សន្និសីទអន្តរជាតិស្តីពីស៊ីដា ៖ ត្រូវរង់ចាំយូរ ហើយមិនប្រាកដថាអាចមានថ្នាំព្យាបាលជំងឺអេដស៍
មានអ្នកឆ្លងមេរោគអេដស៍ថ្មី ប្រមាណ២លាននាក់កន្លះ ជារៀងរាល់ឆ្នាំ គិតចាប់តាំងពី ១០ឆ្នាំមក។ ការចម្លងថ្មីដ៏ថេរបែបនេះ គឺជាកង្វល់ដ៏ចំបងបំផុតសម្រាប់ក្រុមអ្នកស្រាវជ្រាវវេជ្ជសាស្ត្រ ដែលកំពុងជួបប្រជុំគ្នានៅក្នុងអង្គសន្និសីទអន្តរជាតិស្តីអំពីជំងឺអេដស៍លើកទី ២១នៅទីក្រុង ដៀរបង់ ប្រទេសអាហ្វ្រិកខាងត្បូង។ ជាងនេះទៅទៀតសន្និសីទបានព្រមានថា គេហាក់ដូចជាគ្មានពន្លឺអ្វីសោះទាក់ទងទៅនឹងការរកឃើញថ្នាំព្យាបាលអេដស៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ស្វែងរកថ្នាំព្យាបាលជំងឺអេដស៍ជាកម្មវត្ថុចំបងរបស់អ្នកវិទ្យាសាស្ត្រ ប៉ុន្តែមិនដឹងថាតើពេលណា ហើយអាចរកឃើញឬអត់ ! នេះគឺជាសារព្រមានរបស់លោកស្រី ម្ចាស់ជ័យលាភីរង្វាន់ណូបែលវេជ្ជសាស្ត្រ ដែលជាអ្នករកឃើញវីរ៉ុសស៊ីដា មុននឹងលើកទឹកចិត្តអង្គមហាសន្និសីទវិញ ថាការស្រាវជ្រាវស្ថិតក្នុងដំណាក់កាលចាំផ្តើមនៅឡើយទេ។
អ្នកវិទ្យាសាស្ត្រយល់កាន់តែច្បាស់អំពីវីរ៉ុសហ៊ីវហើយ តែមិនអាចទប់ស្កាត់ការរាតត្បាតដដែល។ កាលពីឆ្នាំទៅ អេដស៍បានសម្លាប់ជីវិតមនុស្ស១លានពីរសែននាក់ ទល់នឹង២លាននាក់នៅឆ្នាំ២០០៤ ដោយសារមានថ្នាំពន្យារជីវិត Antirétroviraux ដែលជាបន្សំនៃមូលេគុលបីយ៉ាង។ ឯការចម្លងថ្មី មិនបានថយចុះ ក្នុងរយៈពេល១០ឆ្នាំចុងក្រោយនេះ ពោលគឺស្ថិតនៅថេរក្នុងកំរិតប្រមាណជាង២,៥លាននាក់ក្នុងមួយៗឆ្នាំ ឬ៧០០០នាក់ ក្នុងមួយថ្ងៃ នៅលើពិភពលោក។
តួលេខនេះ ជាប្រភពនៃក្តីព្រួយបារម្ភខ្លាំងសម្រាប់អ្នកវិទ្យាសាស្ត្រ ព្រោះមានន័យពិភពលោកមានភាពយឺតយ៉ាវខ្លាំងក្នុងកាត់បន្ថយការចម្លងថ្មី។ ម្យ៉ាងវិញទៀត ភាពយឺតយាវកាន់តែធ្លាក់ដុនដាប់ខ្លាំងទៀត ទៅតាមទំហំកញ្ចប់ហិរញ្ញវត្ថុសម្រាប់ទ្រទ្រង់កម្មវិធីប្រយុទ្ធប្រឆាំង នឹងជំងឺអេដស៍។ ផ្ទុយទៅវិញ ប្រសិនបើរដ្ឋាភិបាល និងអង្គការអន្តរជាតិបង្កើនកិច្ចខិតខំប្រឹងប្រែង ទម្លាយកញ្ចប់ប្រាក់ឱ្យបានដល់៣៦ពាន់លានដុល្លារក្នុងមួយឆ្នាំៗ នោះកម្មវត្ថុលុបបំបាត់ជំងឺស៊ីដានឹងសម្រេចបាននៅឆ្នាំ២០៣០។ នេះបើតាមរបាយការណ៍របស់វិទ្យាស្ថានអាមេរិក នាឱកាសសន្និសីទអន្តរជាតិស្តីពីជំងឺអេដស៍។
បើតាមការសិក្សាដដែលនេះ មានមនុស្ស៣៨,៨លាននាក់មានផ្ទុកមេរោគអេដស៍ នៅឆ្នាំ២០១៥ ហើយចំនួននេះនឹងកើនឡើងជាលំដាប់។ ជាជំនួយការគិត នៅឆ្នាំ២០០០ ពិភពលោកមានអ្នកផ្ទុកមេរោគអេដស៍ប្រមាណតែ២៨លាននាក់ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ