អង្គការ RSF ទាមទារឲ្យមានការស៊ើបអង្កេតដ៏ស៊ីជម្រៅនៅលើឃាតកម្មអ្នកកាសែតរុស្ស៊ី៣រូបនៅសាធារណៈរដ្ឋអាហ្វ្រិកកណ្តាល
អង្គការអ្នកកាសែតគ្មានព្រំដែន RSF នៅថ្ងៃពុធម្សិលមិញ បានទាមទារឲ្យអាជ្ញាធរអាហ្រ្វិកកណ្តាល បើកការស៊ើបអង្កេតមួយយ៉ាងម៉ឺងម៉ាត់និងស៊ីជម្រៅ ដើម្បីកំណត់អត្តសញ្ញាណពួកមេក្លោងក្នុងអំពើ ឃាតកម្មលើអ្នកកាសែតជនជាតិរុស្ស៊ី៣ រូបកាលពីយប់ថ្ងៃច័ន្ទឆ្លងមកថ្ងៃអង្គារមុននៅសារធារណៈរដ្ឋអាហ្រ្វិកកណ្តាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
អ្នកកាសែតរុស្ស៊ី៣នាក់ដែលគេធ្វើឃាតនៅសាធារណៈរដ្ឋអាហ្រ្វិកកណ្តាល មានលោក Orhan Djemal ជាអ្នកយកព័ត៌មានឯករាជ្យខាងបញ្ហាសង្គ្រាម លោក Kirill Radtchenko អ្នកកាសែតខាងថតរូបនិងលោក Alexandre Rasstorgouïev អ្នកកាសែតថតកុនឯកសារ។
អ្នកកាសែតរុស្ស៊ីទាំង ៣ រូបខាងលើនេះ ត្រូវបានជនប្រដាប់អាវុធមួយក្រុម ដែលគេពុំស្គាល់អត្តសញ្ញាណ ធ្វើឃាត នៅខណៈពេល ដែលពួកគេកំពុងធ្វើការស៊ើបអង្កេតមួយស្តីពី “ការចូលរួមរបស់ទាហានស៊ីឈ្នួលរុស្ស៊ី នៅ អាហ្វ្រិកកណ្តាល”។
អ្នកកាសែតរុស្ស៊ី ទាំង ៣ រូប នោះ ធ្វើការអោយប្រព័ន្ធផ្សព្វផ្សាយព័ត៌មានស៊ើបអង្កេតមួយតាមប្រព័ន្ធអ៊ីនធ័រនែតឈ្មោះ Tsour។ ប្រព័ន្ធផ្សាយ Tsour ដែលជាកម្មសិទ្ធិរបស់លោក Mikhaïl Khodorkovski អ្នកប្រឆាំងនឹងលោកប្រធានាធិបតីរុស្សីពូទីន ដ៏សំខាន់មួយរូបនៅក្នុងប្រទេសរុស្ស៊ី-នេះជាការគូសបញ្ជាក់របស់អង្គការអ្នកកាសែតគ្មានព្រំដែន RSF នៅក្នុងសេចក្តីជូនដំណឹងមួយ។
យោងតាមព័ត៌មាននានាដែលគេបានទទួលពីអង្គការ RSF” អ្នកកាសែតរុស្ស៊ីទាំង៣រូបនោះ កំពុងស្ថិតនៅក្នុងប្រទេសអាហ្វ្រិកកណ្តាល ចាប់តាំងពីប៉ុន្មានថ្ងៃមកហើយ ដើម្បីការស៊ើបអង្កេតមួយ ស្តីពី វត្តមាននិងតួនាទីរបស់ទាហានស៊ីឈ្នួល ដែលធ្វើការឲ្យក្រុមហ៊ុនមួយឈ្មោះ Wagner ។ Wagner ដែលជាកម្មសិទ្ធិរបស់ក្រុមហ៊ុនយោធាឯកជនរុស្ស៊ីមួយ ដែលគេស្គាល់ ដោយសារសកម្មភាពរបស់គេនៅក្នុងប្រទេសស៊ីរី-នេះជាការបញ្ជាក់របស់អង្គការ RSF ឬ អង្គការអ្នកកាសែតគ្មានព្រំដែន។
ជាង៤ឆ្នាំកន្លងមកហើយ បន្ទាប់ពីការស្លាប់ស្រ្តីអ្នកកាសែតថតរូបបារាំងឈ្មោះ Camille Lepage រួចមក និងឃាតកម្មលើអ្នកកាសែតរុស្ស៊ីទាំង ៣នាក់នាពេលថ្មីៗនេះទៀត សរបញ្ជាក់យ៉ាងច្បាស់ថា ជីវិតអ្នកកាសែតនៅតែប្រឈមខ្លាំងនឹងគ្រោះថ្នាក់នៅក្នុងការងារយកព័ត៌មានរបស់ពួកគេដើម្បីផ្តល់សកម្ខីកម្មនៅលើបញ្ហាសង្គ្រាមនៅក្នុងទឹកដីអាហ្វ្រិកកណ្តាល។ នេះ ជាការវាយតម្លៃរបស់លោក Cristophe Deloire អគ្គលេខាធិការអង្គការអ្នកកាសែតគ្មានព្រំដែន RSF ដោយលោក បានធ្វើការផ្តន្ទាទោសយ៉ាងម៉ឺងម៉ាត់ទៅលើអំពើឃាតកម្មទាំងអស់នោះ។ អង្គការ RSF បានរំលឹកប្រាប់ជាថ្មីទៀតថា ឃាតករលើរូបស្រ្តីអ្នកកាសែតថតរូបបារាំង Camille Lepage អាយុ២៦ឆ្នាំ ដែលត្រូវបានគេធ្វើឃាតនៅថ្ងៃទី១២ឧសភាឆ្នាំ២០១៤នោះ នៅតែពុំទាន់រកឃើញអត្តសញ្ញាណរបស់ពួកឃាតករ ។ អង្គការ RSF នេះ ថែមទាំងបានរិះគន់ទៅលើ បញ្ហាមិនប្រក្រតី ជាច្រើន នៅក្នុងការ ស៊ើបអង្កេតនេះទៀតផង។
យោងតាម អង្គការRSFដដែល សាធារណៈរដ្ឋអាហ្វ្រិកកណ្តាល មានចំណាត់ថ្នាក់អាក្រក់ខ្លាំងបំផុត នៅលើបញ្ហា សិទ្ធិសេរីភាពសាព័ត៌មាន គឺស្ថិតក្នុងចំណាត់ថ្នាក់ទី ១១២ ក្នុងចំណោមបណ្តាប្រទេសចំនួន១៨០នៅក្នុងឆ្នាំ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ