វ៉េណេស៊ុយអេឡា៖ ប្រធានាធិបតីប្រកាស “កាត់ទោសឲ្យធ្ងន់” ទៅលើក្រុមបាតុករ ពីបទរៀបចំធ្វើរដ្ឋប្រហារ
ជាច្រើនខែមកហើយ ដែលប្រជាជនវ៉េណេស៊ុយអេឡា បានធ្វើបាតុកម្មតវ៉ា ដើម្បីទាមទារឲ្យលោកប្រធានាធិបតី ម៉ាឌូរ៉ូ ចុះចេញពីតំណែង និងរៀបចំការបោះឆ្នោតជាថ្មី។ កាលពីថ្ងៃសៅរ៍ម្សិលមិញនេះ មនុស្សរាប់ពាន់នាក់ បានបន្តជួបជុំគ្នា បើទោះបីជាមានការគំរាមបង្ក្រាបយ៉ាងចាស់ដៃ ពីសំណាក់ ទាហាន និងកម្មាំងនគរបាលវ៉េណេស៊ុយអេឡា។ ជាមួយគ្នានេះ លោក ប្រធានាធិបតី ម៉ាឌូរ៉ូ បានប្រកាសថា សកម្មជនតវ៉ា ដែលកំពុងជាប់ឃុំ នឹងត្រូវយកទៅកាត់ទោស ឲ្យធ្ងន់បំផុត ពីបទរៀបចំធ្វើរដ្ឋប្រហារ។
ចុះផ្សាយនៅថ្ងៃ៖
ស្តាប់ - ០១:៥២
កាលពីថ្ងៃសៅរ៍ ទី២៤ មិថុនា នៅក្នុងកម្មវិធីជួបជុំជាមួយមេទាហានធំៗ របស់វ៉េណេស៊ុយអេឡា លោក ប្រធានាធិបតី ម៉ាឌូរ៉ូ បានថ្លែងថា ក្រុមប្រឆាំង ដែលកំពុងជាប់ឃុំក្នុងពេលនេះ នឹងត្រូវបញ្ជូនទៅកាត់ទោស នៅមុខតុលាការយោធា ឲ្យបានធ្ងន់ធ្ងរ និងសក្តិសមបំផុត ពីបទរៀបចំធ្វើរដ្ឋប្រហារ និងពីបទជំរុញឲ្យអាមេរិកធ្វើអន្តរាគមយោធា។
ក្នុងសំដីនេះ លោកប្រធានាធិបតីវ៉េណេស៊ុយអេឡា មិនបានបញ្ជាក់ពីចំនួនអ្នកទោសនយោបាយទេ ហើយក៏មិនបានលើកឡើងថា ពួកគេជាទាហាន ឬជាជនស៊ីវីលដែរ។ ក្នុងឱកាសនោះ មេបញ្ជាការកងទ័ពវ៉េណេស៊ុយអេឡា ក៏បានប្រកាសសារជាថ្មី ថាកងទ័ព នៅតែស្មោះស្ម័គ្រនឹងនៅចាំការពារប្រធានាធិបតីម៉ាឌូរ៉ូ ជានិច្ច។
សូមបញ្ជាក់ថា បាតុកម្មតវ៉ា ប្រឆាំងនឹងលោកប្រធានាធិបតី ម៉ាឌូរ៉ូ បានកើតឡើងសឹងតែជាប្រចាំថ្ងៃ ក្នុងរយៈពេល៣ខែមកនេះ។ បាតុកម្មកាន់តែរីកធំ រដ្ឋាភិបាល កាន់តែប្រើ ធម៌ក្តៅដោយមានជំនួយពីទាហាន ដើម្បីវាយបំបែក ក្រុមបាតុករ។ ការបង្ក្រាប ដោយកំលាំង បានបង្ករឲ្យមានមនុស្សស្លាប់យ៉ាងហោចណាស់ ៧៥នាក់ និងជាច្រើនរយនាក់ ដែលត្រូវគេចាប់ឃាត់ខ្លួន ក្នុងរយៈពេល៣ខែចុងក្រោយនេះ។
នៅក្នុងវីដេអូ ដែលគេផ្សព្វផ្សាយ កាលពីថ្ងៃសុក្រកន្លងទៅ សកម្មជនប្រឆាំង ឈ្មោះ ឡេអូប៉ូលដូ ឡូប៉េស ដែលកំពុងជាប់ឃុំនោះ បានស្រែកថា ខ្លួនគេត្រូវបានសមត្ថិកិច្ចពន្ធនាគារ ធ្វើទារុណកម្មយ៉ាងព្រៃផ្សៃ។ អស់រយៈពេល៦ខែមកហើយ ដែលអាជ្ញាធរពន្ធនាគារ ហាមមិនឲ្យមាននរណា ចូលទៅជួបអ្នកទោសនយោបាយរូបនេះទេ។
បាតុកម្មនឹងគ្រោងរៀបចំនៅថ្ងៃអាទិត្យនេះទៀត បើទោះបីជារដ្ឋាភិបាលគំរាមបង្ក្រាបយ៉ាងចាស់ដៃយ៉ាងណាក៏ដោយ។ យ៉ាងណាមិញ សកម្មភាពបង្រ្កាបយ៉ាងហិង្សា ទៅលើក្រុមបាតុករនេះ ត្រូវបានអង្គការនាៗ រិះគន់ជាខ្លាំង មានជាអាថទិ៍អង្គការប្រទេសនៅទ្វីបអាមេរិក។ គណបក្សប្រឆាំង ដែលមានសំលេងភាគច្រើននៅក្នុងសភា បានអំពាវនាវឲ្យប្រជាជន ឈប់ទទួលស្គាល់រដ្ឋាភិបាល ហើយក៏មិនត្រូវទទួលយក ការបង្កើតសភាធម្មនុញ្ញ ដែលលោកប្រធានាធិបតីម៉ូឌូរ៉ូ មានបំណងធ្វើនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ