ឃាតកម្មបាញ់រះ នៅឡាសវ៉េហ្កាស ស្លាប់យ៉ាងហោចណាស់៥០នាក់
នៅសហរដ្ឋអាមេរិក មានអំពើឃាតុកម្មបាញ់រះសម្លាប់មនុស្ស ថ្មីមួយទៀត កើតឡើង កាលពីយប់ថ្ងៃអាទិត្យម្សិលមិញ នៅទីតាំងប្រគុំតន្ត្រីហាលវាលមួយ ក្នុងទីក្រុងឡាសវ៉េហ្គាស។ យោងតាមព័ត៌មានបឋម មានមនុស្សយ៉ាងហោចណាស់ ៥០នាក់ បានស្លាប់ និងមានជាង២០០នាក់ផ្សេងទៀត រងរបួស ដោយសារគ្រាប់កាំភ្លើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ការប្រគុំតន្ត្រី Country Music ហាលវាលមួយ នៅក្នុងទីក្រុងឡាសវ៉េហ្កាស កាលពីយប់ថ្ងៃអាទិត្យទី ១ តុលា បានក្លាយទៅជាទីលានសោកនាដកម្ម។ ឃាតករ បានបាញ់រះ សំដៅសម្លាប់មនុស្សម្នា ដែលមកចូលរួមស្តាប់ការប្រគុំតន្ត្រី។
យោងតាមលោក Joe Lombardo មេបញ្ជាការនគរបាល ឡាស វ៉េហ្កាស បានឲ្យដឹងថា ឃាតករដៃដល់ជាភេទប្រុស បានពួនសំងំនៅជាន់ទី៣២ នៃអាគារសណ្ឋាគារ កាស៊ីណូ Mandalay Bay ដែលនៅមិនឆ្ងាយប៉ុន្មានពីឆាកប្រគុំតន្ត្រី។ ភ្លាមៗក្រោយកើតហេតុ សមត្ថកិច្ច បានឡើងទៅទាន់ និងបានបាញ់សម្លាប់ជនដៃដល់ នៅនឹងកន្លែង។ មេបញ្ជាការនគរបាលដដែល បញ្ជាក់ថាគេដឹងពីអត្តសញ្ញាណរបស់ជននេះហើយ តែសុំមិនបានផ្តល់ព័ត៌មានលំអិតច្រើនជាងនេះទេ គ្រាន់តែថា ឃាតករ គឺជាមនុស្សដែលរស់នៅក្នុងទីក្រុងឡាស វ៉េហ្កាសនេះតែម្តង។
តែអ្វីដែលគេមិនទាន់ដឹងច្បាស់ គឺមូលហេតុ ថាហេតុអ្វី បានជាជនដៃដល់ បានបាញ់រះសម្លាប់ មនុស្សបែបនេះ។ សមត្ថិកិច្ច ក៏កំពុងតែតាមដានស្វែងរក ស្ត្រីវ័យក្មេងម្នាក់ទៀត ដែលគេសង្ស័យថា ជាអ្នកបានចូលរួម ជាមួយឃាតករដៃដល់ ក្នុងអំពើបាញ់រះដ៏កាចសាហាវនេះ។
សូមបញ្ជាក់ថា រហូតមកត្រឹមពេលនេះ អាជ្ញាធរក្រុងឡាសវ៉េហ្កាស បានអះអាងថា មានមនុស្សស្លាប់ មិនតិចជាង២០នាក់ទេ ហើយនឹងរបួសជាងមួយរយនាក់។ អំពើបាញ់រះ នេះ បានបង្កជាចលាចល ផ្អើលរត់ជាន់គ្នា ក្នុងចំណោមអ្នកមកចូលរួមមើលការប្រគុំតន្ត្រី។ សម្លេងកាំភ្លើងរ៉ាហ្វាល់ អូតូម៉ាទិក ពីដំបូង ត្រូវបានមនុស្សម្នានឹងស្មានថាជាសម្លេងបាញ់កាំជ្រួច រហូតទាល់តែឃើញមនុស្សរបួស ដួលដោយគ្រាប់កាំភ្លើង ទើបបាននាំគ្នាភ័យផ្អើលឈូរឆ។
សហរដ្ឋអាមេរិក តែងតែជួបនឹងហេតុការណ៍បាញ់រះសម្លាប់មនុស្សបែបនេះជារឿយៗ។ ការបាញ់រះដ៏សាហាវ ចុងក្រោយគេបំផុត គឺកើតឡើងនៅក្លឹបកំសាន្តរាត្រីសម្រាប់អ្នកស្រលាញ់ភេទដូចគ្នា ក្នុងក្រុង Orlando កាលពីថ្ងៃទី ១២ មិថុនា ២០១៦ ដែលបានផ្តាច់ជីវិតមនុស្ស៤៩នាក់។ ការបាញ់រះដ៏ព្រៃផ្សៃនេះ គឺជាស្នាដៃរបស់ក្រុមជីហាតអង្គការរដ្ឋអ៊ីស្លាម។ ប៉ុន្តែសម្រាប់ការបាញ់រះនៅឡាសវ៉េហ្កាស កាលពីថ្ងៃអាទិត្យម្សិលមិញនេះ គេនៅមិនទាន់អាចសន្និដ្ឋានបានទេថា វាមានជាប់ពាក់ព័ន្ធ នឹងបណ្តាញភេរវកម្មឬយ៉ាងណាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ