លោកត្រាំ ថាឲ្យស្ត្រីសមាជិកសភាអាមេរិកដើមកំណើតបរទេស ឲ្យត្រលប់ទៅ“ស្រុកដើម” វិញ
លោកដូណាល់ ត្រាំ បានបង្កឲ្យមានការតវ៉ារិះគន់ថ្មីមួយទៀត ដោយសារតែសារសរសេរ នៅលើទំព័រTwitter របស់លោក។ លោកបានសរសេរ ចំអកទៅលើស្ត្រីសមាជិកសភាអាមេរិកជាច្រើនរូប ដែលមានដើមកំណើតបរទេស ថាឲ្យពួកគេត្រលប់ទៅស្រុកដើមវិញ ហើយមិនបាច់មកប្រាប់ថា ឲ្យលោកត្រូវដឹកនាំរដ្ឋាភិបាលអាមេរិក ដោយរបៀបណានោះទេ។ សារសរសេររបស់លោកប្រធានាធិបតីអាមេរិកនេះ ត្រូវបាន អ្នកនយោបាយអាមេរិក ភាគច្រើន លើកឡើងថាគឺជាសម្តី មានខ្លឹមសាររើសអើងប្រកាន់ពូជសាសន៍ និងមានលក្ខណៈមើលងាយស្ត្រីភេទ។
ចុះផ្សាយនៅថ្ងៃ៖ កែប្រែថ្ងៃទី៖
លោកដូណាល់ ត្រាំ បានសរសេរលើ Twitter ថា “វាជារឿងគួរឲ្យអស់សំណើចណាស់ ដែលពួកសមាជិកសភាបក្សប្រជាធិបតេយ្យខ្លះ ចង់មកប្រាក់ថា រដ្ឋាភិបាល ត្រូវដឹកនាំប្រទេសរបៀបណា។” លោកត្រាំបន្តថា “ពួកស្រីៗសាមជិកសភាខ្លះ មានកំណើតមកពីស្រុកពុករលួយ ដ៏យ៉ាប់បំផុត ស្រុកខ្លះគ្មានទាំងរដ្ឋាភិបាលដែលចេះធ្វើការផង។ ហេតុអ្វី មិនត្រលប់ទៅស្រុកដើមវិញទៅ ក្រែងបានទៅជួយផ្តល់យោបល់ដោះស្រាយបញ្ហា នៅទីនោះបាន!”
គួរកត់សំគាល់ថា សារប៉ុន្មានឃ្លា របស់លោកដូណាល់ ត្រាំនេះ ត្រូវបានគេដឹងយ៉ាងច្បាស់ ថាលោកបានសំដៅថាឲ្យស្ត្រីសមាជិកសភាអាមេរិក មកពីបក្សប្រជាធិបតេយ្យចំនួនប្រមាណ៤រូប ដែលពួកគេសុទ្ធតែមានដើមកំណើតបរទេស ហើយដែលពួកគេ ធ្លាប់បាននិយាយរិះគន់ការដឹកនាំរបស់លោកដូណាល់ ត្រាំ។ ក្នុងនោះមានដូចជា លោកស្រី Alexandria Ocasio-Cortez សមាជិកសភារដ្ឋញូយ៉ក លោកស្រី Ilhan Oma សមាជិកសភារដ្ឋម៉េនីសូតា លោកស្រីAyanna Pressley សមាជិកសភារដ្ឋ ម៉ាសាជូសេត និងលោកស្រី Rashida Tlaib សមាជិកសភារដ្ឋមីឈីហ្គែន។
លោកស្រី Nancy Pelosi ប្រធានសភាតំណាង មកពីបក្សប្រជាធិបតេយ្យ បានចេញមុខរិះគន់លោកដូណាល់ ត្រាំមុនគេ បន្ទាប់ពីបានឃើញសារនេះ។ លោកស្រីបានលើកឡើងថា លោកស្រីសោកស្តាយណាស់ នៅពេលបានឃើញសាររបស់លោកដូណាល់ ត្រាំ ដែលមានខ្លឹមសារមើលងាយស្ត្រីភេទ ព្រមទាំងមានខ្លឹមសារពុះចែកសង្គមជាតិអាមេរិក។
លោក Ben Ray Lujan មន្ត្រីសភាខុសហ្ក្រេស ដើមកំណើតអេស្ប៉ាញដ៏សំខាន់ម្នាក់ បានរិះគន់ថា សម្តីលោកដូណាល់ ត្រាំ ជាសម្តីរើសអើងប្រកាន់ពូជសាសន៍។ លោកបន្ថែមថា សមាជិកសភាអាមេរិក ទោះមានដើមកំណើតពីស្រុកណាក៏ដោយ គឺសុទ្ធសឹងតែជាប្រជាជនអាមេរិក ហើយបានទទួលដំណែង ដោយការបោះឆ្នោតដ៏ត្រឹមត្រូវពីសំណាក់ប្រជាជនអាមេរិក។
គួរកត់សំគាល់ដែរថា មជ្ឈដ្ឋាននយោបាយអាមេរិក ភាគច្រើនសុទ្ធតែបានបរិហារ ចាត់ទុកសម្តីរបស់លោកដូណាល់ ត្រាំ ថាជាសម្តីរើសអើងប្រកាន់ពូជសាសន៍ និងមើលងាយស្រី្តភេទ។ ប្រជាជនអាមេរិក ដែលមានដើមកំណើតចម្រុះជាតិសាសន៍ មានសិទ្ធិស្មើគ្នា គឺជាអ្វីដែលកំណត់ពីប្រវត្តិសាស្ត្រ និងលក្ខណៈសម្បតិ្ត របស់សហរដ្ឋអាមេរិក។ លោក Joe Biden អតីតអនុប្រធានាធិបតី បានលើកឡើងថា ការរើសអើងប្រកាន់ពូជសាសន៍ និងការមើលងាយស្ត្រីភេទ អាមេរិកមិនស្វាគមន៍ជាដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ