សហគមអន្តរជាតិ និងទុយនីស៊ី ប្តេជ្ញាកំចាត់ភេរវនិយម បន្ទាប់ពីការវាយប្រហារសម្លាប់អ្នកទេសចរជាច្រើននាក់
ភ្លាមៗក្រោយពីការវាយប្រហារនៅសារមន្ទីរ ប្រទេសទុយនីស៊ី សហរដ្ឋអាមេរិក អង្គការសហប្រជាជាតិ ប្រទេសដែលមានពលរដ្ឋខ្លួនស្លាប់ និងទុយនីស៊ីខ្លួនឯងផង បានចេញមុខថ្កោលទោសយ៉ាងខ្លាំងចំពោះការវាយប្រហារនោះ ព្រមទាំងបានប្តេជ្ញាថា ត្រូវធ្វើអ្វីៗគ្រប់យ៉ាង ដើម្បីកំចាត់អំពើភេរវនិយម ដ៏សែនសាហាវនេះ។ ការវាយប្រហារភេរវនិយមនៅសារមន្ទីរ ជិតរដ្ឋសភាទុយនីស៊ី បានសម្លាប់មនុស្ស ១៩នាក់ ក្នុងនោះមាន ១៧នាក់ជាជនបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ប្រតិកម្មថ្កោលទោស និងកំហឹង បានចេញជាបន្តបន្ទាប់រហូត ដល់ព្រឹកថ្ងៃព្រហស្បតិ៍នេះ បន្ទាប់ពីមានការវាយប្រហារ ដោយជនប្រដាប់អាវុធមួយក្រុមទៅលើសារមន្ទីរជាតិ Bardo ដែលស្ថិតនៅក្បែររដ្ឋសភា ប្រទេសទុយនីស៊ី កាលពីថ្ងៃពុធម្សិលមិញ។ តាមការស៊ើបអង្គេត បានបង្ហាញនៅព្រឹកនេះថា អ្នកទេសចរបរទេស ចំនួន ១៧នាក់ ដែលស្លាប់ នៅក្នុងការវាយប្រហារនោះ រួមមាន ៥នាក់ជាជនជាតិជប៉ុន, ៤នាក់ជាជនជាតិអ៊ីតាលី, ២នាក់ជាជនជាតិកូឡុំប៊ី និងអ្នកស្លាប់ផ្សេងទៀត ជាជនជាតិអូស្ត្រាលី បារាំង ប៉ូឡូញ និងអេស្បាញ។ ក្រៅពីនោះ រដ្ឋាភិបាល បានប្រកាសថា មានមនុស្ស ៤០នាក់ផ្សេងទៀត កំពុងរងរបួស ដោយក្នុងនោះក៏រួមមានទាំងពលរដ្ឋបារាំង អាហ្វ្រិកខាងត្បូង ប៉ូឡូញ អ៊ីតាលី និងជប៉ុន។
រដ្ឋាភិបាលកូឡុំប៊ី បានបង្ហាញក្តីសង្វែកថា ពលរដ្ឋកូឡុំប៊ី ២នាក់ ដែលត្រូវសម្លាប់នោះ គឺជាម្តាយ និងកូន។ ហើយពួកគេទៅទុយនីស៊ី សម្រាប់ដំណើរកម្សាន្តជាលក្ខណៈគ្រួសារ។ យ៉ាងណាក៏ដោយ ស្វាមីរបស់គ្រួសារនេះ បានរួចរស់ជីវិតពីការវាយប្រហារ។
អ្នករួចរស់ជីវិតជនជាតិជប៉ុនម្នាក់ បានប្រឹងនិយាយថា នាងត្រូវបានក្រុមភេរវជន បាញ់ត្រចៀក ដៃ និងក ហើយម្តាយរបស់នាង ក៏ត្រូវភេរវជនបាញ់ត្រូវកផងដែរ ដោយគាត់មិនអាចកំរើកបានទេ ពេលប៉ូលីសចូលទៅអន្តរាគម។ អ្នកដែលរួចរស់ជីវិត ភាគច្រើនសុទ្ធតែស្ថិតនៅក្នុងស្ថានភាពធ្ងន់ធ្ងរ ហើយពួកគេ បាននិយាយថា ការវាយប្រហារនេះ គឺគួរឲ្យរន្ធត់បំផុត។
ប្រធានាធិបតីទុយនីស៊ី បាននិយាយដោយរឹងមាំ ខណៈបានចុះទៅពិនិត្យជនរងគ្រោះ ក្នុងមន្ទីរពេទ្យទុយនីស៊ីថា៖ «ខ្ញុំចង់ឲ្យប្រជានទុយនីស៊ី យល់ថា ពួកយើងកំពុងតែមានសង្គ្រាមជាមួយនឹងអំពើភេរវនិយម ហើយអំពើសាហាវយង់ឃ្នង់នេះ មិនអាចបំភ័យពួកយើង ឲ្យដកថយនោះទេ។ ពួកយើងនឹងប្រយុទ្ធ រហូតដល់ដង្ហើមចុងក្រោយ។»
គួរជម្រាបជូនថា ពីដំបូងឡើយ ភេរវជន ៣នាក់ ស្លៀកឯកសណ្ឋានយោធា គ្រោងនឹងចូលវាយប្រហារនៅក្នុងរដ្ឋសភា ដែលក្រុមតំណាងរាស្រ្ត កំពុងប្រជុំ, តែដោយមិនអាចសម្រេចផែនការនោះបាន ពួកភេរវជន ក៏បានបែរទៅបាញ់ប្រហារលើរថយន្តក្រុងមួយ ដែលកំពុងដាក់អ្នកទេសចរណ៍បរទេស ឲ្យចូលទៅទស្សនាសារមន្ទីរជាតិ Bardo ដែលស្ថិតក្បែរមន្ទីររដ្ឋសភាជាតិវិញ។ ក្រោយការវាយប្រហារដោយក្រុមប្រដាប់អាវុធ កម្លំាងប៉ូលិស បានសម្រេចធ្វើអន្តរាគមន៍ដើម្បីរំដោះចំណាប់ខ្មំាង ដែលក្រុមភេរវជនបានចាប់ជាថ្នូរនៅក្នុងសារមន្ទីរ ដោយបណ្តាលឲ្យស្លាប់ប៉ូលិសម្នាក់ សម្លាប់បានភេរវជន២នាក់ និងចាប់ខ្លួនបានម្នាក់។
នេះជាភេរវកម្មសម្លាប់អ្នកទេសចរបរទេសយ៉ាច្រើន ជាលើកទី២ហើយ នៅទុយនីស៊ី បន្ទាប់ពីភេរវកម្មអត្តឃាតប្រឆំាងនឹងវិហារជនជាតិជ្វីហ្វនៅ ទីប្រជុំកោះ Djerba ក្នុងខែមេសា ឆ្នំា ២០០២ ដែលបានបណ្តាលឲ្យស្លាប់មនុស្ស ២១នាក់ភាគច្រើនជាជនជាតិអាល្លឺម៉ង់ឬបារំាង។ រដ្ឋអំណាចទុយនីស៊ី កំពុងធ្វើការស៊ើបអង្កេត លើការវាយប្រហារ សារមន្ទីរ Bardo នៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ