាំញៀន។ បើតាមប្រមុខកងទ័ពកូឡុំប៊ី មានមូលហេតុបីដែលធ្វើឲ្យដីចម្ការដាំដើមកូកាថយចុះ។
ទីមួយ គឺយុទ្ធនាការ ក្រុមទាហានដើរកាប់បំផ្លាញចម្ការកូកា និងការបង្រ្កាបក្រុមអ្នកផលិត និងជួញដូរថ្នាំញៀនកូកាអ៊ីន។ ទីពីរ រដ្ឋាភិបាលបានលើកទឹកចិត្តប្រជាជនឲ្យឈប់ធ្វើកសិកម្មលើដើមកូកា ដែលច្បាប់ហាមឃាត់ និងបែរមកដាំអ្វីផ្សេងវិញ។ ទីបី គឺ ដោយសារកម្លាំងចុះខ្សោយនៃចលនាឧទ្ទាមFarce ។ បើតាមមន្រ្តីការពារជាតិកូឡុំប៊ី ចំនួនទ័ពព្រៃFarce ដែលបានប្រឆាំងនឹងរដ្ឋាភិបាលជាង៥ទសវត្សរ៍មកហើយនោះ បានថយចុះកម្លាំង មកនៅតិចជាង ៨ពាន់នាក់ ហើយមេដឹកនាំរបស់ពួកគេត្រូវបានទាហានរដ្ឋាភិបាលបាញ់សម្លាប់អស់ជាច្រើននាក់។ ក្រុមឧទ្ទាមទ័ពព្រៃជាអ្នកជំនាញដាំ និងផលិតថ្នាំកូកាអ៊ីន ដូច្នេះ បើកម្លាំងទ័ពព្រៃថយចុះ នោះ ការផលិតថ្នាំញៀនកូកាអ៊ីនខុសច្បាប់ ក៏ថយចុះដែរ។
អ្នកសរសេររបាយការណ៍របស់អង្គការសហប្រជាជាតិយល់ស្របដែលថា ការងាររបស់រដ្ឋាភិបាលបានជំរុញឲ្យការដាំ និងផលិតថ្នាំញៀនកូកាអ៊ីនធ្លាក់ចុះនៅកូឡុំប៊ី។ ប៉ុន្តែ ការងារតែមួយមុខរបស់រដ្ឋាភិបាល មិនមែនមូលហេតុសំខាន់ធ្វើឲ្យចំនួនដីចំការ ដាំដើមកូកាធ្លាក់ចុះ គួរឲ្យកត់សំគាល់ នៅលើកនេះទេ។
អ្នកជំនាញអាមេរិកាំង ខាងតាមដានការផលិតថ្នាំញៀន នៅអាមេរិឡាទីន បានលើកឡើងថា ចំនួនដីចម្ការដើមកូកាថយចុះ ដោយសារតែពួកឧទ្ទាមទ័ពព្រៃ និងពួកជនប្រដាប់អាវុធម៉ាហ្វីយ៉ាបានបោះបង់ចោលកសិកម្មដើមកូកា និងបែរទៅរកការធ្វើអាជីវកម្មមាស និងត្បូងវិញ ដែលងាយស្រួលរកលុយ បានរហ័ស និងគ្មានគ្រោះថ្នាក់ ដូចថ្នាំញៀនកូកាអ៊ីន។ នៅកូឡុំប៊ី បើទោះបីជាសកម្មភាពជីកមាស ធ្វើឡើងដោយខុសច្បាប់ក្តី ប៉ុន្តែ កងទ័ពរដ្ឋាភិបាលកូឡុំប៊ីបានបន្ធូរដៃ មិនសូវសស្រាក់សស្រាំបង្រ្កាបប៉ុន្មានទេ នោះ គឺ ដោយសារតែអាជីវកម្មមាស និងត្បូងមានតម្លៃ មិនមែនជាមុខសញ្ញាទាមទាររបស់អាមេរិក ដែលជាម្ចាស់ជំនួយ។
មួយវិញ ការផលិតថ្នាំញៀន នៅកូឡុំប៊ី បានធ្លាក់ចុះ ដូចនៅបូលីវី ដោយសារតែតម្រូវការធ្លាក់ចុះ។ ពួកឧទ្ទាមទ័ពព្រៃ និងក្រុមទុច្ចរិត កូឡុំប៊ី ដែលជាអ្នកទិញ និងជួញដូរថ្នាំញៀន មានការលំបាកកាន់តែខ្លាំង មិនអាចជ្រៀតចូលក្នុងទីផ្សារងងឹតគ្រឿងញៀន ដែលពេលនេះ គ្រប់គ្រងដោយក្រុមម៉ាហ្វីយ៉ា Cartel នៅម៉ិកស៊ិក។ របរដាំដើមកូកាលែងសូវត្រចះត្រចង់ដូចក្នុងអតីតកាលទៀតហើយ នៅកូឡុំប៊ី។ ជារួម មិនមែនការបង្រ្កាបរបស់រដ្ឋាភិបាលដែលធ្វើឲ្យអ្នកដាំ និងផលិតកូកាអ៊ីនរាងចាល បញ្ឈប់អាជីវកម្មរបស់ខ្លួនទេ ប៉ុន្តែ គឺតម្លៃធ្លាក់ចុះក្នុងទីផ្សាររបស់ស្លឹកកូកា ទេ ដែលជាមូលហេតុសំខាន់ធ្វើឲ្យប្រជាជនបាក់ទឹកចិត្តលែងចង់ដាំដើមកូកាទៀត។ គួរដឹងថា នៅកូឡុំប៊ី ម្ចាស់ចម្ការដើមកូកាបច្ចុប្បន្ន អាចរកប្រាក់ចំណូលបានប្រមាណតែ ១២២០ដុល្លារតែប៉ុណ្ណោះ ក្នុងមួយឆ្នាំ។ ប្រាក់ចំណូលទាប ហើយ ម្ចាស់ចំការ ឬក្រុមឧទ្ទាមត្រូវទទួលរងការបង្រ្កាប របស់អាជ្ញាធរកូឡុំប៊ី ដោយសារតែការដាំដើមកូកា ជាកសិកម្មខុសច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ