នាយករដ្ឋមន្ត្រី អំពាវនាវឲ្យយុវជន ចូលរួមផ្នែកមនុស្សធម៌ ជួយសង្គម
ក្នុងអង្គមីទ្ទិញរំលឹកខួបទី ១៤៩ ទិវាពិភពលោក កាកបាទក្រហម-អឌ្ឍចន្ទក្រហម នៅថ្ងៃ៨ឧសភានេះ លោកនាយករដ្ឋមន្ត្រី ហ៊ុន សែន បានប្រកាសចាត់ទុកកម្លាំងយុវជនកាកបាទក្រហម ជាទ័ពស្រួច ផ្នែកមនុស្សធម៌ ជួយដល់កិច្ចការសង្គម។ ក្រៅពីនោះ លោកនាយករដ្ឋមន្ត្រី ក៏បានអំពាវនាវឲ្យយុវជន ចូលរួមក្នុងការងារជាមួយកាកបាទក្រហម ក្នុងបុព្វហេតុ ជួយសង្គ្រោះដល់ប្រជាពលរដ្ឋ។ អង្គមីទ្ទិញនៅព្រឹកមិញ កាកបាទក្រហមកម្ពុជា ដែលមានភរិយារបស់លោកនាយករដ្ឋមន្ត្រី ជាប្រធាន ក៏បានទទួលថវិកាពីសប្បុរសជន ជាង ១០ លានដុល្លារអាមេរិក។
ចុះផ្សាយនៅថ្ងៃ៖
ស្តាប់ - ០២:០៦
"យុវជន កំពុងនាំគ្នាធ្វើសកម្មភាព" ជាប្រធានបទសម្រាប់ទិវាកាកបាទក្រហម ថ្ងៃ៨ឧសភា នៅឆ្នាំនេះ។ លោកនាយករដ្ឋមន្ត្រី ហ៊ុន សែន បានចាត់ទុកថា កម្លាំងយុវជន ជាកងទ័ពស្រួច នៃសកម្មភាពមនុស្សធម៌។ នោះគឺយុវជនកាកបាទក្រហម កម្ពុជា ជាង ២ ម៉ឺននាក់ បានដើរតួ ក្នុងបុព្វហេតុជួយសង្គ្រោះដល់ប្រជាពលរដ្ឋ ក្នុងពេលកន្លងមក។
តាមរបាយការណ៍ រហូតមកដល់បច្ចុប្បន្ន យុវជនកាកបាទក្រហមកម្ពុជា ទូទាំងប្រទេស មានចំនួនកើនដល់ ២០.៤២១ នាក់ ដែលកំពុងធ្វើសកម្មភាពចម្រុះវិស័យ ក្នុងភារកិច្ចជាភ្នាក់ងារនៃការផ្លាស់ប្តូរឥរិយាបថ ក្នុងសហគមន៍ និងជាមិត្តអប់រំមិត្ត នៅតាមគ្រឹះស្ថានសិក្សា និងកន្លែងការងារ ព្រមទាំងសកម្មភាពមនុស្សធម៌ជាច្រើនទៀត ដូចជាការចូលរួមលើកកម្ពស់សុវត្ថិភាពចរាចរណ៍ ជាដើម។
សកម្មភាពសំខាន់ៗ របស់កាកបាទក្រហម កម្ពុជា ក្នុងឆ្នាំ២០១១ ក៏ត្រូវបានលោកនាយករដ្ឋមន្ត្រី ហ៊ុន សែន បានលើកមកបង្ហាញ ដែលរួមមាន ការជួយសង្គ្រោះដល់ជនភៀសសឹករាប់ម៉ឺននាក់ ដោយសារតែជម្លោះប្រដាប់អាវុធរបស់កងទ័ពថៃ នៅព្រំដែន ព្រមទាំងកិច្ចសង្គ្រោះជនរងគ្រោះដោយទឹកជំនន់ ជាដើម។
ក្នុងនាមរដ្ឋាភិបាល លោកនាយករដ្ឋមន្ត្រី ក៏បានកោតសរសើរចំពោះយុវជនកាកបាទក្រហមកម្ពុជា ដែលបានធ្វើសកម្មភាពនៅគ្រប់ទីកន្លែង។ យុវជន មិនត្រឹមតែមិនត្រូវបានគេបំភ្លេចចោលទេ ក៏ប៉ុន្តែយុវជន ក្លាយទៅជាឆ្អឹងខ្នងរបស់ជាតិ និងជាឆ្អឹងខ្នងរបស់កាកបាទក្រហម។
ជាការកត់សម្គាល់ យុវជនក៏ជាកម្លាំងបោះឆ្នោតមួយដ៏សំខាន់ សម្រាប់គណបក្សនយោបាយ ក្នុងការបោះឆ្នោតឃុំសង្កាត់ នៅខែមិថុនា និងការបោះឆ្នោតជាតិ នៅឆ្នាំ២០១៣។
ក្នុងពិធីជួបជុំនៅព្រឹកមិញ ឯកឧត្តម ឧកញ៉ា និងម្ចាស់ក្រុមហ៊ុន ជាដើម បានផ្តល់ថវិកា ដាក់លើជើងពាន ជូនដល់លោកនាយករដ្ឋមន្ត្រី និងភរិយា សម្រាប់ប្រើប្រាស់ ក្នុងការងារមនុស្សធម៌របស់កាកបាទក្រហមកម្ពុជា។ តាមការបូកសរុប សប្បុរសជនក្នុង និងក្រៅប្រទេស បានផ្តល់ជំនួយដល់កាកបាទក្រហម សរុបចំនួន ១០.៥០៨.៩១៩ ដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ