សន្ទរកថាពេញដោយខ្លឹមសារគំរាម របស់លោកដូណាល់ ត្រាំ នៅអង្គការសហប្រជាជាតិ
ចុះផ្សាយនៅថ្ងៃ៖
ស្តាប់ - ០៦:៥៤
កាលពីថ្ងៃអង្គារទី ១៩ កញ្ញាលោកដូណាល់ ត្រាំ ប្រធានាធិបតីសហរដ្ឋអាមេរិក បានថ្លែងសន្ទរកថា ជាលើកទីមួយ នៅចំពោះមុខមហាសន្និបាតនៃអង្គការសហប្រជាជាតិ។ ខ្លឹមសាររួមនៃសន្ទរកថានេះ ត្រូវបានថ្នាក់ដឹកនាំ ព្រមទាំងអ្នកវិភាគនយោបាយការបរទេសជាច្រើន រិះគន់ ព្រោះវាពោរពេញទៅដោយ ពាក្យគំរាម ប្រមាថ និងការប្រើកំលាំង ជាជាងការប្រមូលផ្តុំគ្នា ដោះស្រាយបញ្ហាដោយសន្តិវិធី។ មិនត្រឹមតែប៉ុណ្ណោះ លោកដូណាល់ ត្រាំ បានឆ្លៀតទាំងរំលឹកម្តងទៀតថា ទោះក្នុងកាលៈទេសៈណាក៏ដោយ គឺគាត់តំកល់ផលប្រយោជន៍អាមេរិកជាចំបង។
កំទេចកូរ៉េខាងជើង ឲ្យខ្ទេចក្លាយជាផេះ!
នៅចំពោះមុខថ្នាក់ដឹកនាំប្រទេសទាំង១៩៣ ក្នុងអង្គមហាសន្និបាតនៃអង្គការសហប្រជាជាតិ លោកដូណាល់ ត្រាំ ប្រធានាធិបតីសហរដ្ឋអាមេរិក បានថ្លែងសន្ទរកថាជាលើកទីមួយ ដោយបានសង្កត់ធ្ងន់ទៅលើសំណុំរឿងជាច្រើន ដូចជាបញ្ហាកូរ៉េខាងជើង បញ្ហាអ៊ីរ៉ង់ និងបញ្ហាសេដ្ឋកិច្ចពិភពលោកជាដើម។ ពាក្យធ្ងន់ៗ ដែលលោកដូណាល់ ត្រាំ បានប្រើ គឺគាត់បាននិយាយគំរាម ទៅលើកូរ៉េខាងជើង នៅចំពោះមុខអង្គមហាសន្និបាតតែម្តង ថា “បើចាំបាច់ដើម្បីការពារខ្លួន ឬការពារសម្ព័ន្ធមិត្តខ្លួន អាមេរិក នឹងកំទេចកូរ៉េខាងជើង ឲ្យរលាយក្លាយជាផេះតែម្តង”។ លោក ដូណាល់ ត្រាំ ក៏បានចាត់ទុក មេដឹកនាំកូរ៉េខាងជើង គីម ជុងអ៊ុន ថាជា «Rocket Man» ហើយថា បើសិនជាកូរ៉េខាងជើងចង់សាកល្បង គឺមិនខុសពីការសម្លាប់ខ្លួនឯងទេ។
តាមពិតទៅ សម្តីបែបកំរោល ពោរពេញដោយពាក្យគំរាមធ្ងន់ៗបែបនេះ គេធ្លាប់បានឃើញលោកត្រាំ សរសេរក្នុងសារលើទំព័រTwitter របស់គាត់ជាញឹកញាប់ហើយ។ តែយ៉ាងណា ការយកវេទិកា អង្គមហាសន្និបាតអង្គការសហប្រជាជាតិ មកនិយាយគំរាមប្រើកំលាំង ជះកំហឹងបែបនេះ គឺវាហាក់ផ្ទុយស្រឡះពី គោលការណ៍គ្រិះនៃអង្គមហាសន្និបាតនេះ ដែលជាទីកន្លែងជួបជុំគ្នាដើម្បីកសាងសន្តិភាព មិនមែនបញ្ឆេះភ្លើងសង្រ្គាមទេ។
មួយវិញទៀត អ្នកវិភាគជាច្រើន បានលើកថា ការគំរាមកំទេចកូរ៉េខាងជើង យ៉ាងចំហរដូចនេះ មិនអាចដោះស្រាយបញ្ហាបានទេ ព្រោះវារឹងរឹតតែធ្វើឲ្យរបបផ្តាច់ការកូរ៉េខាងជើង បានលេសនេះ ដើម្បីពង្រឹងពង្រីកអាវុធនុយក្លេអ៊ែររបស់ពួកគេ ឲ្យកាន់តែមានប្រសិទ្ធិភាព។ កូរ៉េខាងជើង នឹងយកលេសនេះ ទៅប្រកាសប្រាប់ប្រជាជនគេ និងពិភពលោកទាំងមូល ថា ឃើញទេ អាមេរិកគំរាមកំទេចប្រទេសគេ ដូច្នេះ គេត្រូវតែរកវិធីការពារខ្លួន អញ្ចឹងហើយ។
ក្នុងន័យនេះ អ្នកវិភាគខ្លះយល់ថា លោកដូណាល់ ត្រាំ កំពុងធ្លាក់ចូលអន្ទាក់របស់ គីម ជុងអ៊ុន ព្រោះអ្វីដែលគីម ជុងអ៊ុនចង់បាន គឺចង់ឃើញអាមេរិកគំរាមកំទេចកូរ៉េខាងជើងដោយចំហរបែបនេះ ដើម្បីឲ្យមតិសាធារណៈយល់ថា អាមេរិកដើរក្អេងក្អាង វាយគេវាយឯង។ ដូច្នេះ កូរ៉េខាងជើងផលិតអាវុធនុយក្លេអ៊ែរទុកការពារខ្លួន គឺជារឿងត្រឹមត្រូវហើយ។ ចំណុចទាំងអស់នេះ ហើយ ដែលអ្នកជំនាញកិច្ចការអន្តរជាតិខ្លះ យល់ថា លោកត្រាំ មិនគួរនិយាយពាក្យទាំងអស់នេះទេ។
អ៊ីរ៉ង់ ជាប្រទេសយូកូងបាតផ្សារ!
លោកដូណាល់ ត្រាំ មិនមែនត្រឹមតែគំរាមបន្តដាក់ទណ្ឌកម្មសេដ្ឋកិច្ចលើអ៊ីរ៉ង់ទេ គាត់ថែមទាំងបានគំរាម ដកខ្លួនចេញពីកិច្ចព្រមព្រៀងគ្រប់គ្រងកម្មវិធីនុយក្លេអ៊ែរអ៊ីរ៉ង់ទៀតផង។ គោលជំហរដកខ្លួនចេញនេះ ក៏ត្រូវបានលោក រ៉ិច ធីលឺសុន រដ្ឋមន្ត្រីការបរទេសអាមេរិក បញ្ជាក់បន្ថែមដែរ។ ក្នុងសន្ទរកថា លោកដូណាល់ត្រាំ បានចាត់ទុក អ៊ីរ៉ង់ ថាជាប្រទេសយូកូងបាតផ្សារ។ សម្តី នេះ ត្រូវបានរដ្ឋមន្ត្រីក្រសួងការបរទេសអ៊ីរ៉ង់ ដែលមានវត្តមានក្នុងមហាសន្និបាតនោះដែរ បានចាត់ទុកថា ជាសម្តីក្អេងក្អាងមើលងាយគេ និងពេញដោយទឹកចិត្តស្អប់ឈ្នានីសអ៊ីរ៉ង់។
លោកដូណាល់ ត្រាំ ធ្លាប់បានបង្ហាញគោលជំហរ រិះគន់យ៉ាងធ្ងន់ៗ ទៅលើកិច្ចព្រមព្រៀង ដែលរដ្ឋាភិបាលលោកអូបាម៉ា បានចុះហត្ថលេខា កាលពីឆ្នាំ២០១៥។ លោកត្រាំ និយាយរំលឹកឡើងវិញថា កិច្ចព្រមព្រៀងនេះ ជាកិច្ចព្រមព្រៀង ដ៏អម៉ាសបំផុតសម្រាប់អាមេរិក ព្រោះថាវាជាកិច្ចព្រមព្រៀង ដែលសហគមន៍អន្តរជាតិចាញ់បោកអ៊ីរ៉ង់។ ជាមួយកិច្ចព្រមព្រៀងនេះ លោកត្រាំ យល់ថា អ៊ីរ៉ង់និងបន្តអភិវឌ្ឍន៍កម្មវិធីនុយក្លេអ៊ែរយោធា បានយ៉ាងងាយ។
សម្តីរបស់លោកដូណាល់ ត្រាំ មិនមែនមើលងាយតែប្រទេសហត្ថលេខី ថាមិនបានពិចារណាទេ តែជាពិសេសគឺវាបានមើលងាយដោយផ្ទាល់ ទៅលើភ្នាក់ងារអន្តរជាតិគ្រប់គ្រងកម្មវិធីនុយក្លេអ៊ែរ ហៅកាត់ថា AIEA ដែលជាអ្នកមានតួនាទីចំបង ក្នុងការត្រួតពិនិត្យកាតព្វកិច្ចរបស់អ៊ីរ៉ង់។ សម្រាប់មន្ត្រីជំនាញ ដែលស្គាល់សំណុំរឿងនុយក្លេអ៊ែរអ៊ីរ៉ង់ច្បាស់ សម្តីលោកត្រាំ ដែលចោទអ៊ីរ៉ង់ និងបន្ទោសកិច្ចព្រមព្រៀងនេះថាជាការចាញ់បោកអ៊ីរ៉ង់នោះ គឺលោកត្រាំ និយាយទាំងមិនដឹងរឿង និយាយទាំងមិនបានស្រាវជ្រាវថា កិច្ចព្រមព្រៀងនេះ មានយន្តការអ្វីខ្លះ មានចែងអ្វីខ្លះទេ។ ពោលគឺមានតែលោកដូណាល់ ត្រាំម្នាក់ឯងគត់ ដែលប្រកែកថាអ៊ីរ៉ង់ នៅតែអភិវឌ្ឍន៍នុយក្លេអ៊ែរយោធា តែសម្រាប់មន្ត្រីជំនាញរបស់ AIEA គេបានអះអាងជានិច្ច ថាអ៊ីរ៉ង់កំពុងអនុវត្តកិច្ចព្រមព្រៀងដោយត្រឹមត្រូវ។
យ៉ាងណាមិញ ប្រទេសហត្ថលេខីផ្សេងទៀត ជាពិសេសបារាំងតែម្តង បានរំលឹក ហើយថា បើអាមេរិក ដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ នោះគឺជារឿងមួយខុសធ្ងន់ណាស់។ វាជះផលអវិជ្ជមានដល់កិច្ចប្រឹងប្រែងរបស់សហគមអន្តរជាតិ ហើយក៏ជះផលអាក្រក់ដល់អាមេរិកខ្លួនឯងដែរ ដែលនិយាយបាតដៃខ្នងដៃ ចុះហត្ថលេខាហើយ ដកខ្លួនចេញវិញ ម្តងជាពីរដងដូចក្នុងករណីកិច្ចព្រមព្រៀងស្តីពីអាកាសធាតុជាដើម។ គំរូ នៃភាពជាអ្នកដឹកនាំ និងមហាអំណាចពិភពលោករបស់អាមេរិក នឹងសាបរលាបជាមិនខានទេ។
ផលប្រយោជន៍អាមេរិកធំជាងអ្វីៗទាំងអស់!
កន្លងមក លោកដូណាល់ ត្រាំ តែងតែនិយាយថា ផលប្រយោជន៍របស់អាមេរិក ត្រូវតែចំបងមុនគេ។ លោក ត្រាំ មិនអាចមិនលើកនិយាយពីទស្សនវិស័យ បែបការពារប្រយោជន៍ជាតិនិយមនេះ ទេ ព្រោះថាវាជាទស្សនវិស័យដែលលោកដូណាល់ត្រាំ ផ្តល់តំលៃជាទីផុត ពោលគឺអ្វីៗត្រូវផ្តើមចេញពីនេះទាំងអស់។ ក្នុងសន្ទរកថា លោកដូណាល់ ត្រាំនិយាយថា “ក្នុងនាមជាប្រធានាធិបតីអាមេរិក លោកតំកល់ផលប្រយោជន៍របស់អាមេរិក មុនដំបូងគេបង្អស់”។ លោកត្រាំក៏បានបន្តថា ថ្នាក់ដឹកនាំប្រទេសផ្សេងទៀត ក៏ត្រូវតែធ្វើអញ្ចឹងដែរ គឺត្រូវយកប្រយោជន៍ជាតិខ្លួនឯងជាចំបង មុនអ្វីៗទាំងអស់។
គាត់បន្ថែមទៀតថា “ប្រទេសទាំងអស់ត្រូវចាប់ដៃគ្នា ដើម្បីកសាងអនាគតរបស់ប្រជាជនរៀងៗខ្លួន ក្នុងពិភពលោកមួយដែលមានតែសន្តិភាព”។ ពាក្យមួយឃ្លានេះ មានអ្នកស្តាប់ខ្លះគេជ្រួញចិញ្ចើម សួរក្នុងចិត្តថា ម្តេចក៏លោកដូណាល់ ត្រាំ និយាយពីសន្តិភាពកើត បើគាត់ទើបតែបានគំរាមថាកំទេចកូរ៉េខាងជើង ឲ្យខ្ទេចក្លាយជាផេះ ហើយនិងបានគំរាមដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ មុននេះបន្តិចសោះ!
មានសារព័ត៌មានអន្តរជាតិជាច្រើន បានវិភាគសំដីរបស់លោកដូណាល់ ត្រាំថា លោកត្រាំ និយាយអត់ក្បាលអត់កន្ទុយ និងជាន់កែងឯង។ ឧទាហរណ៍ គាត់ថាប្រទេសទាំងអស់ត្រូវតែចាប់ដៃគ្នាធ្វើការ តែសួរថាធ្វើការដោយរបៀបណា បើគាត់អំពាវនាវឲ្យប្រទេសទាំងនោះ យកគំរូតាមគាត់ ដោយតំកល់ប្រយោជន៍ជាតិរៀងៗខ្លួនជាធំ។ ចាប់ដៃគ្នាធ្វើការ ទាល់តែតំកល់ប្រយោជន៍រួមជាធំ ប្រយោជន៍ដែលកើតចេញពីការសាមគ្គី យោគយល់គ្នា។ ពាក្យថាប្រយោជន៍ជាតិខ្លួនឯងចំបងមុនអ្វីៗទាំងអស់ គឺមិនខុសពី ថា សក់អ្នកណាក្បាលអ្នកនឹងទេ។ ដូច្នេះគឺវាផ្ទុយពីប្រយោជន៍រួមបាត់ទៅហើយ។
ក្នុងសន្ទរកថា លោកដូណាល់ ត្រាំបានលើកឡើងនូវពាក្យ អធិបតេយ្យភាព មិនតិចជាង២០ដងទេ។ គាត់ថាវាជាគោលការណ៍ចំបងបំផុត ដែលត្រូវតែការពារអធិបតេយ្យភាព សន្តិសុខ និងការចំរើនមានបាន របស់ប្រទេសនីមួយៗ។ តើបើយើងយកមកពិចារណាទៅ គោលការណ៍ទាំងនេះ គឺហាក់ដូចជាទុកអនុវត្តសម្រាប់សហរដ្ឋអាមេរិក តែម្នាក់ឯងប៉ុណ្ណោះ។ ព្រោះថា បើស្តាប់សំដីគាត់ លោកដូណាល់ ត្រាំ ហាក់ដូចជាមិនខ្លាចនឹងរំលោភ អធិបតេយ្យភាព សន្តិសុខ ឬផលប្រយោជន៍របស់ប្រទេសផ្សេងទៀត បើសិនជាអាមេរិកនឹងខាតបង់។ នេះហើយ ដែលជាខ្លឹមសារពិត នៃទ្រឹស្តី America First របស់លោកដូណាល់ ត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ