ទស្សនកិច្ច លើកដំបូងរបស់ សម្តេចប៉ាប François នៅកេនយ៉ា
មនុស្សយ៉ាងហោចណាស់ ១លាននាក់ ត្រូវបានគេរំពឹងថានឹងមកស្តាប់សន្ទរកថា របស់សម្តេចប៉ាប ប្រមុខសង្ឃកាតូលិក នៅក្នុងទីក្រុង ណៃរ៉ូប៊ី ប្រទេសកេនយ៉ា។ នេះជាទស្សនកិច្ចលើកទីមួយរបស់ព្រះអង្គ ដែលធ្វើឡើងក្នុងបរិបទវិបត្តិដ៏ធ្ងន់ធ្ងរ នៅទ្វិបអាហ្វ្រិកបច្ចុប្បន្ន។ ការគម្រាមកំហែង ពីសំណាក់ក្រុមប្រកាន់សាសនាជ្រុលនិយម ដូចជាពួកជីហាដអ៊ីស្លាម ឆេបាប់ ក្រុមបូកូហារ៉ាំ ជាដើម នឹងត្រូវជាចំណុចក្តៅ ដែលសម្តេចប៉ាប នឹងត្រូវលើកយកមកថ្លែង ដើម្បីអំពាវនាវ ឲ្យគ្រប់គ្នាស្រលាញ់សន្តិភាព និងជម្រះឲ្យអស់នូវអំពើហឹង្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ទីលានសួនឧទ្យាន អ៊ូហ៊ូរូ ក្នុងទីក្រុងណៃរ៉ូប៊ី ត្រូវបានយាមកាមសន្តិសុខ យ៉ាងតឹងរឹង ក្នុងពេលទស្សនកិច្ចដែលប្រជាជនកេនយ៉ា អ្នកកាន់សាសនាកាតូលិក រំពឹងទុករាប់ឆ្នាំមកហើយ។ សម្តេចប៉ាប François បានយាងទៅដល់ទីក្រុងណៃរ៉ូប៊ី កាលពីល្ងាចថ្ងៃពុធ ហើយព្រឹកថ្ងៃព្រហស្បតិ៍ ជាពេលដែលព្រះអង្គ នឹងត្រូវថ្លែងសន្ទរកថា ព្រមជាមួយនឹងពិធីសូត្រធម៌ នៅចំពោះមុខប្រជាជនកេនយ៉ា រាប់សែននាក់។
មុននឹងយាងធ្វើសន្ទរកថា សម្តេចប៉ាប បានមានជំនួបរវាង ថ្នាក់ដឹកនាំ នយោបាយ សេដ្ឋកិច្ច សង្គមស៊ិវិល និងអ្នកតំណាងការទូត នៅកេនយ៉ា ចំនួន ៣ពាន់នាក់។ ដូចសព្វមួយដង ខ្លឹមសារសន្ទរកថា របស់សម្តេចប៉ាប គឺផ្តោតសំខាន់ទៅឲ្យការរួបរួមគ្នា ស្រលាញ់សន្តិភាព។ សន្តិភាពដែលទ្វីបអាហ្រ្វិក ត្រូវការដើម្បីកសាងនិងអភិវឌ្ឍន៍ខ្លួន ចេញផុត ពីភាពក្រីក្រលំបាក។
ថ្លែងជាភាសាអ៊ីតាលី សន្ទរកថាសម្តេចប៉ាប ត្រូវបានបកប្រែជាភាសាអង់គ្លេស ហើយ បានសង្កត់ធ្ងន់ ទៅលើការប្រើប្រាស់អំពើហឹង្សា ការមិនយកចិត្តទុកដាក់ ផ្តល់តម្លៃដល់មនុស្សស្រី។ សម្តេចប៉ាប បានបរិហារអំពីអត្តចរិក និងទង្វើឃោរឃៅ របស់មនុស្សប្រុស ធ្វើទៅលើស្ត្រី។ ព្រះអង្គថ្លែងថា សង្គមមួយដែលមានសុខភាពល្អ ទាល់តែធាតុផ្សំរបស់សង្គមនោះមានសុខភាពល្អដែរ។ គ្រួសារ គឺជាធាតុផ្សំដ៏សំខាន់ របស់សង្គម ហើយស្ត្រីមានតួនាទីធំណាស់ ក្នុងការថែរក្សា គ្រប់គ្រងគ្រួសារ ឲ្យរស់នៅក្នុងសុភមង្គល។ ការមិនផ្តល់តម្លៃឲ្យមនុស្សស្រី មិនថែទាំមនុស្សចាស់ មិនអប់រំថែរក្សាកូន ទាំងអស់នេះ វានឹងជះឥទ្ធិពលដោយផ្ទាល់ ទៅដល់សង្គមជាតិ នៅថ្ងៃខាងមុខ។
ក្រៅពីបញ្ហា លើកកំពស់ស្ត្រី សម្តេចប៉ាប បានថ្លែងបរិហារ អំពីការប្រើប្រាស់អំពើហឹង្សា ដោយយកសាសនាងុបងុល ជាសំអាង។ សម្តេចប៉ាប ថា កុំយកព្រះមកធ្វើលេស ព្រះមិនដែលមានបន្ទូលឲ្យសម្លាប់គ្នា ដើម្បីព្រះអង្គទេ។ មនុស្សដែលល្ងង់ ដែលជ្រុលនិយម ធ្វើទាំងបំពាន ហើយបំផ្លាញជំនឿសាសនាខ្លួនឯងទៅវិញទេ។ ក្នុងន័យនេះ សម្តេចប៉ាប បានសំដៅ ទៅដល់ការគម្រាមកំហែង របស់ក្រុមជីហាដអ៊ីស្លាម ជាច្រើនក្រុម ដូចជាក្រុមឆេបាប់ និងក្រុមបូកូហារ៉ាំ ជាដើម។
ប្រទេសកេនយ៉ា បានក្លាយជាចំណី នៃអំពើភេរវកម្ម ជាច្រើនលើកមកហើយ។ អំពើភេរវកម្ម ក្រុមជ្រុលនិយមសាសនា បានរុញច្រានសង្គមកេនយ៉ា ឲ្យធ្លាក់ទៅក្នុងការបែកខ្ញែកគ្នា ស្អប់ខ្ពើមគ្នា រើសអើងគ្នា រវាងអ្នកកាន់សាសនាកាតូលិក និង អ្នកកាន់សាសនាអ៊ីស្លាម។ សូមបញ្ជាក់ថា ក្នុងចំណោមប្រជាជនកេនយ៉ាទាំងអស់ មានអ្នកកាន់សាសនាកាតូលិក ចំនួន ជាង៣២% ពោលគឺស្មើនឹង ជិត១៤លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ