បោះឆ្នោតនៅកុងហ្គោ៖ ប្រព័ន្ធទូរគមនាគមន៍ត្រូវកាត់ផ្តាច់ដើម្បីរក្សាការស្ងប់ស្ងាត់
ថ្ងៃអាទិត្យទី២០ មីនានេះ ប្រជាជនប្រទេសកុងហ្គោ ត្រូវទៅធ្វើការសម្រេចចិត្តបោះឆ្នោត ជ្រើសរើសប្រធានាធិបតី។ បរិយាកាសនៅថ្ងៃបោះឆ្នោត ប្រកបដោយភាពតានតឹង ដោយសារតែរដ្ឋាភិបាលកុងហ្គោ បានសម្រេចកាត់ផ្តាច់ប្រព័ន្ធទូរគមនាគមន៍ ទូរស័ព្ទនិងអ៊ីនធើនែត រយៈពេល៤៨ម៉ោង ក្រោមហេតុផលថា ដើម្បីរក្សាការស្ងៀមស្ងាត់ និងកុំឲ្យមានមានអ្នកផ្សព្វផ្សាយលទ្ធផលមិនផ្លូវការ។ យ៉ាងណាក៏ដោយសម្រាប់ក្រុមគណបក្សប្រឆាំង នេះគឺជាវិធីសាស្ត្រមួយដើម្បីលួចបន្លំសន្លឹកឆ្នោត តែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
វាជារឿងគួរឲ្យភ្ញាក់ផ្អើលនិងហួសចិត្ត នៅពេលដែលគេបានឮការប្រកាស ថាប្រព័ន្ធទូរគមនាគមន៍នឹងត្រូវកាត់ផ្តាច់ រយៈពេល៤៨ម៉ោង ដើម្បីចៀសវាង កុំឲ្យក្រុមគណបក្សប្រឆាំងធ្វើការផ្សព្វផ្សាយលទ្ធផលបោះឆ្នោត ដែលមិនមែនជាលទ្ធផលផ្លូវការ។ បណ្តាញទូរស័ព្ទ និងបណ្តាញអ៊ីធើនែត នឹងត្រូវកាត់ផ្តាច់ចាប់ពីថ្ងៃអាទិត្យទី ២០ មីនានេះ ដែលជាថ្ងៃបោះឆ្នោតប្រធានាធិបតី អាណត្តិថ្មី នៅកុងហ្គោ។
ជាការកត់សម្គាល់ ក្រុមអ្នកយកព័ត៌មានបារាំង បានសង្កេតឃើញមានភាពស្ងប់ស្ងាត់ នៅតាមការិយាល័យបោះឆ្នោតមួយចំនួន តែទន្ទឹមនឹងនោះ ក៏មានភាពមិនប្រក្រតីមួយចំនួនដែរ។ តួយ៉ាង នៅក្នុងមណ្ឌល Makélélé ភាគខាងត្បូងរដ្ឋធានីកុងហ្គោ មានការិយាល័យបោះឆ្នោតបី ដែលបានបើកទ្វារយឺតពេល ដល់ទៅ២ម៉ោង។ មិនត្រឹមតែប៉ុណ្ណោះ ក្នុងករិយាល័យបោះឆ្នោតមួយ គឺមិនមានបន្ទប់សម្ងាត់សម្រាប់គូសសន្លឹកឆ្នោតទេ ហើយក៏មិនមានស្រោមសំបុត្រ សម្រាប់ដាក់សន្លឹកឆ្នោតដែរ។ ពោលគឺមានតែសន្លឹកឆ្នោត ដែលមានឈ្មោះបេក្ខជនទាំងអស់រួមគ្នា ហើយនឹងហិបឆ្នោតតែប៉ុណ្ណោះ។
អ្នកគាំទ្រខាងក្រុមប្រឆាំង បានបរិហារថា ការយឺតយ៉ាវក្នុងការបើកទ្វារ ព្រមទាំងការខ្វះខាតសម្ភារៈទាំងនេះ គឺជាចេតនារបស់រដ្ឋាភិបាល ដែលព្យាយាមបន្លំសន្លឹកឆ្នោត។ មិនត្រឹមតែប៉ុណ្ណោះ ប្រជាជនបានលើកឡើងអំពីភាពមិនប្រក្រតីមួយចំនួនទៀត ដូចជាការបង្កើតការិយល័យបោះឆ្នោតក្លែងក្លាយ ការប្រគល់បណ្ណបោះឆ្នោតក្លែងក្លាយទៅឲ្យប្រជាជន ព្រមទាំងនៅតាមតំបន់ខ្លះមានការអូសទាញមនុស្ស ឲ្យទៅបោះឆ្នោតមុនពេលកំណត់ក៏មាន។
ដោយឡែកក្រុមគណបក្សប្រឆាំង ដែលមានទាំងអស់៥គណបក្ស បានបញ្ជាក់ថា ការកាត់ផ្តាច់បណ្តាញទូរគមនាគមន៍ក្នុងពេលបោះឆ្នោតនិង ក្នុងពេលរាប់សន្លឹកឆ្នោត គឺជាចេតនារបស់លោកប្រធានាធិបតី កុងហ្គោ ដែលព្យាយាមរារាំងក្រុមការងារគណបក្សប្រឆាំង ក្នុងការប្រមូលព័ត៌មាន ទំនាក់ទំនងគ្នា ជុំវិញលទ្ធផលពិតនៃការបោះឆ្នោត។ សូមបញ្ជាក់ថា ដោយមានការមិនទុកចិត្តទៅលើគណកម្មការជាតិរៀបចំការបោះឆ្នោត ក្រុមគណបក្សប្រឆាំង បានរួមគ្នាបង្កើតក្រុមសង្កេតការណ៍ឯករាជ្យមួយផ្សេងទៀត ដើម្បីត្រួតពិនិត្យមើលដំណើរការបោះឆ្នោត។ ក្រុមការងារនេះ មានគំរោងថតរូបតាមទូរស័ព្ទ ព្រមទាំងទំនាក់ទំនងគ្នា ពីមណ្ឌលមួយទៅមណ្ឌលមួយ ដើម្បីផ្ទៀងផ្ទាត់លទ្ធផលជាក់ស្តែង ទៅនឹងលទ្ធផលដែលរដ្ឋាភិបាលប្រកាស។
លោកប្រធានាធិបតី Denis Sassou Nguesso កាន់អំណាចអស់៣២ឆ្នាំមកហើយ។ គាត់ឡើងកាន់អំណាចកាលពីឆ្នាំ១៩៧៩ រហូតដល់ឆ្នាំ១៩៩២។ បន្ទាប់មកនៅឆ្នាំ១៩៩៧ ប្រធានាធិបតីនេះ បានប្រើកម្លាំងយោធា បង្ករសង្រ្គាមស៊ីវីល ហើយបានត្រឡប់មកកាន់អំណាចវិញ រហូតដល់សព្វថ្ងៃ។ យ៉ាងណាមិញ សហភាពអឺរ៉ុប បានធ្វើពហិកាមិនចូលរួមសង្កេតការណ៍បោះឆ្នោតលើកនេះទេ ដោយគេយល់ថា ការកិបកេងសន្លឹងឆ្នោត ត្រូវបានរដ្ឋាភិបាលកុងហ្គោរៀប ដើម្បីយកឈ្នះរួចទៅហើយ។ គ្មានទេការបោះឆ្នោតប្រកបដោយសេរីយុត្តិធម៌ និងតម្លាភាពសម្រាប់ប្រជាជន ទាំង៥លាននាក់របស់កុងហ្គោ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ