លោកអូបាម៉ា នៅអាហ្វ្រិក៖ បញ្ហាសន្តិសុខ និងសេដ្ឋកិច្ចលុបបាំងបាត់បញ្ហារំលោភសិទ្ធិមនុស្ស
ប្រធានាធិបតីអាមេរិកលោកបារ៉ាក់ អូបាម៉ា ត្រូវបញ្ចប់ទស្សនកិច្ចរយៈពេល២ថ្ងៃ នៅប្រទេសកេនយ៉ា ទឹកដីកំណើតរបស់ឪពុកលោក នៅថ្ងៃអាទិត្យទី ២៦ កក្កដា។ នៅកេនយ៉ា លោកអូបាម៉ាបាននិយាយពីការប្រយុទ្ធប្រឆាំងនឹងក្រុមភេរវនិយម អំពើពុករលួយ និងអំពាវនាវសុំឲ្យឈប់មានការរើសអើងទៅលើមនុស្សស្រឡាញ់ភេទដូចគ្នា នៅប្រទេសកេនយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០៨
ឆ្លើយទៅនឹងសំណួររបស់អ្នកកាសែត កាលពីថ្ងៃសៅរ៍ ទាក់ទងនឹងការរំលោភសិទ្ធិមនុស្សស្រឡាញ់ភេទដូចគ្នា នៅកេនយ៉ា លោកអូបាម៉ា និយាយថា លោកឧស្សាហ៍លើកនិយាយពីប្រធានបទនេះជាមួយមេដឹកនាំនៅអាហ្រ្វិកកន្លងមក។ “នៅពេលរដ្ឋាភិបាល មានទម្លាប់បែងចែក មិនគោរពសិទ្ធិមនុស្សស្មើគ្នា នោះ រដ្ឋាភិបាល នោះ នឹងធ្លាក់ក្នុងអន្ទាក់ដែលតម្រូវឲ្យពួកគេបិទសិទ្ធិសេរីភាពប្រជាជនខ្លួនឯង”។
ក្នុងរឿងមនុស្សស្រឡាញ់ភេទដូចគ្នា ប្រធានាធិបតីកេនយ៉ាវិញ មិនយល់ស្របជាមួយលោកអូបាម៉ាទេ ដោយឆ្លើយតប យ៉ាងសុភាពទៅវិញ ថា គេមិនអាចចាប់បង្ខំ ប្រជាជនកេនយ៉ាឲ្យទទួលស្គាល់អ្វី ដែលគេមិនចូលចិត្តនោះទេ។ កេនយ៉ា ស្ថិតនៅក្នុងចំណោមប្រទេសអាហ្វ្រិកចំនួន ៣៥ ដែលមានច្បាប់ប្រឆាំងនឹងការស្រឡាញ់ភេទដូចគ្នា។
នៅកេនយ៉ា ដូចការរំពឹងទុក ប្រធានាធិបតីអាមេរិកបាននិយាយពីការសហការជាមួយ កេនយ៉ា ក្នុងប្រយុទ្ធប្រឆាំងនឹងក្រុមភេរវជន ជាពិសេស ក្រុមស្ហេបាប់ នៅសូម៉ាលី។
បន្ទាប់ពី កេនយ៉ា លោកប្រធានាធិបតីអូបាម៉ាត្រូវបន្តដំណើរទៅប្រទេសអេត្យូពីនៅល្ងាចថ្ងៃអាទិត្យ។ នៅថ្ងៃអង្គារ លោកអូបាម៉ា ត្រូវឡើងថ្លែង នៅចំពោះមុខថ្នាក់ដឹកនាំអាហ្វ្រិក នៅទីស្នាក់ការសហភាពអាហ្វ្រិក ក្នុងទីក្រុងអាឌី អាបេបា របស់អេត្យូពី។ ក្រុមអ្នកការពារសិទ្ធិមនុស្សរិះគន់ លាយក្តីបារម្ភថា លោកប្រធានាធិបតីអាមេរិក កំពុងផ្តោតខ្លាំងជ្រុលទៅលើការប្រយុទ្ធប្រឆាំងនឹងអំពើភេរវកម្ម ដោយភ្លេច មិនយកចិត្តទុកដាក់និយាយពីបញ្ហារំលោភសិទ្ធិមនុស្ស នៅប្រទេសអាហ្វ្រិក។
លោកអូបាម៉ា ធ្វើទស្សនកិច្ចទៅកេនយ៉ា និងអេត្យួពីដែលកំពុងការរិះគន់ពីរឿងរំលោភសិទ្ធិមនុស្ស
អង្គការការពារសិទ្ធិមនុស្ស រិះគន់ ព្រោះលោកប្រធានាធិបតីអាមេរិក មិនបានលើកនិយាយពីបញ្ហារំលោភសិទ្ធិមនុស្សនៅក្នុងប្រទេសកេនយ៉ា។ លោកអូបាម៉ាបានអំពាវនាវឲ្យមានការគោរពសិទ្ធិមនុស្សស្រឡាញ់ភេទដូចគ្នា ប៉ុន្តែ លោកមិនបានលើកនិយាយពីបញ្ហារំលោភសិទ្ធិមនុស្ស របស់រដ្ឋាភិបាលកេនយ៉ាបច្ចុប្បន្ន ក៏ដូចអតីតកាលនោះទេ។ សកម្មជនសិទ្ធិមនុស្សកំពុងបារម្ភថា អាជ្ញាធរកេនយ៉ាបច្ចុប្បន្ន យកលេសអនុវត្តច្បាប់ ប្រយុទ្ធប្រឆាំងអំពើភេរវកម្ម ដើម្បីចាប់ចង ក្រុមដែលប្រឆាំងនឹងខ្លួន។
លោកប្រធានាធិបតីកេនយ៉ាបច្ចុប្បន្ន ក៏ធ្លាប់បានតុលាការព្រហ្មទណ្ឌអន្តរជាតិចោទប្រកាន់ ក្នុងរឿងបង្រ្កាបហិង្សា ក្រោយការបោះឆ្នោត ដែលសម្លាប់មនុស្សជាង ១ពាន់នាក់។ លោកប្រធានាធិបតីកេនយ៉ា បានរួចពីការចោទប្រកាន់ ដោយសារតែតុលាការគ្មានភស្តុតាងក៏ពិតមែន ប៉ុន្តែ មិនមែនមានន័យថា លោកស្អាតស្អំនោះទេ។ លោកប្រធានាធិបតីអាមេរិកមិនមែនមិនដឹងរឿងអស់នោះទេ។ ប៉ុន្តែ អ្វីដែលធ្វើឲ្យអង្គការការពារសិទ្ធិមនុស្សបារម្ភខ្លាចគឺត្រង់ថា ដើម្បីចង់ប្រយុទ្ធប្រឆាំងខ្លាំងនឹងក្រុមភេរវនិយម នៅអាហ្វ្រិក លោកប្រធានាធិបតីអាមេរិកបានបិទភ្នែក ធ្វើគថ្លង់ មិនដឹង មិននិយាយពីបញ្ហារំលោភសិទ្ធិមនុស្សនៅកេនយ៉ា។
នៅអេត្យូពីវិញក៏ដូច្នោះដែរ។ តាំងពីមុនលោកអូបាម៉ាធ្វើដំណើរទៅអាហ្វ្រិកម្ល៉េះ ប្រជាជនអេត្យូពី ជាច្រើនរយនាក់ ធ្វើបាតុកម្ម នៅមុខសេតវិមាន ក្នុងក្រុងវ៉ាស៊ីនតោន ដើម្បីតវ៉ា ប្រឆាំង កុំឲ្យអាមេរិកនាំយកជំនួយ គាំទ្រដល់រដ្ឋាភិបាលអេត្យូពី ដែលពួកគេចាត់ទុកជាមេដឹកនាំផ្តាច់ការ។ តាមអង្គការការពារសិទ្ធិមនុស្ស Human rights watch ការរំលោភសិទ្ធិមនុស្ស បិទសេរីភាពអ្នកសារព័ត៌មានមានកាន់តែច្រើន បន្ទាប់ពីប្រធានាធិបតីអេត្យូពីបានឈ្នះឆ្នោត ប្រមូលយកអាសនៈ ទាំងអស់ នៅរដ្ឋសភា។ ទាំងគណបក្សប្រឆាំង និងសង្គមស៊ីវិលចោទប្រកាន់លោកប្រធានាធិបតី Hailemariam Desalegnថា បានរៀបចំការបោះឆ្នោត ដើម្បីជាវាំងននបាំង ភ្នែកអន្តរជាតិ ថា លទ្ធិប្រជាធិបតេយ្យកំពុងកើតមាននៅអេត្យូពី។
លោកប្រធានាធិបតី អាមេរិកត្រូវជួបសន្ទនាជាមួយប្រធានាធិបតីអេត្យូពី នៅថ្ងៃ ចន្ទ។ ពាណិជ្ជកម្ម ការវិនិយោគ សន្តិភាព និងសន្តិសុខ ជាប្រធានបទដែលលោកអូបាម៉ានឹងលើកនិយាយជាមួយប្រមុខដឹកនាំអេត្យូពី។ ថ្នាក់ដឹកនាំទាំងពីរ នឹងពិភាក្សាលើសហប្រតិបត្តិការ ប្រយុទ្ធប្រឆាំងភេរវកម្ម នៅអាហ្វ្រិកខាងកើត។ អេត្យូពី ដែមានទ័ព ដល់ទៅ៤ពាន់នាក់ ក្នុងកងកម្លាំងទ័ពសហភាពអាហ្វ្រិក ជាប្រទេសដៃគូសន្តិសុខ មិនអាចខ្វះបានរបស់អាមេរិក ដើម្បីប្រយុទ្ធប្រឆាំងនឹងក្រុមភេរវជននៅអាហ្វ្រិកខាងកើត។
វាយឺតពេលទៅហើយ ដែលលោកអូបាម៉ាទើបបែរទៅរកអាហ្វ្រិកនៅពេលនេះ
ប្រជាជនកេនយ៉ា ធ្លាប់សង្ឃឹមច្រើន ថា នៅក្រោយជាប់ឆ្នោត ឆ្នាំ ២០០៩ ប្រធានាធិបតីអាមេរិកស្បែកខ្មៅ នឹងចាប់អារម្មណ៍ ធ្វើនយោបាយបើកចំហរសំដៅអាហ្វ្រិក ដែលជាដីកំនើតរបស់ជីដូនជីតារបស់លោកអូបាម៉ា។ ប៉ុន្តែ ប្រជាជន កេនយ៉ា ត្រូវខកចិត្ត ខ្លាំង ព្រោះថា លោកអូបាម៉ាបានបែរខ្នងដាក់ពួកគេ អស់មួយអាណត្តិ និងទើបត្រលប់មករាក់ទាក់ជាមួយពួកគេ នៅពេលខ្លួន ជិតអស់អាណត្តិប្រធានាធិបតី អាមេរិកទៅហើយនោះ។
បើប្រៀបធៀបនឹងប្រធានាធិបតីអាមេរិកពីរមុន គឺលោកប៊ូស និងលោកគ្លីនតុន លោកអូបាម៉ា ថ្វីត្បិតមានកំណើតកូនកាត់កេនយ៉ាអាមេរិក ប៉ុន្តែមិនបានធ្វើអ្វីធំដុំសម្រាប់អាហ្រ្វិក ក្នុងរយៈពេល ២អាណត្តិនេះទេ។ ប្រជាជនអាហ្រ្វិកនៅចាំដឹងគុណលោកអតីតប្រធានាធិបតីគ្លីនតុន ដែលបានបង្កើតកិច្ចព្រមព្រៀងបន្ធូរបន្ថយ ពន្ធ សម្រាប់ទំនិងញនាំចូលពីអាហ្រ្វិក ក្នុងពេលលោកប្រធានាធិបតីប៊ូស វិញ បានផ្តល់ជំនួយរាប់លានដុល្លារ សម្រាប់ប្រយុទ្ធប្រឆាំងនឹងមេរោគអេដស៍នៅអាហ្វ្រិក។ ចំណែកអាមេរិក របស់លោកអូបាម៉ា ដែលលែងសូវត្រូវការវត្ថុធាតុពីអាហ្វ្រិក បានកាត់បន្ថយទំហំដោះដូរពាណិជ្ជកម្ម ជាមួយអាហ្វ្រិក ដោយបានបណ្តោយឲ្យអាហ្រ្វិករបូតចេញពីដៃ ទៅធ្លាក់ក្នុងសំណាញ់របស់ចិន ដែលកំពុងបង្កើនការវិនិយោគ ជាពិសេសផ្នែករ៉ែធម្មជាតិ។ ចិនមានទំហំដោះដូរពាណិជ្ជកម្មជាមួយអាហ្រ្វិកក ស្មើ នឹង៣ភាគរយ នៃផលិតក្នុងស្រុកសរុបរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ