តុលាការឡាអេ ៖ មិនចាប់មេដឹកនាំស៊ូដង់ អាហ្វ្រិកខាងត្បូងល្មោភកាតព្វកិច្ច
តុលាការព្រហ្មទណ្ឌអន្តរជាតិ បានសម្រេចសេចក្តីនៅថ្ងៃព្រហស្បតិ៍ម្សិលមិញ ថា ការណ៍ដែលអាហ្វ្រិកខាងត្បូងមិនព្រមចាប់ខ្លួន លោក អូម៉ា អែល បេស្ហៀ Omar El Bechir ពេលប្រធានាធិបតីស៊ូដង់រូបនេះធ្វើដំណើរទៅប្រទេសអាហ្វ្រិកខាងត្បូង ស្របតាមដីការបស់តុលាការអន្តរជាតិ គឺជាការល្មោភលើកាតព្វកិច្ចតាមច្បាប់អន្តរជាតិ។ លោក អូម៉ា អែល បេស្ហៀ ត្រូវជាប់ចោទនៅក្នុងតុលាការព្រហ្មទណ្ឌអន្តរជាតិពីបទប្រព្រឹត្តឧក្រិដ្ឋកម្មប្រល័យពូជសាសន៍នៅDarfour។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
អាហ្វ្រិកខាងត្បូង មិនគោរពតាមដីកាអន្តរជាតិ មិនចាប់ខ្លួន និងមិនបញ្ជូន លោក អូម៉ា អែល បាស្ហៀ មកឱ្យតុលាការទេ ! ការណ៍បានរំខានមិនឱ្យតុលាការបំពេញតួនាទីត្រឹមត្រូវ ! នេះជាសេចក្តីសម្រេចរបស់ចៅក្រម Cuno Tarfusser។ ប៉ុន្តែលោកចៅក្រមមិនបញ្ជូនសំណុំរឿងនេះទៅកាន់ក្រុមប្រឹក្សាសន្តិសុខអង្គការសហប្រជាជាតិ និងទៅសភានៃក្រុមប្រទេសជាសមាជិកសន្ធិសញ្ញាក្រុងរ៉ូម ស្ថាបនិកតុលាការព្រហ្មទណ្ឌអន្តរជាតិទេ ព្រោះស្ថាប័នអង្គការសហប្រជាជាតិមិនទាន់ទាំងចាត់វិធានការ ទាក់ទងនឹងសំណើ៦ចំណុចក្នុងសំណុំរឿងលោក បេស្ហៀ នៅឡើយផង។
ក្រោយសេចក្តីសម្រេចនេះ គេមិនដឹងថាអាហ្វ្រិកខាងត្បូងនឹងធ្វើបន្ធឹងឧទ្ធរណ៍ឬអត់នោះទេ។ អាហ្វ្រិកខាងត្បូងបានបកស្រាយថា រដ្ឋាភិបាលប្រេតូរីយ៉ា ពិតជាមិនដឹងត្រូវធ្វើបែបណាទើបសមទេ រវាងការគោរពតាមដីការបស់តុលាការព្រហ្មទណ្ឌអន្តរជាតិ និងច្បាប់ធម្មនុញ្ញក្នុងប្រទេសខ្លួនដែលធានាអំពីអភ័យឯកសិទ្ធប្រធានាធិបតី។
លោក អូម៉ា អែល បាស្ហៀ ប្រធានាធិបតីស៊ូដង់ ជាប់ដីកាតាមចាប់ខ្លួនរបស់តុលាការអន្តរជាតិដល់ទៅពីរ តាំងពីឆ្នាំ ២០០៩ និង២០១០ ពីបទប្រព្រឹត្តអំពើប្រល័យពូជសាសន៍ និងឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងនឹងមនុស្សជាតិ នៅដាហ្វួរ ខេត្តខាងលិចប្រទេសកាលពីឆ្នាំ២០០៣ ដែលកាលណោះ មានពលរដ្ឋស៊ូដង់ជាង៣៣ម៉ឺននាក់បានស្លាប់។ ប៉ុន្តែ អូម៉ា អែល បេស្ហៀ បន្តធ្វើដំណើរទៅមកពីប្រទេសមួយទៅប្រទេសដោយគ្មានការព្រួយបារម្ភអ្វីទាំងអស់។ នៅឆ្នាំ២០១៥ ប្រធានាធិបតីស៊ូដង់រូបនេះ បានទៅចូលជំនួបកំពូលសហភាពអាហ្វ្រិកនៅប្រទេសអាហ្វ្រិកខាងត្បូង ! តែរដ្ឋាភិបាលអាហ្វ្រិកខាងត្បូងបានជ្រើសរើសមិនចាប់ខ្លួនលោក បេស្ហៀទេ ទើបត្រូវតុលាការព្រហ្មទណ្ឌបន្ទោសនៅថ្ងៃនេះ។
ចាប់កំណើតនៅឆ្នាំ២០០២ ជាមួយនឹងប្រទេសហត្ថលេខី ១២៤ប្រទេស តុលាការព្រហ្មទណ្ឌអន្តរជាតិ គ្មានកងកម្លាំងប៉ូលិសទេ តែងរំពឹងប្រទេសជាសមាជិកក្នុងការអនុវត្តដីកាអន្តរជាតិ។ ប៉ុន្តែតុលាការហាក់ដូចជាគ្មានអំណាចឥទ្ធិពលសោះ និងរងការរិះគន់កាន់តែខ្លាំងឡើងៗ ដោយមានសមាជិកដកខ្លួនចេញជាបន្តបន្ទាប់ ជាពិសេសក្រុមប្រទេសនៅទ្វីបអាហ្វ្រិកដោយពួកគេយល់ថា តុលាការកាត់ទោសតែមេដឹកនាំប្រទេសអាហ្វ្រិក (៩លើ១០ករណី ជាសំណុំរឿងអាហ្វ្រិក)។ អាហ្រ្វិកខាងត្បូង ក៏បានគំរាមដកខ្លួនចេញពីសន្ធិសញ្ញានេះដែរ កាលពីកុម្ភៈដើមឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ