មេដឹកនាំក្រុមបាតុកម្ម ស៊ូដង់ចង់បង្កើតអាជ្ញាធរស៊ីវិលដឹកនាំប្រទេស
នៅចំពោះមុខការក្រាញអំណាចរបស់ក្រុមយោធា មេដឹកនាំធ្វើបាតុកម្ម នៅស៊ូដង់ បានប្រកាសនៅថ្ងៃសុក្រម្សិលមិញ ពីផែនការបង្កើតក្រុមប្រឹក្សាស៊ីវិលមួយ ដើម្បីចាត់ចែងដឹកនាំប្រទេស។ គោលដៅ គឺដើម្បីដាក់សំពាធលើក្រុមប្រឹក្សាយោធា ដែលកងទ័ពបង្កើតឡើង នៅក្រោយធ្វើរដ្ឋប្រហារទម្លាក់ប្រធានាធិបតីផ្តាច់ការ លោក អូម៉ា អ៊ែល បេស្ហៀរ នៅថ្ងៃទី ១១មេសា កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
បាតុកម្មប្រឆាំងមេដឹកនាំយោធោ នៅតែមិនចុះថមថយ នៅប្រទេសស៊ូដង់។ ៩ថ្ងៃក្រោយ រដ្ឋប្រហារយោធា បណ្តេញ ប្រធានាធិបតីផ្តាច់ការ លោក អូម៉ា អ៊ែលបេស្ហៀរ បាតុករស៊ូដង់ ដែលបានធ្វើបាតុកម្ម ជាង៤ខែមកហើយ នៅស៊ូដង់ នៅតែបន្តកាន់កាប់ទីតាំង នៅមុខអគ្គសេនាធិការដ្ឋានកងទ័ព ក្នុងទីក្រុងខារទូម។
ប្រជាជនស៊ូដង់បន្តធ្វើបាតុកម្ម ព្រោះតែពួកគេមិនយល់ស្របជាមួយ កងទ័ព ដែលបានប្រកាសបង្កើតក្រុមប្រឹក្សាយោធា ឲ្យធ្វើជាក្បាលម៉ាស៊ីនដឹកនាំប្រទេសក្នុងសម័យអន្តរកាល ២ឆ្នាំ។ នៅក្រោយរដ្ឋប្រហារ ក្រុមធ្វើបាតុកម្មដែលដឹកនាំដោយសមាគម បុគ្គលិកអាជីពស៊ូដង់ បានទាមទារចង់ឲ្យស៊ូដង់ដឹកនាំដោយរដ្ឋាភិបាលស៊ីវិល ប៉ុន្តែ ក្រុមប្រឹក្សាយោធាជំទាស់ បដិសេធ។
នៅក្នុងបំណងដាក់សម្ពាធកាន់តែខ្លាំង ឲ្យកងទ័ពផ្ទេរអំណាចទៅឲ្យប្រជាជនស៊ីវិល មេដឹកនាំបាតុកម្មនៅស៊ូដង់បានប្រកាស ពីគម្រោងបង្កើតក្រុមប្រឹក្សាស៊ីវិលមួយ ដើម្បី ចាត់ចែងដឹកនាំប្រទេស។ នៅក្នុងសេចក្តីថ្លែងការណ៍ចេញផ្សាយនៅថ្ងៃសុក្រ ក្រុមដឹកនាំបាតុកម្មនៅស៊ូដង់បានអះអាងថា នៅថ្ងៃអាទិត្យ គេនឹងប្រកាសឲ្យដឹងពីសមាសភាព របស់ក្រុមប្រឹក្សាស៊ីវិល ដែលមានតួនាទីចាត់ចែងកិច្ចការប្រទេសជាតិ។ នៅក្នុងក្រុមប្រឹក្សាស៊ីវិលនឹងមានផងដែរ ការចូលរួមពីអ្នកតំណាងរបស់កងទ័ព។
រហូតមកដល់ល្ងាចថ្ងៃសុក្រ គេនៅមិនទាន់ឃើញមានប្រតិកម្មរបស់ ប្រធានក្រុមប្រឹក្សាយោធា ឧត្តមសេនីយអាប់ឌែល ហ្វាតា អាល់បួរ៉ាននៅឡើយទេ។ សូមបញ្ជាក់ថា ឧត្តមសេនីយអាល់បួរ៉ាន ដែលត្រូវបានគេគ្រប់គ្នាចាត់ទុកជាឥស្សរជន នៅក្រៅប្រព័ន្ធដឹកនាំរបស់មេដឹកនាំផ្តាច់ការ អ៊ែលបេស្ហៀរ បានផ្តើមធ្វើកំណែទម្រង់ស្ថានប័នកងទ័ព គាស់ចេញទាំងឫស បក្ខពួករបស់អតីតប្រធានាធិបតីផ្តាច់ការ និងបានសន្យាដោះលែងក្រុមបាតុករ លើកបម្រាមគោចរ និងចាប់ជនដៃដល់ ដែលបានសម្លាប់បាតុករ ទៅកាត់ទោស។ សំខាន់ជាងនេះ ឧត្តមសេនីយអាល់បួរ៉ានបានសន្យាថា សម័យអន្តរកាលក្រោមការដឹកនាំរបស់ក្រុមប្រឹក្សាយោធា របស់លោក នឹងមានរយៈពេលយ៉ាងយូរបំផុត ២ឆ្នាំ មុននឹងផ្ទេរអំណាចទៅឲ្យរដ្ឋាភិបាលស៊ីវិល។ ប៉ុន្តែ បញ្ហានៅត្រង់ថា ប្រជាជនស៊ូដង់មិនសុខចិត្ត និងបន្តទាមទារឲ្យមានការផ្ទេរអំណាចភ្លាមទៅឲ្យក្រុមស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ