ទុយនីស៊ី ស្រាវចាប់បានបណ្តាញសង្ស័យពាក់ព័ន្ធភេរវកម្មជីហាត
នៅថ្ងៃចន្ទទី២៩មិថុនានេះ ទុយនីស៊ី បានប្រកាសក្រសោបចាប់ជាលើកទីមួយ ក្រុមមានពាក់ព័ន្ធនឹងភេរវកម្មជីហាតនៅមុខសណ្ឋាគារតាមបណ្តោយឆ្នេរសមុទ្ទកាលពីបីថ្ងៃមុន។ ប៉ុន្តែក្រសួងមហាផ្ទៃទុយនីស៊ី មិនបានលម្អិតអំពីអត្តសញ្ញាណនិងចំនួនមនុស្សចាប់ខ្លួនបានទេ។
ចុះផ្សាយនៅថ្ងៃ៖
ស្តាប់ - ០១:៤៣
ជាភេរវកម្មមរណៈ ដ៏ធ្ងន់ធ្ងរ មិនធា្លប់មានទេនៅទុយនីស៊ី ! ជនរងគ្រោះស្លាប់ ៣៩នាក់ និងរបួស៣៨៩នាក់ដែរ សុទ្ធសឹងជាទេសចរបរទេស ភាគច្រើនមានសញ្ជាតិអង់គ្លេស បានស្លាប់ក្រោមស្នាដៃភេរវកម្មរបស់ សៃហ្វេឌីន រ៉េសហ្គី និស្សិតផ្តាច់ខ្លួនជាអ្នកជ្រុលនិយមជីហាត។ ការវាយប្រហារដែលពួកអង្គការរដ្ឋអ៊ីស្លាមប្រកាសទទួលភ្លាមថាជាស្នាដៃរបស់ពួកគេ។
បើតាមក្រសួងមហាផ្ទៃទុយនីស៊ី ភេរវជនដៃដល់ បានទទួលការគាំទ្រ ជួយរៀបចំផែនការភេរវកម្ម ហើយជនសង្ស័យ៧នាក់ចាប់ខ្លួនបាននៅថ្ងៃនេះ សុទ្ធតែមានទំនាក់ទំនងជាមួយភេរវជនសៃហ្វេឌីន រ៉េសហ្គី។
ក្រសួងមហាផ្ទៃទុយនីស៊ី មិនបានផ្តល់ព័ត៌មានលម្អិតអ្វីទេ តែបានលើកឡើងថា ពួកនេះជាបណ្តាញនៅពីក្រោយភេវរកម្មបង្កឡើងដោយនិស្សិតសៃហ្វេឌីន ពួកនេះនឹងត្រូវទទួលទោសទៅច្បាប់។ ឥលូវនេះ ក្រុមអ្នកអង្កេតក៏កំពុងស្វះស្វែងចង់ដឹងថាតើភេរវជនជាខ្មាន់កាំភ្លើង បានទៅហាត់ពត់លត់ដំ ធ្វើជីហាត នៅប្រទេសលីប៊ីដែរឬអត់។ ប្រភពស្និទ្ធនឹងការអង្កេតបានបង្ហើបថា ជនសង្ស័យបួននាក់ត្រូវចាប់ខ្លួនបាននៅក្រុងស៊ូល និងផ្សេងទៀតខ្លះនៅក្រុងទុយនី ខ្លះនៅកាសេរីន។
ការប្រកាសចាប់ខ្លួនជនសង្ស័យជាលើកទីមួយនេះ ធ្វើឡើងតាមរយៈសន្និសីទកាសែតរបស់រដ្ឋមន្ត្រីក្រសួងមហាផ្ទៃទុយនីស៊ី ក្នុងខណៈដែលរដ្ឋមន្ត្រីក្រសួងមហាផ្ទៃបារាំង អង់គ្លេស និងអាល្លឺម៉ង់ មកចូលរួមគោរពវិញ្ញាណក្ខន្ធជនរងគ្រោះផងដល់កន្លែងកើតហេតុ។ វត្តមានរបស់រដ្ឋមន្ត្រីអឺរ៉ុប ដែលជាលើកចិត្តដល់រដ្ឋាភិបាលទុយនីស៊ី ឱ្យកាន់ក្លាហានចាត់វិធានការប្រឆាំងពួកភេរវនិយមជីហាត ដោយមានពង្រាយប៉ូលិសនៅឆ្នេរទេសចរណ៍ នៅក្នុងសណ្ឋាគារ និងពិសេសបិទវិហារអ៊ីស្លាមណាដែលរឹងទទឹងមិនស្តាប់បង្គាប់អាជ្ញាធរ ផ្សព្វផ្សាយតែសារញុះញង់ឱ្យស្អប់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ