មេទ័ពដឹកនាំរដ្ឋប្រហារបួគីណាហ្វាសូព្រមចរចា និងស្តាប់អន្តរការីអាហ្វ្រិក តែត្រៀមប្រយុទ្ធ
ដោយមិនច្រានចោលដំណោះស្រាយតាមផ្លូវយោធា មេទ័ពGilbert Diendere ដែលបានធ្វើរដ្ឋប្រហារទម្លាក់ប្រធានាធិបតីកាលពីថ្ងៃទី ១៧កញ្ញា បានប្រកាសនៅល្ងាចថ្ងៃអង្គារទី ២២កញ្ញានេះ បន្តការចរចាជាមួយក្រុមកងទ័ពរបស់រដ្ឋាភិបាលស្របច្បាប់ តែរង់ចាំមើលសេចក្តីសម្រេចរបស់ក្រុមអន្តរការីអាហ្វ្រិកដែលកំពុងជួបប្រជុំគ្នានៅទីក្រុងអាប៊ូចា ដោះស្រាយវិបត្តិឱ្យបួគីណាហ្វាសូនេះ។
ចុះផ្សាយនៅថ្ងៃ៖
ស្តាប់ - ០១:៤២
អតីតនាយករដ្ឋមន្ត្រីអន្តរកាលបួគីណាហ្វាសូ លោក Isaac Zida ដែលជាប់ក្នុងកណ្តាប់ដៃពួកយោធាតាំងពីថ្ងៃធ្វើរដ្ឋប្រហារយោធាមក ត្រូវបានដោះលែងវិញហើយនៅ ព្រឹកថ្ងៃអង្គារនេះ។ ចំណែកក្រុមកងទ័ពជាតិដែលគាំទ្ររដ្ឋាភិបាលអន្តរកាលក៏បានប្រមូលផ្តុំកម្លាំងគ្នា ចូលមកកាន់រដ្ឋធានីអៅហ្គាឌូហ្គូ និងបានដាក់ឱសានវាទដល់ក្រុមយោធាកំពុងកាន់អំណាចតាមរយៈរដ្ឋប្រហារទម្លាក់អាវុធ។
ក្រុមកងទ័ពជាតិ របស់រដ្ឋាភិបាលអន្តរកាល រុលមកដល់រដ្ឋធានី តាមច្រក ចំនួន៦ ពង្រាយគ្នាឡោមព័ទ្ធរដ្ឋធានី។ ជាយុទ្ធសាស្ត្រមួយដែលងាយបង្កឱ្យមានការផ្ទុះអាវុធដាក់គ្នាដោយចៃដន្យ តែក៏ជាឱកាសបើកផ្លូវឱ្យមានការចរចាដោយស្ងាត់ៗ រវាងក្រុមឧត្តមសេនីយ៍ ជាគូបក្សដិបក្ស។ ព្រោះសូមបញ្ជាក់ថាក្រុមដឹកនាំធ្វើរដ្ឋប្រហារយោធានេះ គឺមនុស្សជំនិតនិងជាកងអង្គរក្សរបស់អតីតប្រធានាធិបតីបួគីណាហ្វាសូ ២៧ឆ្នាំឈ្មោះលោក ប្លែរ កុំប៉ោរ៉េ ខ្លះជាមិត្តរួមជំនាន់នឹងក្រុមកងទ័ពជាតិ។
ប៉ុន្តែក្នុងពេលរង់ចាំស្តាប់លទ្ធផលនៃជំនួបប្រជុំវិសាមញ្ញរបស់ក្រុមប្រមុខរដ្ឋនិងរដ្ឋាភិបាលនៃសហគមន៍សេដ្ឋកិច្ចរដ្ឋអាហ្វ្រិកខាងលិច ជាអន្តរការីដោះស្រាយវិបត្តិឱ្យបួគីណាហ្វាសូឧត្តមសេនីយ៍ Gilbert Diendéré តាមរយៈសន្និសីទកាសែត នៅថ្ងៃអង្គារនេះដដែល បានប្រកាសមិនចាកចេញពីតំណែងប្រធានក្រុមប្រឹក្សាជាតិដើម្បីប្រជាធិបតេយ្យ ដែលបង្កើតឡើងក្រោយរដ្ឋប្រហារនោះឡើយ។ បុរសខ្លាំងរូបនេះបានប្រកាសចង់ដោះស្រាយវិបត្តិតាមផ្លូវចរចា តែក៏មិននៅឈរស្ងៀមឱ្យគេវាយប្រហារឡើយ។
ក្នុងពេលនេះដែលបួគីណាហ្វាសូ ស្ថិតក្នុងស្ថានភាពកាន់តែដុនដាបយ៉ាងដូច្នេះ សហរដ្ឋអាមេរិក បានប្រកាសអាសន្នអំពីហានិភ័យនៃការធ្វើដំណើរទៅកាន់បួគីណាហ្វាសូ និងបានចេញអនុសាសន៍ឱ្យពលរដ្ឋខ្លួនចាកចេញពីប្រទេស តាមដែលអាចធ្វើទៅបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ