ដូណាល់ ត្រាំ ត្រៀមចេញក្រិត្យច្បាប់ថ្មី លុបចោលកម្មវិធីការពារបរិស្ថានរបស់អូបាម៉ា
លោក ដូណាល់ ត្រាំ ប្រធានាធិបតីសហរដ្ឋអាមេរិក កំពុងត្រៀមខ្លួន ចុះហត្ថលេខា លើក្រិត្យច្បាប់ថ្មីមួយ ដែលមានខ្លឹមសារ លុបចោលនូវវិធានការទាំងឡាយណា ដែលលោកអូបាម៉ា បានដាក់ចេញដើម្បីលើកកំពស់វិស័យការពារបរិស្ថាន។ រដ្ឋាភិបាលថ្មីរបស់លោកដូណាល់ ត្រាំ បានអះអាងថា ក្រិត្យច្បាប់ថ្មី នឹងបង្កើតការងារឲ្យប្រជាជនអាមេរិក ក្នុងវិស័យថាមពលធ្យូងថ្ម និងវិស័យឧស្សាហកម្មបូបប្រេងឆៅ។ ប៉ុន្តែ សម្រាប់អ្នកជំនាញ និងសកម្មជនការពារបរិស្ថាន បានសម្តែងការព្រួយបារម្ភ អំពីគោលនយោបាយនេះ របស់លោកដូណាស់ ត្រាំ ព្រោះវាលើកកំពស់ដល់វិស័យផលិតថាមពល ដែលបញ្ចេញផ្សែងពុល ទៅក្នុងបរិយាកាស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
លោកដូណាល់ ត្រាំ ប្រធានាធិបតីអាមេរិក នឹងអញ្ជើញទៅស្នាក់ការភ្នាក់ងារជាតិការពារបរិស្ថាន នៅរសៀលថ្ងៃអង្គារទី២៨មីនានេះ ដើម្បីចុះហត្ថលេខាលើក្រិត្យច្បាប់ថ្មីមួយ ដែលរដ្ឋាភិបាលលោកដាក់ឈ្មោះឲ្យថា “ក្រិត្យច្បាប់ដើម្បីឯករាជ្យភាពនៃវិស័យថាមពល”។
វាជារឿងហួសចិត្តណាស់ ដែលពិធីចុះហត្ថលេខា នឹងធ្វើនៅស្នាក់ការទីភ្នាក់ងារជាតិការពារបរិស្ថាន ក៏ប៉ុន្តែក្រិត្យច្បាប់នេះ មានខ្លឹមសារផ្ទុយស្រលះ ពីអ្វីដែលហៅថាជាការការពារបរិស្ថាន ព្រោះវានឹងលុបចោល នូវវិធានការជាច្រើន ដែលដាក់ចេញដោយរដ្ឋាភិបាលលោកបារ៉ាក់ អូបាម៉ា ដើម្បីកាត់បន្ថយការបញ្ចេញឧស្ម័នពុលទៅក្នុងបរិយាកាស។
សូមរំលឹកថា លោកអូបាម៉ា បានដាក់ចេញនូវផែនការយុទ្ធសាស្ត្រមួយហៅថា ផែនការថាមពលស្អាតស្អំ (Clean Power Plan) ដោយស្របទៅតាមការប្តេជ្ញា ដែលមានចែងនៅក្នុងកិច្ចព្រមព្រៀងក្រុងប៉ារីស ស្តីពីអាកាសធាតុ។ ក្នុងផែនការនេះ លោកអូបាម៉ា បានដាក់ចេញនូវវិធានការជាច្រើន ដើម្បីកាត់បន្ថយការផលិតថាមពល ដែលជះឥទ្ធិពលអាក្រក់ ទៅលើបរិស្ថាន ដូចជាការដុតធ្យូងថ្ម និងការប្រើប្រាស់ប្រេងឥន្ធនៈជាដើម ហើយងាកមកអភិវឌ្ឍន៍ វិស័យផលិតថាមពលប្រកបដោយចីរភាព ដែលស្អាតស្អំ មិនបញ្ចេញផ្សែងពុលវិញ។
អ្នកនាំពាក្យសេតវិមាន បានបញ្ជាក់ថា ក្រិត្យច្បាប់ថ្មី នឹងលុបចោលនូវវិធានការ រឺឧបសគ្គទាំងឡាយណា ដែលគ្មានប្រយោជន៍ដល់សហគ្រាស និងសេដ្ឋកិច្ចអាមេរិក។ ក្រិត្យថ្មី នឹងបើកផ្លូវឲ្យមានការបង្កើនការអភិវឌ្ឍន៍ វិស័យផលិតថាមពលក្នុងតំលៃថោក មិនថាថាមពលធ្យូងថ្ម រឺឧស្សាហកម្មបូមប្រេងទេ ដើម្បីជំរុញសន្ទុះសេដ្ឋកិច្ចអាមេរិក និងបង្កើតការងារ។
ដោយឡែក លោក James Van Nostrand សាស្ត្រាចារ្យនៅសកលវិទ្យាល័យ West Virginia បានលើកឡើងថា ការដែលរដ្ឋាភិបាលលោកត្រាំ អះអាងថា ក្រិត្យច្បាប់ថ្មីរបស់ខ្លួន និងបង្កើតការងារក្នុងវិស័យធ្យូងថ្មនោះ គឺជារឿងស្រមើរស្រម៉ៃណាស់។ សម្រាប់លោកសាស្ត្រចារ្យ វិស័យថាមពលធ្យូងថ្ម កំពុងដើរដល់ដំណាក់កាលចុងក្រោយដោយខ្លួនឯង ព្រោះ ទីមួយគឺធ្យូងថ្ម កាន់តែខ្សត់ទៅៗ ហើយទីពីរ ការចំនាយក្នុងការផលិត គឺមានតម្លៃកាន់តែខ្ពស់ ដែលមិនអាចប្រកួតប្រជែង ជាមួយវិស័យថាមពលផ្សេងទៀតបាន ដូចជាថាមពលឧស្ម័នហ្កាសធម្មជាតិ និងថាមពលព្រះអាទិត្យជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ