អេបូឡា ៖ អង្គការសុខភាពពិភពលោក ប្រកាសជាផ្លូវការ លែងមានការរាតត្បាតនៅលីបេរីយ៉ា
ចប់ហើយការរាតត្បាតនៃមេរោគអេបូឡា នៅប្រទេសលីបេរីយ៉ា ! នេះជាសេចក្តីប្រកាសផ្លូវការរបស់អង្គការសុខភាពពិភពលោក នៅរសៀលថ្ងៃសៅរ៍ទី ៩ឧសភា តែបានអំពាវនាវលីបេរីយ៉ា រក្សាភាពប្រុងប្រយ័ត្ន ពីព្រោះមេរោគអេបូឡា មិនទាន់ត្រូវបានលុបបំបាត់ទាំងស្រុងទេ ! ថ្វីបើមេរោគអេបូឡាចុះខ្សោយមែន តែអេបូឡាមានវត្តមានជានិច្ចនៅហ្គីណេ និងសៀរ៉ាឡេអូន ជាប្រទេសជិតខាង។
ចុះផ្សាយនៅថ្ងៃ៖
ស្តាប់ - ០២:០៣
អង្គការសុខភាពពិភពលោក បានប្រកាសទទួលស្គាល់ជាផ្លូវការថាលែងមានការរាតត្បាតនៃអេបូឡាទៀតហើយ នៅក្នុងប្រទេសលីបេរីយ៉ា បន្ទាប់ពីសង្កេតឃើញគ្មានអ្នកឆ្លងមេរោគអេបូឡាថ្មីសោះ សម្រាប់រយៈពេល៤២ថ្ងៃជាប់គ្នា ពោលគឺស្មើនឹងពីរជុំនៃរយៈពេលដ៏វែងបំផុតដែលមេរោគសំងំក្នុងខ្លួនមនុស្ស។
យកឈ្នះជំងឺអេបូឡា ដោយបិទបញ្ចប់ការរាតត្បាត គឺជាសមិទ្ធកម្មដ៏អស្ចារ្យមួយរបស់លីបេរីយ៉ា ព្រោះថាក្នុងរយៈពេលតែមួយឆ្នាំសោះ អេបូឡា បានសម្លាប់ជីវិតមនុស្សអស់ជាង ៤៧០០នាក់ ក្នុងចំណោមអ្នកឆ្លងមេរោគ១០៥០០នាក់ (តួលេខចុងក្រោយរបស់អង្គការសុខភាពពិភពលោកចេញផ្សាយកាលពីថ្ងៃពុធទី ៦ឧសភា)។ ជាការរាតត្បាតដ៏ធ្ងន់ធ្ងរបំផុតមិនធ្លាប់មានគិតចាប់ពីឆ្នាំ១៩៧៦មក។
ផលវិបាកនៃជំងឺនេះ ក៏បានប៉ះពាល់យ៉ាងខ្លាំងដល់សេដ្ឋកិច្ចលីបេរីយ៉ា ដែលជាប្រទេសដ៏ក្រីក្រជាងគេបំផុតមួយនៅលើភពផែនដី។ វិធានការបិទព្រំដែនដើម្បីទប់ស្កាត់ការរាតត្បាត និងការរត់គេចខ្លួនរបស់ក្រុមអ្នកវិនិយោគ បានធ្វើឱ្យលីបេរីយ៉ាបានខាតបង់ប្រាក់ចំណូលអស់២៥០លានដុល្លារ។ សេដ្ឋកិច្ចជាតិបានងើបឡើងវិញ ក្រោយពីបើកព្រំដែនកាលពីខែមេសា កំណើនសេដ្ឋកិច្ចអាចមានដល់៣%នៅឆ្នាំ២០១៥ នេះបើតាមការព្យាកររបស់ធនាគារពិភពលោក ប៉ុន្តែសង្ឃឹមថាសហគមន៍អន្តរជាតិនឹងរក្សាពាក្យសន្យាផ្តល់ជំនួយ។
លីបេរីយ៉ាផ្តើមមានសកម្មភាពសេដ្ឋកិច្ចឡើងវិញ ប៉ុន្តែត្រូវប្រឈមនឹងប្រព័ន្ធសុខាភិបាលរិចរិល អេបូឡាបានផ្តាច់ជីវិតបុគ្គលិកពេទ្យស្ទើរផុតពូជ មន្ទីរពេទ្យបិទទ្វារស្ទើរគ្មានសល់។ ចុះអ្នករួចពីស្លាប់ពីអេបូឡា ?! រាប់សិបពាន់នាក់ត្រូវរស់ជាមួយនឹងភាពពិការថ្លង់ ខ្វិនខ្វង់ ងងឹតភ្នែក។ បញ្ហាចម្បងមួយទៀតគឺទំនុកចិត្ត អេបូឡាបានបង្កបង្កើតការរើសអើង ភាពមិនទុកចិត្តគ្នា រវាងអ្នកជិតខាង មិត្តភក្តិ ឬបងប្អូន។ ជំងឺផ្លូវចិត្តដែលពិបាកនឹងរលាយទៅវិញណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ