ខ្យល់ព្យុះអ៊ូរ៉ាហ្កង់ Irma កំលាំងខ្លាំងបំផុត បោកបក់តំបន់កោះក្នុងសមុទ្រការ៉ាអ៊ីប
ខ្យល់ព្យុះអ៊ូរ៉ាហ្កង់ អៀរម៉ា កំពុងតែបោកបក់ នៅតំបន់កោះ នៃសមុទ្រការ៉ាអ៊ីប ដោយបានឆ្លងកាត់កោះ បាកប៊ូដា នៅព្រឹកថ្ងៃពុធនេះ។ ព្យុះអ៊ូរ៉ាហ្កង់ ដ៏មានកំលាំងខ្លាំងបំផុតមិនធ្លាប់មាននេះ នឹងឆ្លងកាត់ កោះផ្សេងទៀត ដូចជាកោះ សាំង បាតេឡេមី កោះសាំង ម៉ាកតាំង និងកោះព័រតូរីកូ ជាដើម។ តាមការព្យាករណ៍ ព្យុះនេះ អាចនឹងបន្តទៅរដ្ឋហ្វ្លរីដា សហរដ្ឋអាមេរិក។ មនុស្សរាប់សែននាក់កំពុងត្រៀមខ្លួន រកកន្លែងមានសុវត្ថិភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
បន្ទាប់ពីកោះ Barbuda នៅព្រឹកថ្ងៃពុធ ទី ៦កញ្ញានេះ ខ្យល់ព្យុះអ៊ូរ៉ាហ្កង់ Irma នឹងទៅបោកបក់ ឆ្លងកាត់កោះបារាំងមួយចំនួន ដូចជាកោះ Saint-Barthélémy និង Saint-Martin។ កោះទាំងពីរនេះ ត្រូវបានដាក់ឲ្យស្ថិតក្នុងការប្រកាសអាសន្នព័ណ៌ស្វាយ ដែលជាកំរិតគ្រោះថ្នាក់បំផុត។ ឧត្តុនិយមបារាំង សន្មត់ថា ភ្នែកកណ្តាលរបស់ព្រុះIrma ដែលមានអង្កត់ផ្ចិត ប្រហែល៥០គីឡូម៉ែត្រ នឹងហោះឆ្លងកាត់ ស្ថិតនៅចំពីលើកោះទាំងពីរនេះ។
តាមការព្យាករណ៍របស់ឧត្តុនិយមបារាំង ព្យុះអ៊ូរ៉ាហ្កង់ Irma ស្ថិតក្នុងកំរិតទី៥ ដែលមានកំលាំងខ្លាំងបំផុតមិនធ្លាប់មានឡើយ សម្រាប់ខ្យល់ព្យុះប្រភេទនេះក្នុងមហាសមុទ្រអាត្លង់ទិក។ ពោលគឺ ព្យុះIrma នេះ នឹងមានកំលាំងខ្លាំងជាងព្យុះអ៊ូរ៉ាហ្កង់ Harvey ដែលបានបោកបក់នៅរដ្ឋ Texas និង Louisiane កាលពីសប្តាហ៍កន្លងទៅនេះ ទៅទៀត។
ព្យុះIrma ដែលមានទំហំធំស្មើនឹងផ្ទៃដីប្រទេសបារាំងនេះ នឹងបង្កជាខ្យល់ មានល្បឿនខ្លាំងបំផុត ដែលតំបន់ខ្លះ ខ្យល់អាចមានល្បឿន ជាង៣០០គីឡូម៉ែត្រ ក្នុងមួយម៉ោង។ កំលាំងនេះ អាចរុញច្រានរលកសមុទ្រ ឲ្យមានកំពស់ដល់ទៅជាង១០ម៉ែត្រ។ កំរិតទឹកភ្លៀងចន្លោះពី ២០០ ទៅ ៣០០ មីលីម៉ែត្រ អាចនឹងធ្លាក់ចិញ្ជ្រុំ ពីលើតំបន់ដែលព្យុះនេះឆ្លងកាត់។
តំបន់មួយចំនួន នៃកោះ Saint-Barthélémy និង Saint-Martin ដែលទាបខ្លាំងនោះ កំពុងប្រឈមមុខនឹងការលិចជន់ ដោយទឹកភ្លៀង នឹងរលកសមុទ្រ។ អាជ្ញាធរបារាំង បានជម្លៀសមនុស្សចេញពីតំបន់គ្រោះថ្នាក់ខ្លាំង ហើយបានហាមឃាត់មនុស្សទាំងអស់ មិនឲ្យចេញទៅខាងក្រៅ។ មនុស្សប្រមាណជា ជាង១ម៉ឺននាក់ កំពុងត្រូវគេទទួលឲ្យ ស្នាក់នៅទីកន្លែងមានសុវត្ថិភាព។ តែយ៉ាងណា អាជ្ញាធរបារាំង បានបញ្ជាក់ថា យ៉ាងហោចណាស់ មានមនុស្សប្រហែល៧ពាន់នាក់ ដែលមិនព្រមចាកចេញពីផ្ទះ មកស្នាក់នៅកន្លែងមានសុវត្ថិភាពទេ។
តាមការព្យាករណ៍ទុក ព្យុះIrma នឹងបន្តទៅកោះ Porto-Rico និងកោះតូចៗជាច្រើនទៀត មុននឹងទៅដល់រដ្ឋហ្វ្លរីដា សហរដ្ឋអាមេរិក។ ដោយឡែក គេកំពុងព្រួយបារម្ភជាខ្លាំង ចំពោះសុវត្ថិភាពរបស់ប្រជាជននៅកោះហៃទី។ រដ្ឋាភិបាលហៃទី ដែលក្រីក្របំផុតនោះ ពុំមានលទ្ធភាពអ្វី អាចផ្តល់ជំនួយ ឬជំរកសុវត្ថិភាពដល់ប្រជាជនខ្លួនឡើយ។ ជាងនេះទៅទៀត រដ្ឋាភិបាលហៃទី ពុំបានផ្តល់ដំណឹង ពីការមកដល់នៃព្យុះអ៊ូរ៉ាហ្កង់នេះ ដើម្បីឲ្យប្រជាជនបានដឹង និងត្រៀមខ្លួនទុកមុនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ