បោះឆ្នោតប្រធានាធិបតីនៅអេហ្ស៊ីប៖ភាពតានតឹងកំពុងឡើងដល់កំពូលនៅក្នុងស្ថាប័នកងទ័ព
ចុះផ្សាយនៅថ្ងៃ៖
ស្តាប់ - ០៤:២៥
នៅក្នុងប្រទេសអេហ្ស៊ីប ការបោះឆ្នោតជ្រើសរើសប្រធានាធិបតីថ្មីនឹងត្រូវរៀបចំនៅខែមីនាខាងមុខ។ បេក្ខជនដែលបានឈរឈ្មោះមានច្រើន មានទាំងស៊ីវិល និងយោធា រួមទាំងលោកឧត្តមសេនីយអាល់ ស៊ីស៊ីដែលកំពុងកាន់អំណាចសព្វថ្ងៃទៀតផង។ លោកអាល់ស៊ីស៊ីដែលជាបេក្ខជនកំពុងនាំមុខគេ និងអាចជាប់ឆ្នោតមួយអាណត្តិថ្មីទៀតផង។ តែអ្វីដែលគេបានសម្គាល់ឃើញនារយៈពេលចុងក្រោយនេះ គឺភាពផុយស្រួយរបស់លោកអាល់ស៊ីស៊ី និងការប្រជែងដណ្តើមអំណាចគ្នានៅក្នុងស្ថាប័នកងទ័ព។
បើគ្មានឧបសគ្គអ្វីរារាំងទេ លោកអាល់ស៊ីស៊ីនឹងក្លាយជាប្រធានាធិបតីអេហ្ស៊ីបសម្រាប់អាណត្តិថ្មីនៅក្នុងការបោះឆ្នោតប្រធានាធិបតីនាខែមីនាខាងមុខ។ គួររម្លឹកជូនឡើងវិញបន្តិចថា មុននឹងជាប់ឆ្នោតជាប្រធានាធិបតីក្នុងខែឧសភា ឆ្នាំ ២០១៤ ដោយទទួលបានសម្លេងគាំទ្រដល់ទៅ ៩៧% លោកអាល់ស៊ីស៊ីជាឧត្តមសេនីយ និងជាមេរដ្ឋប្រហារទម្លាក់លោកប្រធានាធិបតីជាប់ឆ្នោតម័រស៊ីក្នុងខែកក្កដា ឆ្នាំ ២០១៣។ ប៉ុន្មានសប្តាហ៍ក្រោយទម្លាក់លោកម័រស៊ី គឺឧត្តមសេនីយអាល់ស៊ីស៊ីរូបនេះឯងដែលបានបញ្ជាឲ្យវាយបង្រ្កាបលើក្រុមសកម្មជនអ្នកគាំទ្រលោកម័រស៊ីដោយបណ្តាលឲ្យមានមនុស្សស្លាប់ និងបាត់ខ្លួនជាច្រើនរយនាក់ រួមទាំងចាប់ញាត់គុកជាច្រើនរយនាក់ផ្សេងទៀត។
ក្នុងរយៈពេល ៤ឆ្នាំនៃការកាន់អំណាចផ្តាច់ការ លោកអាល់ស៊ីស៊ីបានពង្រឹងស្ថានប័នកងទ័ព និងបានប្រើគ្រប់មធ្យោបាយទាំងអស់ដើម្បីបិទមាត់អ្នកប្រឆាំង។ អ៊ីចឹងហើយបានជាក្រុមអ្នកវិភាគមិនញញើតនឹងអះអាងថា ការប្រគល់អណត្តិថ្មីឲ្យលោកអាល់ស៊ីស៊ីនាពេលខាងមុខ មិនខុសអ្វីពីការបន្តរបបផ្តាច់ការ និងការគំរាមកំហែងទេ។ តែទោះជាយ៉ាងនេះក្តី អ្វីៗវាអាស្រ័យទាំងស្រុងលើឆន្ទៈ និងជម្រើសរបស់ពលរដ្ឋអេហ្ស៊ីបដែលបានស្គាល់របបដឹកនាំដោយពួកយោធាច្រើនជាងរបបដឹកនាំដោយពួកស៊ីវិល។ កំណត់សម្គាល់មួយនៅក្នុងការបោះឆ្នោតប្រធានាធិបតីអេហ្ស៊ីបលើកនេះ គឺវត្តមានបេក្ខជនចេញមកពីប្រភពយោធាតែមួយ ក្រៅពីលោកអាល់ស៊ីស៊ី។
នេះពិតជាចម្លែកបន្តិចដែលនៅក្នុងរបបសឹកតែមួយ បែរជាមានបេក្ខជនឈរឈ្មោះជាឧត្តមសេនីយច្រើនរូបចូលប្រជែងគ្នាទៅវិញ ព្រោះតាមធម្មតា ពួកគេគួរតែនាំគ្នាគាំទ្របេក្ខជនអាល់ស៊ីស៊ីដែលជាចៅហ្វាយរបស់ពួកគេ។ តែជាមួយនឹងបទពិសោធន៍ដែលធ្លាប់អនុវត្តន៍កន្លងមក លោកអាល់ស៊ីស៊ីមិនបានទុកបណ្តោយឲ្យដង្កូវក្នុងសាច់ឯងមួយបន្តរីកធំធាត់យូរឡើយ។ ពីថ្នាក់ឧត្តមសេនីយដល់ថ្នាក់វរសេនីយ៍ឯកដែលបានឈរឈ្មោះជាបេក្ខជនប្រធានាធិបតីប្រជែងនឹងលោកអាល់ស៊ីស៊ី ត្រូវបានលោកអាល់ស៊ីស៊ីផ្តើមចាប់ខ្លួនជម្រះបញ្ជីម្តងមួយៗ។ ជាក់ស្តែងលោកឧត្តមសេនីយសាមី អាណាន់ដែលធ្លាប់ធ្វើជាមេបញ្ជាការកងទ័ពពីឆ្នាំ ២០០៥ ដល់ឆ្នាំ ២០១២ និងក៏ជាមន្រ្តីយោធាម្នាក់ដែលបានជួយលោកអាល់ស៊ីស៊ីឲ្យចូលជាសមាជិកក្រុមប្រឹក្សាជាន់ខ្ពស់កងទ័ព ក្រោយការធ្លាក់ពីអំណាចរបស់លោកហូស្ន៊ី មូបារ៉ាក់ក្នុងខែកុម្ភៈ ឆ្នាំ ២០១២។
ក្រៅពីការចាប់ខ្លួន នៅមានអ្នកដែលត្រូវបានគេលួចធ្វើឃាត ហើយអ្នកដែលនៅសេសសល់ក៏ហាក់គ្មានជម្រើសអ្វីក្រៅពីបោះបង់ចោលបេក្ខភាពរបស់ខ្លួនដើម្បីសំងំសុខឡើយ។ ចំណែកអ្នកដែលស្ថិតក្នុងក្រសែភ្នែកសង្ស័យរបស់លោកអាល់ស៊ីស៊ីក៏ត្រូវបានលោកអាល់ស៊ីស៊ីដកចេញពីអំណាច ដូចករណីលោកឧត្តមសេនីយហ៊ីហ្កាហ្ស៊ីដែលបានកាន់តំណែងមេបញ្ជាការកងទ័ពតាំងពីខែមីនា ឆ្នាំ ២០១៤។ ការដកតំណែងលោកហ៊ីហ្កាហ្ស៊ីនេះបានធ្វើឲ្យមជ្ឈដ្ឋានទូទៅភ្ញាក់ផ្អើលខ្លាំងណាស់។ ភ្ញាក់ផ្អើលនៅត្រង់ថា ក្រៅពីជាមិត្តដិតនៅក្នុងអាជីពជាទាហានតាំងពីយូរលង់មកហើយ លោកអាល់ស៊ីស៊ី និងលោកហ៊ីហ្កាហ្ស៊ីក៏ជាដន្លងនឹងគ្នាដែរ។ ចុងក្រោយ គឺការដកតំណែងប្រមុខស៊ើបការណ៍សម្ងាត់ឧត្តមសេនីយហ្វាហ្ស៊ីដែលជាមនុស្សជំនិតម្នាក់ទៀតរបស់លោកអាល់ស៊ីស៊ី។
តំណែងប្រមុខស៊ើបការណ៍សម្ងាត់ដ៏សំខាន់មួយនេះកំពុងនៅទំនេរ និងមានព័ត៌មានធ្លាយថា លោកអាល់ស៊ីស៊ីបានត្រៀមប្រគល់ទៅឲ្យលោកម៉ាមូដ អាល់ស៊ីស៊ីដែលជាកូនប្រុសទី២ របស់លោក។ រហូតមកដល់ពេលនេះ លោកអាល់ស៊ីស៊ីបានលើកយកហេតុផលទៅពន្យល់ថា ការដែលលោកបានផ្តើមរុះរើ ដោះដូរថ្នាក់ដឹកនាំក្នុងស្ថាប័នកងទ័ពពេលនេះ គឺដើម្បីពង្រឹងស្ថាប័នមួយនេះឲ្យមានប្រសិទ្ធភាពនៅក្នុងយុទ្ធនាការប្រយុទ្ធប្រឆាំងនឹងពួកជីហាតនៅក្នុងតំបន់ស៊ីណៃ ក៏ដូចពួកជ្រុលនិយមផ្ទែក្នុង។ តែក្រុមអ្នកវិភាគបានមើលឃើញថា ចំណាត់ការនៅក្នុងបរិបទនៃការរៀបចំបោះឆ្នោតប្រធានាធិបតីពិតជាមានឆន្ទៈក្នុងការកំចាត់គូប្រជែងដើម្បីប្រយោជន៍អំណាចផ្ទាល់ខ្លួន។
ខណៈនេះ ស្ថាប័នកងទ័ពកំពុងផុយស្រួយដែលអាចនឹងធ្វើឲ្យរូបលោកអាល់ស៊ីស៊ីខ្លួនឯងក៏ជួបគ្រោះថ្នាក់ដែរ។ អ្វីដែលគ្រប់គ្នាកំពុងបារម្ភ គឺរដ្ឋប្រហារកំចាត់គ្នាឯងនៅផ្ទៃក្នុងកងទ័ពដែលធ្វើឲ្យស្ថានការណ៍នយោបាយនៅអេហ្ស៊ីបវិលទៅរកភាពច្របូកច្របល់ជាថ្មីដូចក្នុងសម័យបដិវត្តន៍អារ៉ាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ