វ៉េណេស៊ុយអេឡា៖ លោកម៉ាឌុយរ៉ូ ចោទសមាជិកសភាបក្សប្រឆាំង ថាជាអ្នកបញ្ជាភេរវកម្ម
កាលពីថ្ងៃសៅរ៍សប្តាហ៍មុន នៅប្រទេសវ៉េណេស៊ុយអេឡា មានករណីផ្ទុះគ្រាប់បែក បញ្ជាដោយយានដ្រូន នៅចំពីមុខវេទិកាសន្ទករថា របស់លោកប្រធានាធិបតីម៉ាឌុយរ៉ូ។ លោកម៉ាឌុយរ៉ូ បានចាត់ទុកថា នេះគឺជាអំពើភេរវកម្ម ដែលគេមានបំណងធ្វើឃាតរូបលោក។ ក្រៅពីបានចោទប្រធានាធិបតីកូឡុំប៊ី ថាជាអ្នកនៅពីក្រោយរឿងនេះ នៅថ្ងៃពុធនេះ លោកម៉ាឌុយរ៉ូ បានចោទសមាជិកសភាបក្សប្រឆាំង ថាបានឃុបឃិតគ្នា ចង់ធ្វើឃាតលោក។ លោកម៉ាឌុយរ៉ូ បានប្រកាសថា នឹងដកអភ័យឯកសិទ្ធិសភា ហើយចាប់សមាជិកសភាបក្សប្រឆាំង យកទៅកាត់ទោស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នៅក្នុងសន្ទរកថា ផ្សាយផ្ទាល់តាមទូរទស្សន៍ និងវិទ្យុជាតិ លោកនីកូឡាម៉ាឌុយរ៉ូ បានលើកឡើងថា លោកមានភស្តុតាងគ្រប់គ្រាន់ ដែលបញ្ជាក់ពីការពិត នៃគំរោងធ្វើឃាតលើរូបលោក។ លោកបានអះអាងទៀតថា អ្នកដែលនៅពីក្រោយឃុបឃិតធ្វើរឿងនេះ គឺ អតីតប្រធានសភាវ៉េណេស៊ុយអេឡា មកពីគណបក្សប្រឆាំង។ លោកម៉ាឌុយរ៉ូ ហ៊ានអះអាងដូច្នេះ គឺដោយយោង លើចំលើយសារភាព របស់មនុស្ស៦នាក់ ដែលគេចាប់ខ្លួនខ្លួនបាន ក្រោយកើតហេតុការណ៍ បំផ្ទុះគ្រាប់បែកតាមយានដ្រូន កាលពីថ្ងៃសៅរ៍ទី ៤សីហា។
សូមបញ្ជាក់ថា លោក Julio Borges អតីតប្រធានសភាវ៉េណេស៊ុយអេឡា មកពីគណបក្សប្រឆាំង បច្ចុប្បន្នកំពុងរស់នៅភៀសខ្លួន នៅក្នុងប្រទេសកូឡុំប៊ី។ ឆ្លើយតបនឹងបទចោទប្រកាន់នេះ លោកបានអះអាងថា៖ ពិភពលោកទាំងមូល គ្មាននរណាជឿ លើរឿងបោកបញ្ឆោត ឆាកល្ខោនដែល ម៉ាឌុយរ៉ូ បានរៀបចំឡើងនេះទេ។ លោក Julio Borges បន្ថែមថា អ្វីដែលម៉ាឌុយរ៉ូ ចង់ធ្វើ គឺរៀបអំពើឃាតកម្មក្លែងក្លាយនេះឡើង ដើម្បីយកលេស ចោទប្រកាន់ និងតាមចាប់អ្នកនយោបាយបក្សប្រឆាំង ដាក់គុកតែប៉ុណ្ណោះ។
ដោយយោងតាមវីដេអូថតពេលសួរចំលើយ ជនម្នាក់ដែលជាអតីតទាហាន ហើយត្រូវគេចាប់ខ្លួនបានក្រោយកើតហេតុ បាននិយាយបញ្ចេញឈ្មោះ មនុស្ស២នាក់ គឺលោក Julio Borges និង លោក Juan Requesens ដែលជាសមាជិកសភាគណបក្សប្រឆាំងដែរ។ យ៉ាងណាមិញ បើយោងតាមទំព័រTwitter របស់គណបក្សប្រឆាំង បានអះអាងថា លោក Juan Requesens ព្រមទាំងប្អូនស្រី ត្រូវបានមនុស្សរបស់ក្រុមស៊ើបការសម្ងាត់វ៉េណេស៊ុយអេឡា មានគ្នា១៤នាក់ ចាប់ឃាត់ខ្លួន និងវាយដំយ៉ាងដំណំ កាលពីថ្ងៃអង្គារ ទី៧សីហា។
ដោយឡែក លោក Diosdado Cabello មនុស្សមានអំណាចលំដាប់ទី២ នៅវ៉េណេស៊ុយអេឡា និងបច្ចុប្បន្ន ជាប្រធានសភាធម្មនុញ្ញនោះ បានប្រកាសថា សភាធម្មនុញ្ញ នឹងបើកការប្រជុំ ដើម្បីសម្រេចដកអភ័យឯកសិទ្ធិសភា របស់សមាជិកសភារូបណា ដែលជាប់ចោទពីបទប្រព្រឹត្តិអំពើភេរវកម្ម ប៉ុនប៉ង សម្លាប់លោកម៉ាឌុយរ៉ូ។
គួររំលឹកថា សភាធម្មនុញ្ញវ៉េណេស៊ុយអេឡា ត្រូវបានបង្កើតឡើង ក្រោយការបោះឆ្នោតថ្ងៃទី៣០កក្កដា ឆ្នាំ២០១៧ ដើម្បីតាក់តែងរដ្ឋធម្មនុញ្ញថ្មី។ សភាធម្មនុញ្ញនេះ មានអំណាចចាត់តាំង សឹងតែគ្មានដែនកំណត់។ សភាធម្មនុញ្ញ ដែលមានតែមនុស្ស របស់បក្សលោកម៉ាឌុយរ៉ូ ជាសមាជិកនេះ ត្រូវបានក្រុមគណបក្សប្រឆាំង ចាត់ទុកថា ជាការប្រជែងអំណាច ជាមួយសភាជាតិ ព្រោះក្នុងសភាជាតិ ក្រុមគណបក្សប្រឆាំងមានសម្លេងភាគច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ