វ៉េណេស៊ុយអេឡា បណ្តេញឯកអគ្គរដ្ឋទូតអាល្លឺម៉ង់ចេញពីប្រទេស
រដ្ឋាភិបាលវ៉េណេស៊ុយអេឡា របស់លោក នីកូឡាម៉ាឌូរ៉ូ បានសម្រេច បណ្តេញឯកអគ្គរដ្ឋទូតអាល្លឺម៉ង់ ប្រចាំរដ្ឋធានីការ៉ាកាសឲ្យចាកចេញពីវ៉េណេស៊ុយអេឡា ជាបន្ទាន់។ ការបណ្តេញនេះ គឺធ្វើឡើង នៅក្រោយពេលដែលលោកឯកអគ្គរដ្ឋទូតអាល្លឺម៉ង់រូបនេះ បានទៅទទួលលោក រ្ហ័ន ហ្កៃដូដែលបានវិលត្រលប់ចូលវ៉េណេស៊ុយអេឡាវិញ កាលពីថ្ងៃចន្ទកន្លងទៅ។ ដោយឡែក សហរដ្ឋអាមេរិកទើបតែបានសម្រេចបន្ថែមទណ្ឌកម្មផ្សេងទៀត ដាល់លើរដ្ឋាភិបាលរបស់លោក នីកូឡា ម៉ាឌូរ៉ូដោយបានដកហូត និងហាមឃាត់ទិដ្ឋាការ ទៅលើមនុស្ស៧៧នាក់ ដែលស្និទនឹងរបបនេះ។
ចុះផ្សាយនៅថ្ងៃ៖
ស្តាប់ - ០២:១៥
នៅថ្ងៃទី៦មីនា រដ្ឋាភិបាលរបស់លោកនីកូឡាម៉ាឌូរ៉ូ បានដាក់កំហិត ឲ្យអគ្គរដ្ឋទូតអាល្លឺម៉ង់ ចាក់ចេញពីវ៉េណេស៊ុយអេឡាក្នុងរយៈពេល៤៨ម៉ោង។ ភ្លាមៗក្រោយទទួលដំណឹងនេះ រដ្ឋាភិបាលអាល្លឺម៉ង់បានចេញសេចក្តីប្រកាសមួយថ្កោលទោសការសម្រេច ដែលអាល្លឺម៉ង់ ចាត់ទុកថា គ្មានហេតុផលនិងជាការសម្រេចដែលបន្ថែមបញ្ហាឲ្យកាន់ខ្លាំង ទៅលើស្ថានការណ៍ដែលតានតឹងស្រាប់ទៅហើយ។
ក្រសួងការបរទេសអាល្លឺម៉ង់បានបញ្ជាក់បន្ថែមថា អាល្លឺម៉ង់ ក៏ដូចជាសហភាពអឺរ៉ុប នៅតែប្រកាន់ជំហរ គាំទ្រលោករ័្ហនហ្កៃដូ ជាប្រធានាធិបតីស្តីទី របស់វ៉េណេស៊ុយអេឡា ក្នុងអំឡុងពេលរង់ចាំការរៀបចំបោះឆ្នោតសារជាថ្មីដោយភាពសេរីយុត្តិធម៌។ រដ្ឋាភិបាលអាល្លឺម៉ង់ ក៏សូមសំដែងការកោតសរសើរ និងគាំទ្រដល់ការងារ របស់លោក Daniel Kriener ឯកអគ្គរដ្ឋទូតអាល្លឺម៉ង់ប្រចាំរដ្ឋធានីការ៉ាកាសដែលបានបំពេញការងារយ៉ាងល្អ ជាពិសេសក្នុងស្ថានការណ៍ចុងក្រោយថ្មីៗនេះ។
សូមរំលឹកថា លោកអគ្គរដ្ឋទូតអាល្លឺម៉ង់រួមទាំងតំណាងអង្គទូតរបស់ប្រទេសអឺរ៉ុប និងអាមេរិកឡាទីន ប្រមាណជាង១០នាក់ផ្សេងទៀតបានទៅព្រលានយន្តហោះក្រុងការ៉ាកាស ទទួលលោករ័្ហន ហ្កៃដូ ដែលវិលត្រលប់ចូលស្រុកវិញកាលពីថ្ងៃចន្ទទី៤មីនា។ ប៉ុន្តែមកត្រឹមពេលនេះ គឺមានតែអគ្គរដ្ឋទូតអាល្លឺម៉ង់ម្នាក់ប៉ុណ្ណោះ ដែលត្រូវរដ្ឋាភិបាលលោកម៉ាឌូរ៉ូ បណ្តេញចេញ។
នៅលើទំព័រTwitter លោករ្ហ័ន ហ្កៃដូ បានសរសេរថាការបណ្តេញឯកអគ្គរដ្ឋទូតអាល្លឺម៉ង់ គឺជាសក្ខីកម្មមួយបញ្ជាក់ពីការគំរាមកំហែងមកលើពិភពលោកសេរី ពីសំណាក់របបផ្តាច់ការនីកូឡា ម៉ាឌូរ៉ូ។ លោកហ្កៃដូបានសរសេរបន្តថា លោកសូមអរគុណចំពោះអាល្លឺម៉ង់ ក៏ដូចជាប្រទេសជាមិត្តផ្សេងទៀតចំពោះការគាំទ្រដ៏រឹងមាំក្នុងការស្តារលទ្ធិប្រជាធិបតេយ្យនៅវ៉េណេស៊ុយអេឡា។
ដោយឡែក នៅថ្ងៃពុធទី៦មីនារដ្ឋាភិបាលអាមេរិក បានសម្រេចដកទិដ្ឋាកាពីមនុស្សចំនួន៧៧នាក់ បន្ថែមទៀត ដែលសុទ្ធតែជាមន្ត្រីធំៗស្និទនឹងរដ្ឋាភិបាល របស់លោកនីកូឡា ម៉ាឌូរ៉ូ។ សហរដ្ឋអាមេរិក ក៏បានគំរាមថានឹងដាក់ទណ្ឌកម្ម ដល់ស្ថាប័នហិរញ្ញវត្ថុណា ដែលហ៊ានឃុបឃិត រកស៊ី ឬផ្តល់កម្ចីដល់របបពុករលួយរបស់លោកនីកូឡាម៉ាឌុយរ៉ូ។ លោក Mike Pence អនុប្រធានាធិបតីអាមេរិកបាននិយាយថា អាមេរិក នឹងបន្តដាក់គំនៀប ធ្វើបាបរបបដឹកនាំរបស់លោកនីកូឡា ម៉ាឌូរ៉ូល្គឹកណា សិទ្ធិសេរីភាព និងប្រជាធិបតេយ្យ មិនត្រូវបានរៀបចំស្តារឡើងវិញទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ