ស៊ូដង់ចុះកិច្ចព្រមព្រៀងជាប្រវត្តិសាស្ត្រ ឈានទៅបង្កើតរដ្ឋាភិបាលស៊ីវិល
ក្រុមយោធាកំពុងកាន់អំណាចនៅស៊ូដង់ និងក្រុមដឹកនាំចលនាបាតុកម្មប្រឆាំងរដ្ឋាភិបាលសឹក បានចុះកិច្ចព្រមព្រៀង ជាប្រវត្តិសាស្ត្រ លើសេចក្តីថ្លែងការណ៍ធម្មនុញ្ញ ផ្ទេរអំណាចដឹកនាំប្រទេសទៅឱ្យរដ្ឋាភិបាលស៊ីវិល។ ពិធីចុះហត្ថលេខាបានប្រព្រឹត្តទៅនៅរសៀល នៅថ្ងៃសៅរ៍ទី ១៧ សីហា ២០១៩នេះ នៅទីក្រុងខាទុំ ក្រោមវត្តមានរបស់ប្រមុខរដ្ឋ-រដ្ឋាភិបាល និងមេដឹកនាំបរទេសជាច្រើនរូប ព្រមទាំងពលរដ្ឋស៊ូដង់រាប់ពាន់នាក់។ ជាកិច្ចព្រមព្រៀងដ៏ផុយស្រួយមែន តែជាពន្លឺនៃក្តីសង្ឃឹមរបស់ប្រជាពលរដ្ឋ ថាស៊ូដង់នឹងមានសេរីភាព និង រុងរឿងឡើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
កិច្ចព្រមព្រៀង ដែលតំណាងយោធានិងតំណាងចលនាប្រឆាំងបានចុះហត្ថលេខា នៅថ្ងៃសៅរ៍នេះ មានទម្រង់ជាការចង្អុលដំណើរឆ្លងអន្តរកាល ផ្ទេរអំណាចដឹកនាំប្រទេសបែបយោធា ឱ្យស៊ីវិល សម្រាប់រយៈពេល៣៩ខែ។ ការបោះឆ្នោតសភា គ្រោងនឹងរៀបចំធ្វើនៅឆ្នាំ២០២២។ នៅថ្ងៃអាទិត្យស្អែក ក្រុមប្រឹក្សាយោធាដែលកំពុងកាន់អំណាចត្រូវរំលាយ ដោយដាក់ជំនួសមកវិញនូវក្រុមប្រឹក្សាអធិបតេយ្យ ដែលមានបន្ទុកដឹកនាំប្រទេសឆ្លងអន្តរកាល និង ដែលមានសមាសភាព១១នាក់ (ក្នុងនោះ៦នាក់ជាស៊ីវិល ៥នាក់ជាយោធា)។ ឆ្លងផុតដំណាក់កាលទីមួយនេះហើយ ក្រុមប្រឹក្សាអធិបតេយ្យ នឹងតែងតាំងនាយករដ្ឋមន្ត្រីថ្មី នៅថ្ងៃអង្គារ ដែលទំនងជារូបលោក អាដាឡា ហាំដុក អតីតសេដ្ឋវិទូប្រចាំអង្គការសហប្រជាជាតិ។ រដ្ឋាភិបាលថ្មីនឹងមានរូបរាងពេញលេញទៅថ្ងៃទី ២៨សីហា សប្តាហ៍ក្រោយ។ តួនាទីការពារជាតិនិងមហាផ្ទៃនឹងត្រូវស្ថិតនៅលើដៃក្រុមយោធា។
ដំណើរឆ្ពោះទៅរកលទ្ធិប្រជាធិបតេយ្យនៅវែងឆ្ងាយទៀតមែន ប៉ុន្តែប្រជាពលរដ្ឋស៊ូដង់បានសម្តែងក្តីអបអរ ទូទាំងប្រទេស ព្រោះការសម្រេចកិច្ចព្រមព្រៀងនេះ បានបិទបញ្ចប់ចលនាបះបោរប្រឆាំងដ៏ធំមិនធ្លាប់មាន រយៈពេល២៤០ថ្ងៃ បាត់បង់ជីវិតមនុស្សអស់២៥០នាក់ ទម្រាំច្រានប្រធានាធិបតីក្រាញអំណាច៣០ឆ្នាំ អូមារ អែលបេស្ហៀរបាននៅថ្ងៃទី១១មេសា ២០១៩ និងច្រានក្រុមឧត្តមសេនីយនៃរដ្ឋាភិបាលបណ្តោះអាសន្នយោធា ឱ្យព្រមបើកផ្លូវនាំប្រទេសឆ្លងអន្តរកាលទៅបង្កើតរដ្ឋាភិបាលស៊ីវិល តាមបែបប្រជាធិបតេយ្យ។
កិច្ចព្រមព្រៀងអាចសម្រេចទៅបានដោយមានអេត្យូពី និងសហភាពអាហ្វ្រិកជាអន្តរការី។ ពិធីចុះហត្ថលេខា បានប្រព្រឹត្តទៅក្រោមវត្តមានរបស់មេដឹកនាំបរទេសជាច្រើនដូចជា នាយករដ្ឋមន្ត្រីអេត្យូពី ប្រធានសហភាពអាហ្វ្រិក ថ្នាក់ដឹកនាំនយោបាយប្រទេសអេមីរ៉ាត់អារ៉ាបរួម អារ៉ាប៊ីសាអូឌីត អន្តរការីអាមេរិក អង់គ្លេស ព្រមទាំងតំណាងអង្គការសហប្រជាជាតិ និងសម្ព័ន្ធអារ៉ាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ